Laḡani 1995 ai UNESCO Declaration of Principles on Tolerance na e gwa: “Tanobada ai maino baine vara totona namona na taunimanima ese ma haida edia kara bae haheaukalai, bona edia lalohadai bae abi dae.”

 To bema taunimanima na haida edia kara basie haheaukalaimu, bona edia lalohadai basie abi daemu, una ese hemataurai lasi karadia be havaramu, bona be heiriheirimu. Kara unu bamodia ese nega momo badu bona daḡedaḡe e havaramu.

 Taunimanima momo edia lalohadai na idauidau. Haida na e gwaumu herevana taunimanima haida na dahaka bae kara, bavabia dae mo. A haida be Baibul ena lalohadai e abia daemu, idia na dibadia ta ta na mai ena ura kwalimu, bona ena be idia e karamu abi hididia na idia ese asie abi daemu, to ta ta ena abi hidi e matauraiamu.

 Iseda nega ai Baibul ese taunimanima be durudiamu haida edia kara bona lalohadai bae haheaukalai totona, a?

Baibul ena hereva be dahaka?

 Baibul na e gwaumu: “Emui lalo-manau na taunimanima iboudiai bae diba.” (Filipi 4:5) Baibul ese e hagoadadamu ma haida edia namo baita lalo, baita kara namo henidia, bona baita matauraidia. Una sisiba e badinaiamu taudia na ma ta e karamu ḡaudia na reana se abi daemu, to e rakataniamu sibona ena abi hidi heḡereḡerenai karadia e karamu.

 To Baibul ese e hahedinaraiamu bema taunimanima na Dirava e ato taravatudia bae badina, namo bae davari. Baibul na e gwa: “[Dirava] ese vada e hamaoromu, kara namona be dahaka.” (Mika 6:8) Baibul na Dirava ena hahekau herevadia e herevalai ḡoevaḡoeva, bona unu ese taunimanima baine durudia mauri namona bae moalelaia helaoreana.​—Isaia 48:17, 18.

 Dirava ese ita na maoro se henida haida baita hahemaoro henidia. Baibul na e gwaumu: “Tarava iatuna tauna bona hahemaoro tauna be tamona mo  . . A oi be daika, dekemu tauna na o hahemaoro heniamu?” (Iakobo 4:12) Dirava ese ita ta ta na ura kwalimu e henida siboda eda abi hidi baita kara, bona madunadia na siboda ese baita huamu.​—Deuteronomi 30:19.

Hemataurai karana ai Baibul be dahaka e gwaumu?

 Baibul na e gwaumu, “taunimanima iboudiai ba matauraidia.” (1 Petro 2:17, New Jerusalem Bible) Una dainai, Baibul ena haheḡani e badinamu taudia ese taunimanima iboudiai e matauraidiamu, ena be e abi daemu ḡaudia, eiava edia mauri daladia na i’idau. (Luka 6:31) To bema haida na e abi daemu ḡaudia, eiava edia lalohadai, bona edia disisen na dia Baibul ena hereva heḡereḡerena, Dirava e badinaiamu taudia ese unu na asie abi daemu. Danu e uramu Iesu bae tohotohoa dainai mai hematauraidia ida taunimanima e kara henidiamu.

 Heḡereḡere, Iesu ese hahine ta e hedavari henia, bona ia ese e badinaiava tomadihona na Iesu ese se abi daeva. Danu una hahine na tau ta, dia ia adavana, ida e noho hebouva, bona Iesu ese una kara na se abia dae. To, Iesu na mai hematauraina ida una hahine e hereva henia.​—Ioane 4:9, 17-24.

 Iesu e kara heḡereḡerena, Kristen taudia ese e abi daemu ḡaudia badidia na e uramu bae kamonai taudia ediai e herevalai hedinarai namonamomu bona ‘mai hematauraidia ida’ unu e kara tomamu. (1 Petro 3:15) Baibul ese Kristen taudia na e hadibadiamu, namona na haida basie doridia edia lalohadai bae abi dae. Baibul na ma e gwa, Keriso e badinaiamu tauna na “basine heai, a taunimanima iboudiai baine gado namo henidia,” tomadiho idauidau taudia danu.​—2 Timoteo 2:24.

Inai heheni karana ai Baibul be dahaka e gwaumu?

 Baibul ese e hamaorodamu “maino ba ḡavaia, taunimanima iboudiai ida.” (Heberu 12:14) Maino e ḡavaiamu tauna ese inai heheni karana e dadaraiamu. Ia e karamu ḡaudia na dia ia sibona ena namo e laloamu, to e hekwarahimu ma haida ida maino ai baine noho totona. (Mataio 5:9) Danu, Baibul ese Kristen taudia e hagoadadiamu inaidia bae lalokau henidia, una na edia kara namodia amo bae hahedinaraia.​—Mataio 5:44.

 Baibul na e gwaumu, taunimanima ese ma haida e hadikadiamu eiava e hahisidiamu karadia na Dirava ese e “inai henidiamu,” eiava e “badulaidiamu.” (Hereva Lada-Isidia 6:16-19) Baibul ese ina hereva “inai henidiamu” e ḡaukaralaia, anina na unu kara dikadia na se ura henidia vaitanimu. Baibul ese e hahedinaraiamu, e uramu edia kara bae haidau bona Dirava ena taravatu bae badinadia taudia na ia ese baine durudia bona edia dika baine gwautao diba.​—Isaia 55:7.

Taunimanima baita kara henidia daladia bona imatauraidia Baibul siridia

 Tito 3:2: ‘Ba manau; taunimanima iboudiai ba kara namo henidia.’

 Mataio 7:12: “Taunabunai, ḡau iboudiai umui ba ura taunimanima ese bae kara henimui, umui ese unu ba kara henidia toma.”

 Iosua 24:15: “Hari ina dina ai ba haeroa, daika isiaina ba lao heni.”

 Aposetolo Edia Kara 10:34: “Dirava ese taunimanima oromadia se lalomu.”

 Habakuku 1:12, 13: ‘[Dirava na] kara dika basine itaia bona kara kerere basine raraia diba.’

 Roma 12:19: “[Dirava ena] badu baine mia. Badina be vada e torea, Lohiabada eto ‘Dava be lau imagu ai, lau ese baina karaia.’”

 Iehova Dirava ese ta na maoro se henia dika davana baine haloua. Badina nega maoronai Ia ese hahemaoro maorona baine karaia. Diba ma haida bavabi totona, ina atikol “Will the Cry for Justice Be Heard?” ba duahia.