KĨTHOOMO KĨA ĨKŨMI NA BIĨRĨ
Nĩatĩa Ũũmba Kwaa Mũcoore wa Mũrungu?
1, 2. Nĩ baaũ bamwe baarĩ acoore ba Jehova?
NŨŨ wenda aa mũcoore waaku? Nĩ muntũ ũrĩa wendete. Muntũ ũrĩa bwiganagua nawe na bũkagwatanĩra. Muntũ ũrĩ kĩao na nkuma ingĩ wendete.
2 Jehova nathuuraga antũ bamwe baa acoore baawe. Ngerekano, Abrahamu aarĩ ũmwe wa acoore ba Jehova. (Isaya 41:8; Jakubu 2:23) Jehova nendeete kinya Daudi. Aaugĩre Daudi aarĩ ‘muntu uria nkoro yawe yendaga.’ (Mathithio 13:22) Kĩroria Danieli aarĩ “muntu wendi mono” nĩ Jehova.—Danieli 9:23.
3. Nĩkĩ Abrahamu, Daudi na Danieli baarĩ acoore ba Jehova?
3 Nĩatĩa Abrahamu, Daudi na Danieli baaere acoore ba Jehova? Jehova eerĩre Abrahamu: ‘Ni wigitue kaju gakwa.’ (Kiambiriria 22:18) Jehova aejaga mũcoore wa barĩa bamwathĩkagĩra bainyiĩtie. Kinya mũgongo junthe jwa antũ jũrĩngĩũmba kwaa acoore baawe. Jehova eerĩre mũgongo jwa Israeli: “Mbigagueni kaju gakwa, nani nkaa Murungu wenu, nabwi bwe antu bakwa.” (Jeremia 7:23) Kwou kinya gwe nũkũbatara kwathĩkĩra Jehova kethĩra nũkwenda kwaa mũcoore waawe kamma.
JEHOVA NAKARAGIA ACOORE BAAWE
4, 5. Nĩatĩa Jehova akaragia acoore baawe?
4 Bibiria yugaga Jehova nacwaga njĩra cia kwonania “ari na inya mono ya gutethia antu baria bamuthingataga na nkoro ciao cionthe.” (2 Mantu ja Karaja 16:9) Kĩrĩ Zaburi 32:8, Jehova aeete acoore baawe wĩrane bũbũ: “Ngakuumiyia, na nkuritane nderia ugeetagiira; ngakwathaga kirira ngukuniirite.”
5 Mũnthũ ũrĩ inya nakwenda gũtũrigĩĩria tũtĩkae acoore ba Mũrungu. Ĩndĩ Jehova nakwenda gũtũkaria. (Thooma Zaburi 55:22.) Tũtumĩkagĩra Jehova tũrĩ acoore baawe, na nkoro cietũ cionthe. Twĩthagĩrwa tũrĩ etĩkĩkua kĩrĩ we kinya rĩrĩa tũrĩ mathĩĩnene. Na twĩna ũcamba o ta bũrĩa mwandĩki wa Zaburi aarĩ nabu. Aandĩkĩre ũjũ bwegiĩ Jehova: “Tontu ari rutere rwa njara yakwa ya urio, gutirio nkoroebaeba.” (Zaburi 16:8; 63:8) Nĩatĩa Nkoma ageragia gũtũrigĩĩria tũtĩkae acoore ba Jehova?
NTHITANGO YA SHAITANI
6. Nĩatĩa Shaitani aaugĩre bwegiĩ antũ?
6 Kĩthoomone kĩa 11 twairitanĩre Shaitani naakararĩrie Jehova. Aaugĩre Jehova nĩ mũrongo na atĩthithagia mantũ na ĩota tontũ atetĩkĩrĩrie Adamu na Hawa baithuurĩra bongwa jarĩa meega na jarĩa maaĩ. Iuku rĩa Bibiria rĩa Ayubu rĩtũritanaga Shaitani kinya nathitangaga antũ barĩa bakwenda kwaa acoore ba Mũrungu. Shaitani augaga atĩ batumĩkagĩra Mũrungu tontũ bwa birĩa bomba kwona kuumania Nawe, na tĩ tontũ nĩbamwendete. Shaitani kinya augaga atĩ oomba kũgarũra o muntũ wonthe kuuma kĩrĩ Mũrungu. Tiga twone jarĩa tũũmba kwiritana kuumania na Ayubu na ũrĩa Jehova aamũkarĩrie.
7, 8. (a) Nĩatĩa Ayubu aarĩ mwanya na antũ ba ĩgiita rĩawe? (b) Shaitani aaugĩre atĩa bwegiĩ Ayubu?
7 Ayubu aarĩ ũũ? Aarĩ muntũ ũmwega ũrĩa waatũũraga gĩntũ ta mĩaka 3,600 ĩmĩthiru. Jehova aaugĩre gũtĩ muntũ waakari tawe nthĩgũrũne ĩgiitene rĩu. Ayubu naarĩ na gĩtĩĩo mono kĩrĩ Mũrungu, na naathwĩre jarĩa mathũũku. (Ayubu 1:8) Ayubu aarĩ mũcoore wa mma wa Jehova.
8 Shaitani oonanĩrie atĩ Ayubu ataatumĩkagĩra Mũrungu ũtheri. Shaitani eerĩre Jehova: “Anga tigwe umwirigirite rwego rwamuthiurukira, amwe na antu ba njewe bonthe, amwe na into bionthe biria ari nabio? Ningi togwe utharimite ngugi cia njara ciawe, o na utonga bwawe bwaingea nthiguru? Utamburukia njara yaku nandi uringithie bionthe biria ari nabio, wone kethira atikuruma kimbone.”—Ayubu 1:10, 11
9. Nĩatĩa Jehova eetĩkĩrĩĩrie Shaitani athithia?
9 Shaitani aathitangĩre Ayubu atĩ aatumĩkagĩra Jehova akĩ tontũ bwa birĩa oonaga kuuma kĩrĩ We. Shaitani kinya oonanĩrie arĩngĩtũma Ayubu atĩgatumĩkĩre Jehova. Jehova ateetĩkanĩrĩrie na Shaitani, ĩndĩ Naaere Shaitani rũũtha rwa kũgeria oona kethĩra Ayubu aarĩ mũcoore wa Jehova tontũ naamwendete.
SHAITANI KWITHŨKĨRA AYUBU
10. Nĩatĩa Shaitani aithũkĩĩre Ayubu, na Ayubu aathithĩrie atĩa?
10 Mbere, Shaitani aithũkĩĩre na araiya ndĩthia cionthe cia Ayubu. Shaitani aracooka arooraga nthũũmba cia Ayubu inyiingĩ. Ayubu arathirĩrwa nĩ bionthe. Kĩrĩ mbithũkĩro ya mũthia, Shaitani ooragĩre aana ĩkũmi ba Ayubu gũkũrũkĩĩra kĩbubani gĩkĩnene. Ĩndĩ Ayubu aakarĩre arĩ mwĩtĩkĩkua kĩrĩ Jehova. “Kiri mantu jau jonthe guti kawiyia Ayubu aaringithia, ningi atamaria riitwa ria Murungu.”—Ayubu 1:12-19, 22.
Jehova natharimĩre Ayubu tontũ bwa ũcoore bwawe bwa wĩtĩkĩkua
11. (a) Nĩatĩa bũngĩ Shaitani aathithĩĩrie Ayubu? (b) Ayubu aathithĩrie atĩa?
11 Shaitani ataatiganĩre na Ayubu. Aakararĩrie Jehova aramwĩra: “Utamburukia njara nandi uringithie maruitu na nyama cia mwiri jwawe, wone kethira atikuruma kimbone.” Kwou Shaitani araajithia Ayubu mũrimo jũrĩ na rwakaĩ mono. (Ayubu 2:5, 7) O kaĩrĩ, Ayubu aarĩ mwĩtĩkĩkua kĩrĩ Jehova. Aaugĩre: “Ntigatiga wagiru bwakwa mwanka riria ngakua.”—Ayubu 27:5.
12. Nĩatĩa Ayubu oonanĩrie Shaitani aarĩ Mũrongo?
12 Ayubu ataijĩ kinya aniini bwegiĩ nthitango ya Shaitani kana kĩrĩa gĩatũmaga athangĩka mono. Aathũgaanagia Jehova nĩwe waamũretagĩra mĩthangĩko. (Ayubu 6:4; 16:11-14) Ĩndĩ amwe na bũu, Ayubu aakarĩre arĩ mwĩtĩkĩkua kĩrĩ Jehova. Nandĩ gũtaarĩ nkaanja. Ayubu ataarĩ mũciendi. Aarĩ mũcoore wa Mũrungu tontũ nendeete Mũrungu. Nthitango cia Shaitani cionthe ciaarĩ ũrongo!
13. Wĩtĩkĩkua bwa Ayubu bwaarĩ na maumĩra jarĩkũ?
13 Kinya kethĩra Ayubu ataijĩ ũrĩa gwaakarĩkaga ĩgũrũ, naarĩ mwĩtĩkĩkua kĩrĩ Mũrungu na aroonania Shaitani nĩ ũmũũĩ. Jehova naeere Ayubu ĩtuui tontũ bwa kwaa mũcoore mwĩtĩkĩkua.—Ayubu 42:12-17.
ŨRĨA SHAITANI AKŨTHITANGAGA
14, 15. Nthitango ya Shaitani nĩ ĩrĩkũ kĩrĩ antũ bonthe?
14 No wiritane ithoomo bia gĩtũmi mono kuumania na jarĩa jaakarĩkĩĩre Ayubu. Naarua, Shaitani augaga atĩ tũtumĩkagĩra Jehova tontũ bwa birĩa atwejaga. Kĩrĩ Ayubu 2:4 Shaitani aaugĩre: ‘Muntu oomba kurita bionthe biria ari nabio untu bwa mwoyo jwawe.’ Kwou Shaitani athitangaga antũ bonthe, tĩ Ayubu akĩ. Mĩaka magana jamaingĩ nyuma ya Ayubu gũkua, Shaitani no aarumaga Jehova na akathitanga nthũũmba ciawe. Ngerekano, kĩrĩ Njuno 27:11, tũrĩthooma: “Igwe mutanokwa, gita uume, ugwirie nkoro yakwa, nikenda mbona uria ncokerekia uria ugancara.”
15 No wonanie Shaitani nĩ mũrongo na njĩra ya kũthuura kwathĩkĩra Jehova, na kwaa mũcoore Waawe mwĩtĩkĩkua. Kinya kethĩra nũkũbatara kũthithia mogarũrũku jamanene ũtũũrone bwaku kenda waa mũcoore wa Mũrungu, rĩu nĩ rĩo ĩtua rĩrĩega nkũrũki ũũmba kũthithia! Ĩtua rĩu nĩ rĩa kũjũkua na ũrito. Shaitani augaga atĩ ũũgwe ũtĩĩthĩrwa ũrĩ mwĩtĩkĩkua kĩrĩ Mũrungu woona mathĩĩna. Ageragia gũtwaĩĩria tũtĩkae etĩkĩkua kĩrĩ Jehova. Atĩa?
16. (a) Nĩ njĩra irĩkũ Shaitani atumagĩra kũrigĩĩria antũ batĩgatumĩkĩre Jehova? (b) Nĩatĩa ũũgwe ũũmba kũrigĩĩrua nĩ Nkoma gũtumĩkĩra Jehova?
16 Shaitani natumagĩra njĩra inyiingĩ mwanya mwanya kũgeria gũtũrigĩĩria tũtĩkae acoore ba Mũrungu. Aithũkagĩra “ta ngatunyi ikugamba agicwaga muntu wa kuria.” (1 Petero 5:8) Ũkarigara acoore baaku, antũ ba nja, kana bangĩ bageria gũkũrigĩĩria kwiritana Bibiria na kũthithia jarĩa jagĩrĩte. No wigue teeka ũkwithũkĩrwa. a (Johana 15:19, 20) Shaitani kinya naciethagia “ta muraika wa weru.” Kwou no agerie gũtwaĩĩria tũtĩkaathĩkĩre Jehova. (2 Akorintho 11:14) Njĩra ĩngĩ Shaitani atumagĩra kenda tũtiga gũtumĩkĩra Jehova nĩ gũtũma tũthũgaania tũtĩng’ani gũtumĩkĩra Mũrungu.—Njuno 24:10.
ATHĨKĨRA MAWAATHO JA JEHOVA
17. Nĩkĩ twathĩkagĩra Jehova?
17 Nĩ twonanagia Shaitani nĩ mũrongo rĩrĩa twathĩkĩra Jehova. Nĩmbi ĩgatũteethia twe aathĩki? Bibiria yugaga: “Nagwe endaga Mwathani Murungu waku na nkoro yaku yonthe, na kirundu giaku kionthe, na inya yaku yonthe.” (Kuriikanithia Maathana 6:5) Twathĩkagĩra Jehova tontũ nĩ tũmwendete. O ũrĩa wendo bwetũ kĩrĩ Jehova bũgũkũra, no u tũkenda kũthithia jarĩa jonthe agũtwĩra tũthithie. Mũtũmwa Johana aandĩkĩre: “Tontu kwenda Murungu ni atiri, ni kwiingagia maathana jawe; na kwonaga jati jamarito.”—1 Johana 5:3.
18, 19. (a) Nĩ mantũ ta jarĩkũ Jehova augaga nĩ jamathũũku? (b) Nĩatĩa tũkũmenya Jehova atĩgũtwĩra tũthithie ũntũ bũrĩa tũtĩũmba kũthithia?
18 Ĩndĩ nĩ mantũ ta jarĩkũ Jehova atwĩraga nĩ jamaaĩ? Kũrĩ na jamwe kĩrĩ kathandũkũ “ Thũũra Jarĩa Jehova Athwĩre.” Rĩa mbere, no ũthũgaanie mantũ jamwe kĩrĩ jaja jatĩthũũki mono. Ĩndĩ rĩrĩa wathooma icuncĩ bia Bibiria na kũbithũgaanĩria bwega, ũkoona ũũme bwa kwathĩkĩra mawaatho ja Jehova. No woone kinya nũkũbatara kũthithia mogarũrũku ũtũũrone bwaku. Kinya kethĩra rĩonthe tĩ ũntũ bũbũũthũ, wathithia mogarũrũku jau, ũkethĩrwa na thĩĩri na kũgwĩrua kũrĩa kuumanagia na kwaa mũcoore mwĩtĩkĩkua wa Mũrungu. (Isaya 48:17, 18) Nĩatĩa tũkũmenya kũthithia mogarũrũku jaja kwombĩka?
19 Jehova atĩtwĩra tũthithie ũntũ kinya bũrĩkũ bũrĩa tũtĩũmba kũthithia. (Kuriikanithia Maathana 30:11-14) Arĩ Mũcoore wa mma, nagũtũmenya nkũrũki ya ũrĩa tũkwimenya. Naijĩ ũrĩa inya yeetũ ĩng’ana na gũtaũkĩrwa gwetũ. (Zaburi 103:14) Mũtũmwa Paũlo arĩtwĩkĩra inya: “Murungu ni wa gwitikirwa, tontu We atiumba gwitikira bugerua na magerio jaria butiumba kuumiiria, indi-ri, igita riria bukagerua agatua kubwonagiiria njira ya kwonoka nayo, nikenda buumba kuumiiria magerio jaria bukugerua najo.” (1 Akorintho 10:13) No twitĩkie buru Jehova agatwaa rĩonthe inya ya kũthithia ũrĩa kwagĩrĩte. Agakwaa ‘inya iria nene’ gũgũteethia ũũmĩĩria magiitene ja mathĩĩna.—2 Akorintho 4:7.
IRITANE KWENDA JARĨA MŨRUNGU ENDETE
20. Ũbuĩrĩte kwigerekania na nkuma irĩkũ, na nĩkĩ?
20 Kethĩra nĩtũkwenda kwaa acoore ba Mũrungu, no mwanka tũtigane na jarĩa Jehova augaga nĩ jamathũũku, ĩndĩ kinya no mwanka tũthithie nkũrũki. (Aroma 12:9) Acoore ba Mũrungu bendaga jarĩa endete. Nĩbagũtaarĩrua kĩrĩ Zaburi 15:1-5. (Thooma.) Acoore ba Jehova nĩbaigerekanagia na nkuma ciawe na nĩ bethagĩrwa na ‘wendo, kũgwĩrua, thĩĩrĩ, kũũmĩĩria, gũteethania, kũthithanĩria mantũ ja meega, gwĩtĩkania, kwinyiiyia na ningĩ muntũ kwatha mwĩrĩ jwaawe bwega.’—Agalatia 5:22, 23, Kimeru Bible, 2010.
21. Nĩatĩa ũũmba kwiritana kwonania nkuma irĩa Jehova endete?
21 Nĩatĩa ũũmba kwiritana kwonania nkuma iu inthongi? Wagĩrĩte kwiritana jarĩa Jehova endete na njĩra ya kũthooma na kwiritana Bibiria rĩonthe. (Isaya 30:20, 21) O ũrĩa ũkũthithia ũu, wendo bwaku kĩrĩ Jehova bũgakũra, na o ũrĩa wendo bwaku kĩrĩ we bũgũkũra, ũkenda kũmwathĩkĩra.
22. Maumĩra ja kwathĩkĩra Jehova nĩ jarĩkũ?
22 Mogarũrũku jarĩa ũkũbatara kũthithia ũtũũrone bwaku joomba kũgerekanua na kũrita nguũ inkũrũ na gwĩkĩra injerũ. Bibiria yugaga nũbateere kũrita “mwiri juria jwa karaja” na gwĩkĩra “mwiri jungi jumweru.” (Akolosai 3:9, 10) Kinya kethĩra tĩ bũbũũthũ, twathithia mogarũrũku jaja na twathĩkĩra Jehova, nekĩte wĩrane agatwaa “itui riinene.” (Zaburi 19:11) Thuura kwathĩkĩra Jehova wonanie Shaitani nĩ mũrongo. Tumĩkĩra Jehova nĩũntũ bwa wendo bwaku bwa mma, ĩndĩ tĩ ũntũ bwa ĩtuui rĩa kagiita keejĩte. Rĩu ũkaa mũcoore wa mma wa Mũrungu!
a Kũũ tĩ kuuga Shaitani nĩwe ũgũtongeeria antũ barĩa bakũgeria gũkũrigĩĩria wiritana Bibiria. Ĩndĩ Shaitani nĩwe “murungu jwa nthiguru iji,” na “nthiguru iji yonthe niujuritwe ni inya [yaawe].” Kwou tĩ ũntũ bwa kũrigaria antũ bamwe bageria gũtũrigĩĩria tũtĩgatumĩkĩre Jehova.—2 Akorintho 4:4; 1 Johana 5:19.
