Efeso 1:1-23
1 Lau Paulo, Keriso Iesu ena aposetolo taugu, Dirava ena ura dainai, helaḡa taumui Efeso ai, Keriso Iesu o abidadama heniamu taumui, na tore henimuimu:
2 Harihari-bada bona maino, Tamada Dirava ena amo bona Lohiabada Iesu Keriso ena amo, bavabi.
Ihamaurimui dalana
3 Dirava, eda Lohiabada Iesu Keriso Tamana, aita hanamoa: ia ese Keriso lalonai Lauma ena hahenamo iboudiai guba ai e miamu ḡaudia na vada e hanamolaida.
4 Tanobada do se karaia negana ai, Dirava ese Keriso lalonai e abida hidi, ia vairanai helaḡa tauda ai bona asi bebeka-bebekada tauda ai baitala helaoreana. Ena lalokau dainai
5 ia ese lalona e hadaia guna, ia natuna ai baine halaoda Iesu Keriso dainai. Ina na ena ura namona heḡereḡerena.
6 Ena harihari-bada ḡoeva-daena, ina na ena lalokau tauna ai vada e hataḡalaida hariharina, dainai baita imodaia.
7 Ia lalonai hahemauri vada ta abiamu, ia rarana dainai, bona eda dika vada eme hegwau tao. Ina na ena harihari-bada ḡoeva-daena
8 vada e habada iseda ai.
9 Badina be ena aonega ai bona ena lalo-parara ai, Dirava ese ena lalohadai hehunidia vada e hadibada, ena ura namona Keriso lalonai e rataia heḡereḡerena,
10 negadia bae ḡuḡuru ai na ḡau iboudiai, guba ḡaudia bona tanobada ḡaudia, Keriso ai baine haboudia helaoreana.
11 Badina be Dirava ese ḡau iboudiai na ena lalohadai heḡereḡerena e karamu. Bona matamana negana ai Dirava ese e gwauraimai hidi, ena ura ihaḡuḡuruna.
12 Taunabunai ai Keriso a laroa gunava taumai ese ia hairaina baia heatolaia.
13 Ia lalonai danu umui ese hereva momokanina, emui hahemauri sivaraina namona, o abia dae. Umui ese danu Keriso o abidadama henia bona Dirava ese ia toana e henimui, Lauma Helaḡa, e gwaurai hamata Laumana, bunai.
14 Toana bunai, ita ese ahuda baita abia Dirava ena gwauhamata heḡereḡerena, bona ia ese ena taunimanima baine hamauridia. Ia hairaina baita heatolaia hebou.
Dirava na ḡuriamu daimui ai
15 Badina bunai, Lohiabada Iesu Keriso o abidadama heniamu bona helaḡa taudia iboudiai o lalokau henidiamu sivaraina na kamonai dainai,
16 egu Dirava ihanamona na asi dokona daimui ai. Bona daimui ai na ḡuriḡurimu,
17 eda Lohiabada Iesu Keriso ena Dirava, Tamada herea-daena, ese aonega bona lalo-parara laumana baine henimui, bena ienai ba manada.
18 Lalomui matadia danu baine hapapa, bena ena boiboi helarona bona ahuna herea-daena, davana bada ḡauna helaḡa taudia edia, vada ba diba.
19 Iena siahu badana bona ena goada hereadaena ita kamonai tauda edai danu ba diba.
20 Siahuna bunai Keriso enai e hedinarai: ia ese mase amo e hatorea isi, guba ai vada e abia dae, ia idibana kahana ai e hahelaia.
21 Keriso na ḡaubada iboudiai daediai, gavana iboudiai daediai, siahu taudia iboudiai daediai, lohia iboudiai daediai; ia ladana danu lada iboudiai, ina mauri ai bona mauri gabena ai, e hereadiamu.
22 Dirava ese ḡau iboudiai ia aena palapaladia henudiai e ato, bona ḡau iboudiai ikwaradia ai vada e halaoa, ekalesia lalonai.
23 Ekalesia na Keriso tau-anina; ḡau iboudiai e haḡuḡurumu Tauna ihaḡuḡuruna.
