Dichiel e higa ka higa, Joneno mag Jehova kod jomamoko ma gigweloga e piny ngima chokorega mondo gipar tho mar Yesu mana kaka nochiko. (Luka 22:19) Chokruogno konyowaga ng’eyo kaka wanyalo nyiso ni wamor gi gima Yesu notimo ka nochiwo ngimane ne dhano duto. Bende, okonyowa ng’eyo kaka misango ma ne Yesu ochiwo nyalo konyowa sani kod e kinde mabiro.​—Johana 3:16.

 Ere kaka misango ma ne Yesu ochiwo nyalo konyi, bed ni nidhi e Rapar higani kata ooyo? Yesu nopuonjowa ni onego watim gik moko ariyo madongo ma luwogi:

1.  1. Wapuonjre e wi Nyasaye kod Yesu. Yesu nowuoyo gi Wuon-gi manie polo e lamo konyise niya: “Ka ng’ato ong’eyi, in Nyasaye makende mar adier kod jal ma ne ioro Yesu Kristo, to en gi ngima ma nyaka chieng’.”​—Johana 17:3.

2.  2. Wati gi gik ma wapuonjore. Yesu nojiwo ni onego wati gi puonjge e ngimawa. Kuom ranyisi, ka notieko twak ma nogolo e wi got, nopwoyo joma ‘winjo wechene kendo ma timogi.’ (Luka 6:46-48) Chieng’ moro bende, nowacho niya: “Kung’eyo wechegi, un jo mamor ka utimogi.”​—Johana 13:17.

 Be diher puonjori weche momedore e wi Nyasaye kod Yesu? Be diher ng’eyo kaka inyalo tiyo gi gik mipuonjori? Ma luwogi gin moko kuom kuonde minyalo yudoe weche ma nyalo konyi.

 Chenrowa mar puonjruok Muma ma onge chudo osekonyo ji mang’eny mondo onon Muma kendo giti gi puonjgo e ngimagi.

•   Dhi kama wacho ni Puonjri Muma gi Ng’at ma Tayi, mondo ine kaka chenrono chalo.

•   Ne vidio ma wacho ni Warwaki e Puonjruok Muma mondo ine kaka Joneno mag Jehova puonjoga ji Muma.

 Joneno mag Jehova chokorega diriyo e juma ka juma e utegi mag lamo mong’ere kaka Kingdom Hall. E chokruogego, wapuonjorega Muma kendo nono kaka wanyalo tiyo gi puonj mag Mumago e ngimawa.

 Chokruogego orwakie ji duto; ok ochuno ni ibed Janeno mar Jehova e ka idhi e chokruogego. Inyalo dhi e chokruogego aching’ kata inyalo tudi e yor vidio ka luwore gi chal ma intie.

•   Mondo ing’e kaka itimoga chokruogewa, ne vidio ma wacho ni Ang’o ma Timorega e Kingdom Hall?

•   Mondo iyud kar chokruok man machiegni kodi, dhi kama wacho ni Chokruoge mag Joneno mag Jehova.

 Websaitwani nigi sula kod vidio mang’eny ma nyalo konyi ng’eyo weche momedore e wi puonj mag Yesu kod kaka misango ma nochiwo nyalo konyi.

 Kuom ranyisi, mondo ipuonjri kaka tho mar ng’ato achiel nyalo waro ji tara gi tara, som sula ma wacho ni “Yesu Waro Ji e Yo Mane?” kod “Ang’o Momiyo ne Osand Yesu ma Onege?” kata ine vidio ma wacho ni Ang’o Momiyo Yesu Notho?