WACH MADUONG’ MA GASET WUOYOE | KAKA LAMO NYALO KONYOWA
Gimomiyo Nyasaye Dwaro ni Wawuo Kode e Lamo
Nyasaye dwaro ni ibed osiepne.
Osiepe ohero goyo mbaka mondo gimed jiwo winjruok maber manie kindgi. Kamano bende, Nyasaye dwaro ni wawuo kode mondo wabed osiepene. Onyisowa kama: “Unuluong nyinga, unudhi lama, mi anawinju.” (Yeremia 29:12) Sama iwuoyo gi Nyasaye, ibiro ‘sudo machiegni kode, to en bende nosud iri.’ (Jakobo 4:8) Muma wacho kama: ‘Jehova chiegni gi ji duto ma luongo nyinge.’ (Zaburi 145:18) Kaka wamedo wuoyo gi Nyasaye e lamo, e kaka osiep manie kindwa kode medo bedo motegno.
‘Jehova chiegni gi ji duto ma luongo nyinge.’ —Zaburi 145:18
Nyasaye dwaro konyi.
Yesu nopenjo niya: “En ng’ano kuomu ma ka wuode okwaye makate to omiye kidi? Kata ma ka wuode okwaye rech to omiye thuol? Kuom mano, ka un, . . . ung’eyo chiwo mich mabeyo ne nyithindu, donge Wuonu manie polo biro chiwo gik mabeyo e okang’ malach moloyo ne joma kwaye?” (Mathayo 7:9-11) Kuom adier, Nyasaye dwaro ni ilem nikech ‘odewi,’ kendo odwaro konyi. (1 Petro 5:7) Bende, odwaro ni inyise chandruogeni. Muma nyisowa niya: “Kik ubed gi parruok e wi gimoro amora, to kuom gik moko duto, kulamo kendo kusayo kaachiel gi goyo erokamano, nyisuru Nyasaye kwayou.”—Jo-Filipi 4:6.
Dhano nigi riyo mar wuoyo gi Nyasaye.
Josomo molony gi weche motudore gi kit ngima dhano, osefwenyo ni ji tara gi tara nenoga ni dwarore ni gilem. Kata mana joma ok oyie ni Nyasaye nitie oyie gi wechego. * To mano en nikech ne ochue dhano gi chan e chunygi mar ng’eyo Nyasaye. Yesu nowacho niya: “Joma mor gin joma nigi riyo mar ng’eyo Nyasaye.” (Mathayo 5:3) Yo achiel ma wanyalo loyogo riyono en kuom wuoyo gi Nyasaye pile.
Gin ber mage ma wabiro yudo sama wawuoyo gi Nyasaye e lamo?
^ par. 8 Nonro moro ma notim gi riwruok mar Pew Research Center e higa mar 2012, nonyiso ni e piny Amerka pasent 11 mar joma ok oyie ni Nyasaye nitie lemoga dichiel e dwe.
