Tich Joote 17:1-34
17 Eka ne gikalo Amfipoli gi Apolonia mi gichopo Thesalonika,+ kama ne nitie sunagogi mar Jo-Yahudi.
2 To kaluwore gi kaka Paulo ne jatimo,+ nodonjo ei sunagogi kama ne gintie, kendo kuom sabato adek, ne owuoyo kodgi kuom weche manie Ndiko+
3 kolero kendo siro puonjgo kotiyo gi weche mosendik ma nyiso ni ne nyaka sand Kristo+ kendo chiere,+ kowachonegi niya: “Ma e Kristo Yesu ma sani ayalonu wachne.”
4 Mano nomiyo moko kuomgi orwako yie mi giriwore gi Paulo kod Sila,+ kendo oganda mang’ongo moriwo Jo-Grik ma ne lamo Nyasaye kod mon mogwaro ma ne nigi huma, bende notimo kamano.
5 Kata kamano, nyiego nomako Jo-Yahudi+ kendo ne gichoko jomoko maricho ma ne bayo abaya e chirni, mi oganda ma achachno nochokore kendo ne gikelo koko e dalano. Ne gimonjo od Jason ka gidwaro golo Paulo gi Sila oko ne ogandano.
6 To ka ne ok ginwang’ogi, ne giywayo Jason gi owete moko mi giterogi ir jotend dalano, ka gikok niya: “Jo ma oseloko piny* mangimagi ni kae bende,+
7 kendo Jason oserwakogi e ode. Jogi duto kwedo weche ma Kaisar chiko, ka giwacho ni nitie ruoth machielo, ma en Yesu.”+
8 Ka ne giwinjo wechego, ogandano kod jotend dalano ne obwok;
9 to bang’ kawo pesa mar singo ma ne dwarore kuom Jason gi jomamokogo, ne giweyogi mondo gidhi.
10 Mapiyo ka nochopo otieno, owete nochiko Paulo gi Sila mondo gidhi Beria. Ka ne gichopo, ne gidonjo e sunagogi mar Jo-Yahudi.
11 Koro Jo-Yahudi ma ne ni Beria ne nigi chuny maber moloyo Jo-Yahudi ma ne ni Thesalonika nimar ne girwako wach Nyasaye ka gin gi chuny mamor, ka ginono Ndiko adimba pile ka pile mondo gine ka be wechego ne ni kamano adier.
12 Kuom mano, thothgi ne oyie, kendo mon moko mogwaro ma Jo-Grik ma ne nigi huma kaachiel gi chwo moko bende noyie.
13 To ka Jo-Yahudi ma ne oa Thesalonika nofwenyo ni Paulo ne yalo wach Nyasaye e dala mar Beria bende, ne gibiro kanyo mondo gimi oganda obed gi mirima.+
14 Eka gikanyono owete nochiko Paulo mondo odhi nyaka e nam,+ to Sila kod Timotheo ne odong’ chien.
15 To jo ma ne ni kod Paulo ne okowe nyaka Athens kendo ne giweye bang’ ka Paulo nosechikogi ni Sila kod Timotheo+ odhi ire mapiyo.
16 Koro sa ma Paulo ne ritogi Athens, chunye nochandore bang’ neno ka dalano opong’ gi nyiseche mag sanamu.
17 Omiyo, nodonjo e sunagogi mochako wuoyo gi Jo-Yahudi kod jomamoko ma ne lamo Nyasaye. Bende, nojawuoyo pile ka pile gi jo ma ne yudore e chirni.
18 To moko kuom jolup Epikuro kod jolup Stoiko ma ne puonjo riekni mag dhano nochako mino kode wach. Moko ne wacho kama: “En ang’o ma jawach thoreni dwaro wacho?” To jomamoko ne wacho niya: “Ochal ka jayal wach nyiseche ma welo.” Ne giwuoyo kamano nimar ne oyalo wach maber mar Yesu kod mar chier.+
19 Omiyo, ne gikawe mi gitaye nyaka Areopago mi giwachone niya: “Be wanyalo ng’eyo tiend puonj manyienni?
20 Nikech ikelonwa puonj moko ma pok ne wawinjo, dwaher ng’eyo tiendgi.”
21 Adier, Jo-Athens kod welo ma nodak kanyo ne ohero tiyo gi thuologi mag yueyo mana e goyo mbaka kata e winjo weche manyien.
22 Eka Paulo ne ochung’ e dier Areopago+ mowacho kama:
“Jo-Athens, aneno ni e gik moko duto, nenore ni umiyo nyiseche luor ahinya moloyo kaka jomamoko timo.+
23 Kuom ranyisi, sa ma ne akalo kendo nono mos gik mulamo, ne anwang’o bende kendo moro mar misango mondik ni, ‘Mar Nyasaye ma Ok Ong’e.’ Omiyo, Nyasaye ma ulamo ma ok ung’eyono, e ma sani ayalonu wachne.
24 Ruodh polo gi piny, ma en Nyasaye ma nochueyo piny kod gik moko duto manie iye,+ ok dag ei hekalu molos gi lwet dhano;+
25 en ok konye gi lwet dhano ka gima ochando gimoro,+ nikech en owuon omiyo ji duto ngima,+ gi muya, kod gik moko duto.
26 Kendo noloso ogendni duto+ koa kuom ng’ato achiel, mondo gidag e piny mangima,+ mi noketo chon ndalo kod tong’ mag kuonde ma dhano ne dhi dakie,+
27 mondo gimany Nyasaye mi giyude,+ kata obedo ni kuom adier ok en mabor gi ng’ato ka ng’ato kuomwa.
28 Nikech kokalo kuome wangima, wawuotho, kendo wantiere, mana kaka moko kuom jou ma jondik-wende osewacho niya, ‘Nikech wan bende wan nyithinde.’
29 “Kuom mano, nikech wan nyithind Nyasaye,+ ok onego wapar ni Nyasaye chal gi dhahabu, kata fedha, kata kite, kendo ni ochal gi gima opa gi riekni mag dhano.+
30 Adier, Nyasaye ok osedewo ndalo kaka mago ma ji ne ok ong’eye.+ To sani koro olando ne ji duto kamoro amora ni onego gilok chunygi.
31 Nikech oseyango odiechieng’ mobiro ng’adoe bura+ makare ne piny kotiyo gi jal moro moseketo, kendo kuom chiero jalo, osechiwo ne ji duto gima nyiso ni mano biro timore.”+
32 Koro ka ne giwinjo wach chiero jo motho, jomoko nochako jaro wachno,+ to moko nowacho niya: “Wabiro winji ane kendo kuom wachni.”
33 Omiyo, Paulo noweyogi,
34 to jomoko noriwore kode mi girwako yie. Moko kuomgi ne gin, Dionusio ma ne en jang’ad bura e od ng’ado bura ma Areopago, gi dhako moro ma nyinge Damar, kod jomamoko bende.
Weche Moler Piny
^ Kata, “osekelo koko e piny.”
