Muma wacho niya: “Jo mangima ging’eyo ni gibiro tho: to jo motho ok ging’eyo gi moro.” (Eklesiastes 9:5; Zaburi 146:4) Omiyo, ka ng’ato otho, obedo ma onge. Ng’at motho ok nyal paro, winjo kata timo gimoro.

“Inidogi ni buru”

Nyasaye nowacho kama jomotho dhiyega kane owuoyo gi Adam. Nikech Adam ne otamore winje, Nyasaye nonyise kama: “Nikech in buru, kendo inidogi ni buru.” (Chakruok 3:19) Kane Nyasaye pok ochueyo Adam “gi buru mar lowo,” Adam ne onge. (Chakruok 2:7) Kamano bende, kane Adam otho, nodoko buru mobedo ma onge kendo.

Mano bende e gima timore ne joma tho e kindegi. Muma wacho kama kowuoyo e wi dhano kod le: “Giduto be gia e buch lowo, mi giduto gilokore buch lowo kendo.”​—Eklesiastes 3:19, 20.

Tho ok e giko mar dhano

Kinde mang’eny, Muma pimo tho gi nindo. (Zaburi 13:3; Johana 11:11-14; Tich Joote 7:60) Ng’at manie nindo matut ok ong’eyo gimoro amora. Mano bende e gima timore ne ng’at motho. Gima morowa en ni Muma puonjo ni Nyasaye nyalo chiero ng’at motho mana ka gima ochiewe e nindo mobed mangima kendo. (Ayub 14:13-15) Ne jogo ma Nyasaye biro chiero, tho ok e giko margi.