Kuuma karaaja, Jehova endaga o nja ĩtumĩra ĩgiita amwe gwĩkĩra inya ngwatanĩro yaao na Mũrungu, na amwe na antũ ba nja. (Kuriikanithia Maathana 6:6, 7) Nĩkĩo gĩtũmi Akũũjĩ ba Jehova bethagĩrwa na kaanya o kiumia o kiumia nĩũntũ bwa ũthaathayia bwa nja barĩ amwe—bakĩarĩragia na njĩra ĩmbooreru mantũ jegiĩ Mũrungu na moobatu jaao. Kinya kethĩra ũkaraga wenka, no ũtumĩre kaanya ja kau gũkuĩrĩĩria Mũrungu gũkũrũkĩĩra wiritani bwaku wengwa bwa Bibiria.

Ũthaathayia bwa nja nĩ ĩgiita rĩa kũthengeera Jehova. “Thengeereni Murungu, nawe akabuthengeera.” (Jakubu 4:8) Nĩtũmenyaga Jehova nkũrũki rĩrĩa twairitana mantũ joongwa jegiĩ ũrĩa akari na mathithio jaawe gũkũrũkĩĩra Rũteto rwawe Bibiria. Njĩra ĩmpũũthũ ya kwambĩrĩria ũthaathayia bwenu bwa nja nĩ gũtumĩra kagiita kanna kũthooma Bibiria na kaajũ bũrĩ amwe, mbuga bũkĩthingatagĩra mũtaratara jwa o kiumia jwa Mũcemanio jwa Ũtũũro na Ũtungatĩri. No ũgaĩre o muntũ wonthe wa nja gacuncĩ karĩa akathooma, na bwaarĩĩrie jarĩa bwairitana kuumania na Maandĩko.

Nĩ ĩgiita rĩa gũkuĩanĩĩria na bangĩ ndeene ya nja. Akũrũ na eekũrũ, ona kinya aciari na aana, nĩbaĩkagĩra ngwatanĩro yaao inya rĩrĩa bairitana Bibiria amwe ta nja. Ĩgiita rĩu rĩbuĩri kwĩthĩrwa rĩrĩ rĩa kũgwĩrĩrua, rĩrĩ na ũkiri na rĩa kwĩrĩgĩĩrwa nĩ muntũ wonthe o kiumia. Aciari babuĩri kũthuura jarĩa bakaarĩĩria kũringana na ũkũrũ bwa aana baao, mbuga mantũ kuuma kĩrĩ Mnara wa Mlinzi na Amkeni! kana kuuma kĩrĩ webusaĩti yeetũ, jw.org. No bwaarĩĩrie mathĩĩna jarĩa aana beenu bagũkũrũkĩĩra cukuru na ũrĩa bakoombana nayo. Rĩ, to bũtege programu ĩmwe kĩrĩ JW Broadcasting (tv.mt1130.com) na nyumene bũmĩarĩĩrie bũrĩ amwe? No bũgwĩrĩrue kwiritana ndwĩmbo irĩa ikainwa mĩcemanione na bwĩthĩrwe na twiinto tũũkai twa kũrĩa bwathiria ũthaathayia.

Kagiita gaka ka mwanya gatumĩrwa o kiumia kũthaathayia Jehova amwe ta nja, gagateethia nja yonthe kũgwĩrĩrua Rũteto rwa Mũrungu, na akatharima nkũrũki gwiciũmia kwenu.—Zaburi 1:1-3.

• Nĩkĩ twĩthagĩrwa na ĩgiita rĩa ũthaathayia bwa nja?

• Nĩatĩa aciari boomba kũthithia nĩkenda kaanya gaka kethĩrwa karĩ ga kũgwĩrĩrua nĩ bonthe ndeene ya nja?