Genese 2:1-25
2 Unuhetomana guba bona tanobada mai anidia idoidiai vada e kara ḡuḡuru.
2 Dina ihahituna ai, Dirava ese ena ḡaukara idoidiai e hadokodia: dina ihahituna ai ia ese ena ḡaukara iboudiai e ato diho, e laḡa ani.
3 Bena Dirava ese dina ihahituna e hanamoa bona e hahelaḡaia: badina be una dina ai ena ḡaukara iboudiai e ato diho, e laḡa ani.
Adam
4 Guba bona tanobada ikaradia herevadia bini: ihavaradia negana ai Dirava Iehova ese tanobada bona guba e karava dinana ai,
5 uda audia ta be tanobada ai do se miava, aniani avadia ta do se vara; badina be Dirava Iehova ese medu tanobada ai do se hadihoa, asi tauna danu tano ibiru-henina.
6 A varahu be tanobada amo eme dae, tano kopina idoinai vada eme hapariparia.
7 Bena Dirava Iehova ese taunimanima tano ḡahuna amo e karaia, mauri laḡana ia uduna matudia ai e hahoho dobi, taunimanima na mauri tauna ai e halaoa.
8 Dirava Iehova ese imea ta e karaia, ladana Eden,* mairiveina kahana ai, bena vada e karaia tauna unuseni ai e atoa, baine noho.
9 Dirava Iehova ese au danu tano ai e havaradia, ita-itadia bona ianidia nanamo audia iboudiai; mauri auna danu imea bogaraginai, namo bona dika idibalaida auna danu.
10 Eden imeana amo sinavai ta e aru ela, imea e hapariparia; e aru parara, sinavai hani ai ela.
11 Ginigunana ladana na Pison; ia be Havila tanona e arua heḡeḡe: una tano ai gold e davariamu,
12 gold namo-hereana; bedolak* bona onuku nadidia danu unuseni ai.
13 Sinavai iharuana ladana na Gihon: una sinavai be Etiopia tanona e arua heḡeḡe.
14 Sinavai ihatoina ladana na Tigris: ia be Asuria tanona mairiveina kahana amo e aru Iaomu. Sinavai ihahanina na Eufrate.
15 Dirava Iehova ese hari tau e abia, Eden imeana ai e atoa, ia ese baine biru henia bona baine reḡua.
16 Dirava Iehova ese hari tau e haduaia, eto, Imea audia iboudiai huahuadia bavani, emu ura heḡereḡerena;
17 a namo bona dika idibalaidia auna huahuana una mo basio ania; badina be ia bavania dinana ai oi na ba mase vaitani.
18 Dirava Iehova ma eto, Hari tau na sibona baine noho na dia namo; lau ese ia bamona aina karaia.
19 Bena Dirava Iehova ese tano amo tanobada boromadia iboudiai e karadia, bona atai manudia iboudiai danu. Bena ia ese hari tau, Adam, vairanai e hakaudia, baine diba ia ese ladadia ede baine hato toma: mauri ḡaudia iboudiai ta ta Adam ese ladadia e hato.
20 Taunabunai, Adam ese boromakau iboudiai ladadia e hato, bona atai manudia bona tanobada boromadia danu; a Adam na asi bamona ta ia baine durua.
21 Bena Dirava Iehova ese Adam e hamahutaia hedavauhe. Bena ruduna turiana ta e abia lasi, turia gabuna be hidio ai e daia ahu.
22 Bena Dirava Iehova ese Adam ena amo e abia lasi turiana na hahine ta e karalaia, Adam dekena e laohaia.
23 Bena Adam eto, Ina na turiagu turiana bona hidiogu hidiona: ladana bae hatoa Hahine, badina be Tau ena amo vada e abia lasi.*
24 Badina bunai tau ese tamana sinana baine rakatanidia, adavana baine badinaia, raruosi na anidia tamona ai baela.
25 Idia raruosi, Adam mai adavana ida, na asi edia riorio ḡaudia, to asie hemaraiva.
Footnotes
^ “Eden” anina be “moale”.
^ “bedolak” bona “onuku” be nadi ladadia.
^ Heberu gadodia ai “tau” bona “hahine” na dia hereva idau-idau, Motu gado ai na heto; “tau” be “ish”, “hahine” be “isha”. Una dainai Adam eto, “Ladana” bae hatoa “Isha” badina be “ish” ena amo vada e abia lasi.
