Ja̱a̱. Mizhokjimi pjørꞹ nu kʼꞹ matrʼꞹ o trju̱u̱ angeze ma sødyɇ. Ne Biblia mama: “E Jehová ra mbørꞹ ma ra obʼꞹ kja o ngama yo paa ma ra sødyɇ” (Salmo 41:3). Ra manji jñii kʼꞹ ra mbøxkꞹji ma ri pɇsʼiji na ngijeme ke dya kja ra ndisʼi:

1.   Ra øtꞹji Mizhokjimi ra zɇtsiji ngekʼua ra sɇchiji. Ne Biblia mama: “Mizhokjimi ra tsjakʼꞹji ra soya in mꞹbʼꞹgeji kʼꞹ dya pje ri tsjijñiji”, nuk’o pjøxkꞹji ngekʼua ra sɇchiji ma ri pɇsʼiji ndumꞹ (Filipenses 4:6, 7).

2.   Dya ra jɇziji ra to̱gꞹ in mꞹbʼꞹji. Ne Biblia mama: “Na mꞹbʼꞹ ke me mⱥjⱥ nge na ñʼechje kʼꞹ me na joo, pe kʼꞹ to̱gꞹ dya kja na zɇzhi” (Proverbios 17:22; Dios habla hoy [Verción Popular]). Ma ra mⱥji, nukʼo ra mbøxkꞹji dya ra to̱gꞹ in mꞹbʼꞹji ñe dya tsʼi rga sødyɇji.

3.   Ra kjapꞹ ra zɇzhi in esperanza. Nu esperanza pjøxkꞹji ra søji na joo zø ri sødyɇji (Romanos 12:12). Ne Biblia mama ke ra sⱥjⱥ na paa ma dya kja kjo ra mama: “Ri sødyɇgø” (Isaías 33:24). E mizhokjimi ra ndisʼi yo ngijeme ke yo doctor dya søø ra ndisʼiji. Ñe jmanch’a jmanch’a yo lande ra nzhogꞹji kʼua ma kjaji ma mi trʼatrʼiji, ne Biblia mama: “Ke o ngee ra nzhogꞹ nzakja ma kja mi trʼii, ke angeze me ra zɇzhi na yeje nzakja ma kja mi trʼii” (Job 33:25).

 Nu nota: Yo ri testigojme e Jehová ri kreøjme ke e Mizhokjimi mbøxkꞹjme ma ri sødyɇjme, xo ri pojme ko yo doctor ngekʼua angezeji xo ra mbøxkꞹjme ra ndinsijme in ngijeme (Marcos 2:17). Dya kjo ri xikʼøjme pje ma doctor ra ma nuji, nrre nazi ri juanꞹji pje ma ñʼechje ra siji.