Deuteronomi 6:1-25
6 Haheḡani bona taravatu bona hahemaoro herevadia Iehova, emui Dirava, ese e henigu, baina hadibalaimui, bena ba raka hanai, emui tano ai ba halaoa tanona ai ba badinadia.
2 Bena Iehova, emu Dirava, garina ba gari, ena taravatu bona ena haheḡani, na henimumu ḡaudia, iboudiai ba badinadia, oi bona natumu bona tubumu, emu mauri dinadia iboudiai; unu amo emu mauri dinadia bae hoho.
3 Taunabunai, Israel e, a kamonai, bona nahuamui ba toho; bena ba namo bona ba hutuma, rata bona bada-ranuna e arumu tanona ai, Iehova, tamamui edia Dirava, vada e gwau henimui hamata heḡereḡerena.
4 Israel e, a kamonai: Iehova na eda Dirava, Iehova mo sibona.
5 Iehova, emu Dirava, ba lalokau henia mai lalomu idoinai, mai laumamu idoinai, bona mai goadamu idoinai.
6 Ini hereva, hari dina ai na haḡanilaimumu herevadia, na lalomu ai do bae mia;
7 natumu danu ba hadibalaidia mai goadamu ida; ruma ai ba helai negadia ai, bona dala ai ba raka negadia ai, bona ba hekure negadia ai, bona ba tore isi negadia ai, ba herevalaidia.
8 Idia na toa ai ba halaodia, imamu ai bona bagumu ai.
9 Emu iduara ihua-ihuana kahana kahana audia ai ba tore, bona emu ikoukou ai danu ba tore.
10 Iehova, emui Dirava, ese senemui Abraham bona Isaak bona Iakob e gwau henidia hamata baine henemui eto tanona, ai baine hakaumui vareai; unuseni ai hanua badadia bona namodia, umui ese asio daidia,
11 bona ruma, kohu namodia amo e honu umui ese asio habou, bona ranu guridia, umui ese asio ḡei, bavabi; bona vine imeadia bona olive audia umui ese asio hadodia na anidia bavani boga kunu.
12 Una negana ai nahuamui ba toho, Iehova ba reaia na garina; ia ese Aigupto taudia edia tano bona edia iḡui rumana amo e hakaumui lasi.
13 Iehova, emui Dirava, garina ba gari; ia isiaina ba lao heni; ia ladana ai ba gwau hamata.
14 Idau dirava, hetabira tanodia ai e nohomu besedia edia dirava, basio toma henidia diho;
15 badina be Iehova, emui Dirava, bogaragimui ai e nohomu Diravana, na vaḡeḡe Diravana. Ba heita, Iehova, emui Dirava, ena badu na emui ai baine siahu bena tanobada kopina amo baine habuamui tari na garina.
16 Iehova, emui Dirava, na basio dibaḡania, Masa ai o dibaḡania heḡereḡerena.
17 Iehova, emui Dirava, ese ena haheḡani bona ena hahedua bona ena taravatu vada e henimui: ba badinadia mai goadamui ida.
18 Kara maoromaorodia bona kara namodia ba kara, Iehova vairanai; bena ba namo, ba raka vareai, tano namona, Iehova ese e gwau hamata senemui baine henidia eto tanona, bavabia, emui tano ai ba halaoa;
19 bona inaimui iboudiai na vairamui ai ba luludia lasi, Iehova ena gwauhamata heḡereḡerena.
20 Nega gabena ai natumu ese baine nanadaimu, baineto “Ini haheḡani bona hahedua bona taravatu Iehova, eda Dirava, ese vada e henida anidia be dahaka?”
21 Bena oi ese natumu ba haere henia, baoto: Ai na Farao isiaina a lao heniva Aigupto ai; bena Iehova ese ia imana siahuna amo e hakaumai lasi, Aigupto tanona amo;
22 una negana ai Iehova ese toa bona hoa karadia, babada bona memetau, e hahedinarai, Aigupto Iatanai bona Farao Iatanai bona Farao ena ruma taudia latadiai, ai vairamai ai.
23 Unu amo e hakaumai lasi, seneda e gwau henidia hamata baine henidia eto tanona ai baine hakaumai vareai bona baine henimai helaoreana.
24 Bena Iehova ese e haḡanimai, ini taravatu iboudiai baia badinadia, bona Iehova, eda Dirava, garina baia gari, baia namo hanaihanai bona baine hamaurimai helaoreana, hari dina ai e hamauridamu heḡereḡerena.
25 Eda kara maoromaoro binai, ina haheḡani idoinai baita badinaia Iehova, eda Dirava, vairanai, vada e haḡanilaida heḡereḡerena.
