Dhano duto nigi nyingegi. Kuom mano, donge en gima nenore maler ni Nyasaye be nyaka bed gi nyinge? Bedo gi nying kendo tiyo kod nyingego en gima konyo ahinya e wach bedo gi osiep. Be weche onego koro olokre kodok korka wach bedo osiep Nyasaye?

E Muma Nyasaye wacho niya: “An Jehova; ma e nyinga.” (Isaiah 42:8) Kata obedo ni en gi nyinge mag pak kaka “Nyasaye Manyalo Duto,” “Ruoth Mamalo Chutho,” gi “Jachuech,” omiyo jotichne thuolo makende mar luonge gi nyinge.—Chakruok 17:1; Tich Joote 4:24; 1 Petro 4:19.

E loko mang’eny mag Muma, nying Nyasaye yudore e ndiko mar Wuok 6:3. Ndikono wacho kama: “Nafwenyora ni Ibrahim, ni Isaka, kendo ni Jakobo, ka Nyasaye Manyalo duto, to nyinga ma JEHOVA ne ok ging’eyago.”

Nying Nyasaye mindiko gi dho kisungu ni “Jehovah” osebed kitiyogo kuom higni mathoth. Kata bed ni josomo mang’eny ohero ndiko “Yahweh” sama gindiko nying Nyasaye, Jehova e ma ong’ere ahinya. Kidieny mokwongo mar Muma ne ondik e dho Hibrania to ok e dho Kisungu. Dho Hibrania isomo kia korachwich kidhi koracham. E dho Hibrania nying Nyasaye indiko ni יהוה. Nyukta ang’wen-go kolok to bedo YHWH, ma koro iluongo ni Tetragrammaton.