Dirava momokanina ese ḡau iboudiai e karadia. Ia na asi matamana bona asi dokona. (Salamo 90:2) Ia na Baibel amo sivarai namodia e halasimu Diravana. (1 Timoteo 1:11) Dirava ese e havarada dainai, ia mo sibona baita toma henia diho.​—Apokalupo 4:11 duahia.

Dirava na Lauma dainai, ia ese ita tanobada tauda na e hereada, bona basita itaia diba. (Ioane 1:18; 4:24) To, Ia ese e kara ḡaudia amo iena kara baita dibadia. Heḡereḡere, flaoaflaoa, bona vaivai o unu bamona au huahua idauidau ta itamu neganai, ta dibamu Dirava na mai ena lalokau bona mai ena aonega. Danu, guba bona tanobada edia bada ta itamu neganai, ta dibamu Dirava na mai ena siahu.​—Roma 1:20 duahia.

Baibel iduahina karana amo danu, Dirava ena kara baita dibadia. Heḡereḡere, Dirava e ura henimu bona se ura henimu ḡaudia, Ia ese taunimanima e kara henidiamu daladia, bona taunimanima edia kara heḡereḡeredia ai davadia e henimu daladia, unu na Baibel amo baita dibadiamu.​—Salamo 103:7-10 duahidia.

Iesu eto: “Tamamai e, guba ai o nohomu, oi ladamu baia hahelaḡaia.” (Mataio 6:9) Ena be Dirava ena dagi ladadia na momo, to Ia ladana korikorina na tamona. Taunimanima edia gado ta ta ai, una lada e gwauraimu daladia na idauidau. Motu gado ai be ta gwaumu, “Iehova.” To, haida be e gwaumu, “Yahweh.”​—Salamo 83:18 duahia.

Haida ese Dirava ladana korikorina na Baibel momo lalodia amo e kokidia, bona gabunai dagi ladadia e tore, heḡereḡere Lohiabada eiava Dirava. To, Baibel e torea matama negadiai, toretore taudia ese Dirava ladana korikorina, Iehova, na nega 7,000  bamona Baibel lalonai e toredia. Iesu ese Dirava sivaraina na taunimanima e hadibalaidiava neganai, Dirava ladana korikorina danu e hahedibalaiava.​—Ioane 17:26 duahia.

Iehova be ita se lalodamu Diravana dainai, ita iboudai ese hisihisi ta davarimu, a? Haida na e tomu, Dirava na hisihisi amo ita e dibaḡanidamu, to edia lalohadai na koikoi.​—Iakobo 1:13 duahia.

Dirava ese ita ta ta ura kwalimu e henida, siboda abi hidi baita kara totona. Una ese e hahedinaraiamu, Dirava na ita e lalodamu bona e matauraidamu. To, eda ura kwalimu ta ḡaukaralaia namonamomu, a? Heḡereḡere, ita be Dirava itoma heni dihona karana ta abia hidimu, a? (Iosua 24:15) Taunimanima momo na ma haida ihadikadia karadia e karamu dainai, momo herea e hisihisimu. Iehova na taunimanima edia kara havara e itamu, bona lalona e hisihisimu danu.​—Genese 6:5, 6 duahidia.

Iehova na ita e lalodamu Diravana. Ia na e uramu ita ese mauri baita moalelaia. Kahirakahira, Ia ese hisihisi bona hisihisi e havaramu taudia baine haoredia vaitani. To, mai badina korikorina ta dainai, Dirava ese ina nega kwadoḡina ai e varamu hishisidia na do se koudiamu. Gabeai, Karoa 8 ai, una badina baita dibaia.​—2 Petro 2:9; 3:7, 13 duahidia.

Iehova na e uramu ḡuriḡuri amo ia baita hereva henia​—Ia ida baita hetura dalana ta be una. Ia na ita ta ta e laloda badamu. (Salamo 65:2; 145:18) Ia na e uramu eda dika baine gwauatao. E itadamu, ta hekwarahi goadagoadamu ia ihamoalena karadia ta karamu, ena be nega haida ta kereremu danu. Una dainai, ena be ita na dia ḡoevadae tauda, to Dirava ida baita hetura diba.​—Salamo 103:12-14; Iakobo 4:8 duahidia.

Iehova ese e havarada dainai, namona na Ia baita lalokau henia, bona una ese ma haida ta lalokau henidiamu karana baine hereaia be namo. (Mareko 12:30) Dirava o lalokau heniamu dainai, Ia sivaraina ma haida ba stadilai bona Ia e uramu karadia ba kara neganai, Ia ida ba hetura momokani.​—1 Timoteo 2:4; 1 Ioane 5:3 duahidia.