Iesu na tanobada do sema neganai, ia na aneru ta guba ai e nohova, una dainai ia na dia ita heḡereḡereda. (Ioane 8:23) Ia na Dirava ese e havara ḡaudia iboudiai roboana, bona Dirava ida e ḡaukara hebou, ḡau oredia iboudiai e karadia. Iesu mo sibona, Iehova imana amo e havaraia dainai, Baibel ese e gwauraiamu, Dirava Natuna “vara-edeana” o tamona na maoro. Danu, Iesu na Dirava ena hereva igwauraina tauna o gwaukau tauna, una dainai Baibel ese ia ladana ma e gwauraiamu, “Hereva.”​—Ioane 1:14; Apokalupo 19:13.​—Hereva Lada-isidia 8:22, 23, 30; Heberu 1:2 duahidia.

Dirava ese Natuna tanobada e siaia mai dalana binai: Natuna ena mauri na guba amo e abia oho bena Maria, tau ta ida do se mahuta hebou Iuda haneulatona, bogana ai e atoa. Una dainai, Iesu tamana na dia tanobada tauna ta. (Luka 1:30-35) Iesu tanobada ema badidia toi bini: (1) Dirava sivaraina momokanina baine hadibadalaida, (2) nega aukadiai bona nega namodiai Dirava ena ura ikarana dalana baine haheitalaida, bona (3) ena mauri ḡoevadaena baine heni, eda mauri “idavalaina.”​—1 Timoteo 2:5, 6 duahidia.

Nega haida, ta ena mauri davana o iruhana monina ta henimu, basie hamasea totona. (Esodo 21:29, 30) Dirava ese taunimanima e karadia negana ai, idia na basie buruka bona basie mase. Una be ede baita hamomokania toma? Dirava ese tau ginigunana, Adam, e hamaoroa, bema ia ese Dirava ena taravatu baine utua, o Baibel ese e gwauraiamu “kara dika” baine karaia, ia na baine mase. Anina na, bema Adam na “kara dika”  basinema karaia, ia na basinema mase diba. (Genese 2:16, 17; 5:5) To Baibel na e gwaumu, Adam dainai mase tanobada ai e “vareai.” Anina na, Adam ese kara dika bona mase na ena bese iboudiai e henidia hanai. Una dainai, ta ese eda mauri davana baine karaia na ḡau badana, unu amo Adam ese e heni hanai ḡauna, mase, amo baine ruhada.​—Roma 5:12; 6:23 duahia.

Daika heḡereḡere, eda mauri davana baine karaia diba, mase amo baine ruhada totona? Ta e masemu neganai, ia sibona mo ena kara dika davana e karaiamu. Ita ta dia heḡereḡere ma haida edia kara dika davana basita karaia diba, badina ita iboudai na dia ḡoevadae.​—Salamo 49:7-9 duahidia.

Iesu na ḡoevadae tauna, dia ita heḡereḡereda. Ia sibona ena dika dainai baine mase na asi anina, badina ia na kara dika ta se karaia. To, ia na ma haida edia dika dainai e mase. Dirava ena lalokau taunimanima ediai na bada herea dainai, Ia ese Natuna e siaia, ita daidai baine mase. Iesu danu ita e lalokau henida dainai, Tamana e kamonai henia, bona eda dika dainai ena mauri e heni.​—Ioane 3:16; Roma 5:18, 19 duahidia.

Iesu tanobada ai e nohova neganai, gorere taudia e hanamodiava, mase taudia e hatoredia isiva, bona hisihisi idauidau taudia e durudiava. Unu amo e hahedinaraia, vaira negadiai, Iesu na ia e kamonai heniamu taudia ediai kara unu hetomadia baine kara. (Mataio 15:30, 31; Ioane 5:28) Iesu e mase murinai, Dirava ese ma e hatorea isi, guba ai vada e abia dae. (Efeso 1:20) Bena King Iesu na Dirava idibana kahana ai e helai diho, bona e henarimu, ela bona Iehova ese siahu o maoro baine henia, tanobada idoinai baine lohiaia totona. (Heberu 10:12, 13) To ina harihari, Iesu na gubai King ḡaukarana e karaiamu, bona ia murinai e rakamu taudia na tanobada idoinai una sivarai namona e harorolaiamu.​—Daniel 7:13, 14; Mataio 24:14 duahidia.

Kahirakahira, King Iesu ese ena siahu baine ḡaukaralaia, hisihisi bona hisihisi e havaramu taudia baine haoredia. Iesu e abidadama heniamu bona e kamonai heniamu taudia iboudiai na tanobada ai, paradaiso bae noholaia.​—Salamo 37:9-11 duahidia.