1. Dahaka dainai aneru baita dibadia na namo?

NEGA momo ta ba dibaia totona, ena ruma bese danu ba dibadia na namo. Una heḡereḡerena, Iehova Dirava baita dibaia totona ia natuna gubai baita dibadia danu na namo. Baibul ese aneru na e gwauraidiamu “Dirava natuna.” (Iobu 38:7) Una dainai, Dirava ena ura ikarana ai aneru edia ḡaukara be dahaka? Guna aneru ese taunimanima e durudiava, eiava? Aneru ese oi e durumumu, eiava? Bema oibe, edena dalai?

2. Aneru be daika ese e karadia, bona idia be hida?

² Baibul ese aneru na nega momo e herevalaidia. Mani unu sivarai haida aita herevalai, unu amo aneru baita dibadia namonamo. Daika ese aneru e karadia? Kolose 1:16 [Nega Matamata Baibel] na e gwaumu: “Badina ia [Iesu Keriso] amo Dirava ese ma ḡau iboudiai guba ai bona tanobada ai e havara.” Una dainai, Iehova ese Natuna vara-edeana ena amo aneru ta ta e karadia. Aneru be hida? Baibul ese e hahedinaraiamu aneru milioni momo e karadia, bona idia na mai edia goada eiava siahu.​—Salamo 103:20; Apokalupo 5:11.

3. Iobu 38:4-7 ese aneru be ede e herevalaidia toma?

³ Baibul na e gwaumu tanobada e karaia matama neganai,  “Dirava natuna loḡora na mai moaledia” ida “e lolo bou.” (Iobu 38:4-7) Una dainai Dirava ese taunimanima bona tanobada do se karadia neganai aneru na da e nohova. Ina siri ese danu e hahedinaraiamu aneru na mai edia hemami, badina e gwaumu idia na “mai moaledia” ida “e lolo bou.” Mani a laloa “Dirava natuna loḡora” na e moale hebou. Una negai, aneru iboudiai na ruma bese ta na heto, mai lalotamonadia ida Iehova Dirava e hesiai heniava.

4. Edena dalai Baibul ese e hahedinaraiamu aneru ese taunimanima na e lalodia badamu?

⁴ Kamonai anerudia na Dirava ese taunimanima ginigunadia e havaradia negana amo, taunimanima e hutuma e laova karana bona Dirava ena ura baine ḡuḡuru karana na e lalodia badava. (Hereva Lada-isidia 8:30, 31; 1 Petro 1:11, 12) To gabeai, aneru ese e itaia, taunimanima ese Ihavaradia Tauna lalokauna na asie hesiai henia. Una dainai kamonai anerudia na e lalohisihisi. To danu, bema ta na Iehova e lou heniamu, aneru na ‘e moalemu.’ (Luka 15:10) Aneru ese Dirava ena hesiai taudia na e lalodia badamu dainai, Iehova ese idia na e ḡaukaralaidia louloumu tanobadai ena abidadama hesiai taudia bae hagoadadia bona bae naridia. (Heberu 1:7, 14 ba duahi.) Mani haheitalai haida aita itadia.

5. Baibul lalonai aneru edia heduru sivaraidia haida be dahaka?

⁵ Sodoma bona Gomora hanuadia ihadikadia neganai, aneru rarua ese kara maoromaoro tauna Lot bona natuna raruosi e durudia bae roho mauri totona. (Genese 19:15, 16) Laḡani handred haida muridiai, peroveta tauna Daniel na leona guridiai e tahoa dobi, to se bero bona ia na e gwa: “Egu Dirava ese ena aneru ta e siaia mai, bena ia ese leona ududia e hakapudia.” (Daniel 6:22) Aposetolo edia negai, aneru ta ese Petro na dibura ruma amo e ruhaia. (Kara 12:6-11) Danu, Iesu ese ena hesiai ḡaukara tanobadai baine  hamatamaia neganai aneru ese e hagoadaia. (Mareko 1:13) Iesu do se mase neganai, aneru ta na Iesu enai e hedinarai “ihagoadana totona.” (Luka 22:43) Unu mai anidia bada negadiai, aneru edia heduru ese Iesu na e hagoadaia bada!

6. (a) Hari ina negai edena dalai aneru ese Dirava ena hesiai taudia e durudiamu? (b) Ededia henanadai baita herevalaidiamu?

⁶ Hari, aneru na tanobadai Dirava ena hesiai taudia vairadiai se hedinaraimu. Ena be taunimanima ese na asie itadiamu, to Dirava ena aneru goadadia ese iena taunimanima na e gimadiamu, ḡau ta ese edia hetura karana Dirava ida basine hadikaia totona. Baibul na e gwaumu: “Iehova ena aneru e taruhamu, ia garina e garimu taudia e ḡeḡedia ahumu, bona e hamauridiamu.” (Salamo 34:7) Dahaka dainai una hereva ese e hagoadadamu? Badina aneru dikadia na e uramu ita bae hadikada! Idia be daidia? Ede amo ema? Edena dalai e uramu ita bae hadikada? Una baita diba totona, matamana neganai e vara ḡauna ta mani aita herevalaia.

7. Satana ese taunimanima iboudiai Dirava ena amo e hakaudia siri, eiava?

⁷ Ina buka ena Karoa 3 ai ta dibaia heḡereḡerena, aneru ta na e urava taunimanima baine lohiadia dainai Dirava e gwau-edeede henia. Gabeai una aneru na Satana Diabolo ai ela. (Apokalupo 12:9) Laḡani 1,600 gunanai, ia ese Heva e koia murinai, kahirakahira taunimanima iboudiai na Dirava ena amo e hakaudia siri, to haida na Dirava e abidadama henia, heḡereḡere Abel, Enok, bona Noa.​—Heberu 11:4, 5, 7.

8. (a) Aneru haida be edena dalai demoni ai ela? (b) Noa ena negai demoni na Utu-utu amo bae roho mauri totona, dahaka e kara?

⁸ Noa ena negai, aneru haida ese Iehova e gwau-edeede henia. Idia ese edia gabu korikori, guba, e rakatania bena tanobadai taunimanima ai ela. Dahaka dainai? Genese 6:2 na e gwaumu: “Dirava natuna verina ese taunimanima natudia  hahinedia e itadia, i’itadia nanamo; bena e ura henidia ulatodia na e adavadia.” To Iehova Dirava ese unu aneru edia kara bona taunimanima edia kara dika na se moalelaidia. Dirava ese tanobadai utu-utu badana amo kara dika taudia iboudiai e hamasedia, to iena kamonai hesiai taudia mo e hamauridia. (Genese 7:17, 23) Una dainai, unu gwau-edeede anerudia, eiava demoni, na tauanidia e rakatani bona lauma taudia ai guba ela. Idia ese Diabolo e durua, una dainai ia na “lauma dikadia edia lohia” ai ela.​—Mataio 9:34.

9. (a) Demoni na guba e lou lao neganai, dahaka e vara? (b) Paragraf gabediai dahaka baita herevalaimu?

 ⁹ Gwau-edeede anerudia na guba e lou lao neganai, Dirava ese e dadaraidia, edia lohia, Satana heḡereḡerena. (2 Petro 2:4) Ena be idia na taunimanima ai ma basie lao lou dibamu, to dounu taunimanima na e hakaudia kereremu. Oibe, demoni edia heduru dainai Satana ese “tanobada idoinai e koiamu.” (Apokalupo 12:9; 1 Ioane 5:19) Edena dalai? Demoni ese dala idauidau amo taunimanima e koidiamu. (2 Korinto 2:11 ba duahia.) Unu dala haida mani aita herevalai.

10. Babalau karadia be dahaka?

¹⁰ Demoni ese babalau karadia amo taunimanima e koidiamu. Babalau karadia e karamu taudia na demoni ida e ḡaukara heboumu, idia sibodia eiava babalau tauna ta amo demoni e hereva henidiamu. Baibul ese babalau karadia na e gwauraidia dikamu bona e hadibadamu unu kara na baita dadaraidia. (Galatia 5:19-21) Demoni ese babalau karadia e ḡaukaralaimu, kimai taudia ese guma e ḡaukaralaimu na heto. Kimai tauna ese guma idauidau e ḡaukaralaimu gwarume idauidau baine veridia totona. Una heḡereḡerena, lauma dikadia ese babalau karadia idauidau e ḡaukaralaimu taunimanima idauidau bae biagudia totona.

11. Mari karana be dahaka, bona dahaka dainai baita dadaraia na namo?

¹¹ Demoni ese e ḡaukaralaiamu koikoi dalana ta na, mari karana. Mari karana be dahaka? Ia na vaira negana eiava hehuni ḡauna idibana karana. Mari karadia e karamu taudia ese au kopidia, raudia, buatau, kasi bona toni e ḡaukaralaimu, bona toa eiava nihi anidia e tahumu. Ena be momo na e laloamu mari karadia na dia dika, to Baibul ese e hahedinaraiamu vaira neganai bae vara ḡaudia e herevalaimu taudia bona lauma dikadia na e ḡaukara heboumu. Heḡereḡere, Kara 16:16-18 na e gwaumu “babalau laumana” ta  ese kekeni ta e boloa dainai vaira neganai bae vara ḡaudia e gwauraiva. To, una lauma na ia amo e lasi neganai, kekeni ena siahu na e ore.

12. Dahaka dainai mase taudia ida herevahereva karana na mai ena dika?

¹² Demoni ese taunimanima e koidiamu dalana ma ta na, e hagoadadiamu mase taudia ida bae herevahereva. Edia lalokau tauna ta e mase dainai e lalohisihisimu taudia na, mase taudia daidiai e varamu lalohadai kereredia ese e koidiamu. Babalau tauna ta ese reana mase tauna ena ura ḡaudia be gwauraimu eiava gadona be tohotohoamu. Una dainai, taunimanima momo na e abia daemu mase taudia na mamauri bona bae hereva henidia karana amo bae durudia edia lalohisihisi bae haheaukalai. To una heduru na koikoi bona mai ena dika. Dahaka dainai? Badina demoni ese mase tauna gadona bae tohotohoa diba bona babalau tauna ena amo mase tauna sivaraina bae gwauraia diba. (1 Samuel 28:3-19) Danu, Karoa 6 ai da ta diba, mase taudia na dia mamauri. (Salamo 115:17) Una dainai, ‘mase taudia  e hahanediamu’ taudia na lauma dikadia ese e koidiamu bona Dirava ena ura e dadaraiamu. (Deuteronomi 18:10, 11 ba duahi; Isaia 8:19) Una dainai, ina demoni ese e ḡaukaralaimu dalana baita dadaraia na namo.

13. Lauma dikadia garidia e gariva taudia momo edia hemami be ede bamona?

¹³ Lauma dikadia ese taunimanima na e koidiamu bona e hagaridiamu. Hari ina negai, Satana bona ena demoni na mai dibadia edia nega na da “kwadogi” dainai, edia kara havara na e habadaiamu, dia guna heḡereḡerena. (Apokalupo 12:12, 17) To, lauma dikadia ese guna e hagaridiava taudia tausen momo hari na asie garimu. Dahaka dainai asie garimu? Babalau karadia dounu e karamu tauna be dahaka baine kara diba?

14. Efeso Kristen taudia heḡereḡeredia, ita be edena dalai lauma dikadia baita dadaraidia diba?

¹⁴ Baibul ese lauma dikadia baita dadaraidia bona edia siahu amo baita raka oho daladia na e herevalai. Aposetolo edia negai, Efeso hanuanai e vara sivaraina mani aita laloa. Haida na Kristen taudia ai do asi ela neganai babalau karadia e karava. Lalodia e hadai babalau karadia bae rakatani neganai, dahaka e kara? Baibul na e gwaumu: “Babalau taudia dia gagadoi edia buka e habou, taunimanima iboudiai vairadiai e gabu.” (Kara 19:19) Unu Kristen taudia ese edia buka e gabudia karana na haheitalai namona, hari e uramu lauma dikadia bae dadaraidia taudia ediai. E uramu Iehova bae hesiai henia taudia ese babalau ḡaudia iboudiai bae nege na namo. Anina na babalau bukadia, magasin, muvi, laulau, miusik, bona henari ḡaudia, heḡereḡere toni bona unu bamona ḡaudia ma haida bae negedia.​—1 Korinto 10:21.

15. Lauma dikadia baita dadaraidia totona, dahaka baita kara na namo?

¹⁵ Efeso Kristen taudia ese edia babalau bukadia e gabu  bena laḡani haida muridiai, aposetolo Paulo na e gwa: ‘Ita na lauma dikadia guba gabudia ai ida ta tuarimu.’ (Efeso 6:12) Demoni na asie hesikuva. Dounu e urava taunimanima iboudiai bae biagudia. Una dainai, unu Kristen taudia be dahaka bae kara na namo? Paulo na e gwa: “Nega idoinai abidadama kesina bavabia kau, unu amo Tau Dikana [Satana] ena diba lahidia ba habodo diba.” (Efeso 6:16) Iseda abidadama baine goada neganai, lauma dikadia na baita dadaraidia dibamu.​—Mataio 17:20.

16. Edena dalai eda abidadama baita hagoadaia diba?

¹⁶ To, edena dalai eda abidadama baita hagoadaia diba? Baibul baita stadilaia karana amo. Haba ta na baine gini auka totona, ia badina baine goada na namo. Una heḡereḡerena, eda abidadama badina​—Baibul amo ta abiamu diba maoromaorona​—baita hagoadaia na namo. Bema hanaihanai Baibul baita duahia bona baita stadilaia, eda abidadama na be goadamu. Haba goadana heḡereḡerena, abidadama goadana ese lauma dikadia edia siahu amo be gimadamu.​—1 Ioane 5:5.

17. Dahaka baita kara na namo, lauma dikadia baita dadaraidia totona?

¹⁷ Efeso Kristen taudia be ma dahaka bae kara na namo? Ta ese dounu baine gimadia na namo, badina e noholaiava hanuana na demoni karadia amo e honu. Una dainai Paulo ese e hamaorodia: “Ḡuriḡuri . . . ba gwaurai, nega idoinai.” (Efeso 6:18) Ita danu, demoni karadia amo e honu tanobadanai ta nohomu dainai, ḡau badana na mai momokanida ida Iehova ena hegima baita noia, unu amo lauma dikadia baita dadaraidia. Momokani, namona na eda ḡuriḡuri lalonai Iehova ladana baita ḡaukaralaia. (Hereva Lada-isidia 18:10 ba duahia.) Namona na Dirava baita noia “Tau Dikana” Satana Diabolo ena amo ‘baine hamaurida.’ (Ioane 17:15) Iehova ese unu bamona ḡuriḡuridia na be haerelaidiamu.​—Salamo 145:19.

18, 19. (a) Dahaka dainai ta dibamu lauma dikadia idadaraidia karanai baita kwalimumu? (b) Edena henanadai na gabe karoana ese be haerelaiamu?

 ¹⁸ Lauma dikadia na mai siahudia, to garidia na basita garimu bema Diabolo baita dadaraia bona Dirava baita raka henia kahi totona iena ura baita karaia. (Iakobo 4:7, 8 ba duahi.) Lauma dikadia edia siahu na mai hetoana. Noa ena negai Dirava ese e panisidia, bona edia hahemaoro dokona e nariamu. (Iuda 6) Danu ba helalotao, ita na Iehova ena aneru goadadia ese e gimadamu. (2 Hanua Pavapavadia 6:15-17) Unu aneru na e ura dikadikamu ita na lauma dikadia idadaraidia karana ai baita kwalimu. Idia ese ita na e hagoadadamu. Una dainai, namona na Iehova bona ena kamonai anerudia edia henari henunai baita noho. Danu, namona na babalau karadia iboudiai baita dadaraidia bona hanaihanai Dirava ena Hereva amo e maimu sisibadia baita badinadia. (1 Petro 5:6, 7; 2 Petro 2:9) Bena lauma dikadia idadaraidia karanai baita kwalimu dibamu.

¹⁹ To, dahaka dainai Dirava ese lauma dikadia bona taunimanima e hahisidiamu gwau-edeede karadia na se koudiamu? Una henanadai na gabe karoana ese be haerelaiamu.