1. Dahaka dainai ta ese emu dika e gwaua taomu neganai emu ai na e aukamu ena hereva ba lalopararalaia?

 “EMU DIKA NA, NA GWAUA TAOMU.” Una hereva dainai oi na bo moalemu, bema emu hereva o kara ta amo ta lalona o hahisia. To ina hereva: “Emu dika na gwaua taomu” anina be dahaka? O hahisia tauna ena hereva amo e hahedinaraiamu umui be dounu tura namodia, a? Eiava ia be se uramu una baine herevalaia dainai, a? Taunimanima ese dika e gwau taomu neganai, nega haida na auka edia hereva anina baita lalopararalaia.

 2. Baibul ai Iehova ese dika e gwau taomu karana be ede e herevalaia toma? (Futnout danu ba itaia.)

² Iehova ese dika e gwau taomu dalana na idau herea, ita dia ḡoevadae tauda ese dika ta gwau taomu dalana amo. Oibe Iehova ena dika gwaua tao karana na asi ihaheḡereḡerena. Salamo itorena tauna ese Iehova na ini e herevalaia toma: “Oi na mai momokanimu ida taunimanima edia dika o gwau taomu, una dainai oi bae matauraimu bada.” a (Sal. 130:​4, NWT) Oibe, Iehova na ‘mai momokanina ida’ dika e gwau taomu. Ia sibona ese dika gwau tao karana anina e hahedinaraia ḡoevaḡoevamu. Baibul e torea taudia ese Heberu toretoredia ai siri haida na hereva haida e ḡaukaralai unu amo Iehova ese dika e gwau taomu dalana e hahedinaraia.

 3. Edena dala ai Iehova ese dika e gwau taomu karana na idau ita eda amo? (Isaia 55:​6, 7)

 ³ Iehova ese ta ena dika e gwaua taomu neganai, ena dika na e kokia vaitanimu. Bena ia ida edia hetura karana na e namo loumu. Ita na Iehova ta tenkiu heniamu, badina hanaihanai eda dika na e gwau tao vaitanimu.—Isaia 55:​6, 7 ba duahia.

 4. Edena dala ai Iehova ese e durudamu dika igwau taona anina korikorina baita lalopararalaia?

⁴ Bema Iehova ese dika e gwau taomu karana na idau ita dia ḡoevadae tauda eda amo, edena dala ai una kara anina korikori baita lalopararalaia? Iehova ese laulau herevadia amo e hadibadamu. Ina atikol ai unu hereva haida baita herevalaimu. Unu ese be hahedinaraiamu edena dala ai Iehova ese dika e gwau taomu, bona be abida dae loumu ia turana ai baitala totona. Unu laulau herevadia baita lalodiamu neganai, eda tenkiu karana bona lalokau Iehova ena baita habadaiamu. Ia na Tama hebogahisina bona dala idauidau ai eda dika e gwau taomu.

IEHOVA ESE DIKA E ABI OHOMU

 5. Iehova ese eda dika e gwau taomu neganai ia be dahaka e karamu?

⁵ Baibul ai kara dika na heḡereḡere maduna metauna ta na heto. King David ese sibona ena kara dika na ini e herevalaia toma: “Egu kara havara na kwaragu ai vada e kau, idia na maduna metauna na heto, ihuana na asi goadagu.” (Sal. 38:4) To Iehova ese helalo kerehai taudia edia dika na e gwau taomu. (Sal. 25:18; 32:5) Ina hereva “dika igwau taona” na Heberu herevana ta amo e hahanaia anina na “abia isi” eiava “huaia.” Una dainai Iehova baita laloamu neganai ia na vaitani goada tauna na heto, bona eda kara dika na maduna metauna dainai ia ese paḡada amo e kokiamu bona e abia ohomu.

 6. Iehova ese iseda kara dika be ede daudauna e hua laomu?

⁶ Baibul ai laulau herevana ma ta ese e hahedinaraiamu Iehova ese eda kara dika be ede daudauna e hua laomu. Salamo 103:12 ese e hadibadamu: “Laurabada kahana bona lahara kahana padadia edia daudau heḡereḡerena, eda kara dika na ita eda amo unu e abidia oho tomamu.” Laurabada (ist) bona lahara (west) padadia na daudau herea. Una anina na, Iehova ese eda kara dika na e kokidia oho vaitanimu. Unu amo ta dibamu Ia ese eda dika na e gwau tao vaitanimu!

 7. Baibul ai Iehova ese dika e gwau taomu dalana be ede e herevalaia toma? (Mika 7:​18, 19)

⁷ Iehova ese eda kara dika na e kokidia ohomu, to dounu e dogodiataomu, a? Lasi. King Hesekia ese Iehova na ini e herevalaia toma: “Oi ese egu kara dika iboudiai na murimu ai vada o nege.” (Isa. 38:​9, 17) Una hereva ese e hahedinaraiamu Iehova ese helalokerehai taudia edia kara dika na e kokidiamu bona murina kahana e negedia laomu, unu amo basine itadia lou. Isaia 38:17 ena hereva na ini baita gwauraia toma diba: “Oi ese [egu kara dika] o abidia ohomu, vaitani se vara na heto.” Baibul ese una point na laulau herevana ma ta amo e hahedinaraia. Una na Mika 7:​18, 19 ai. (Ba duahidia.) Una siri ai e hahedinaraiamu Iehova ese iseda kara dika na davara ena dobu gabudiai e negediamu. Idaunegai, davara ena dobu gabudia ai e negeva ḡaudia na ma se davari louva.

 8. Unu laulau herevadia amo dahaka ta dibamu?

⁸ Baibul ena laulau herevadia amo ta dibamu, Iehova ese eda dika e gwau taomu neganai, una dika na e kokia vaitanimu dainai dounu basita lalohisihisi. Una na David ena hereva heḡereḡerena, e gwa: “Edia kara rea e gwau taomu bona edia dika e herome ahumu  taudia na nanamo; Lohiabada ese dikana se gwauraiamu tauna hari namo.” (Roma 4:​7, 8) Una na mai momokani ida dika e gwau taomu karana korikorina!

IEHOVA ESE DIKA E DAHU OHOMU

 9. Iehova be edena laulau herevana amo e hahedinaraiamu dika na e gwau tao vaitanimu?

⁹ Mauri idavalaina boubouna amo Iehova ese helalo kerehai taudia edia dika e gwau tao vaitanimu. Baibul ese una e hahedinaraiamu dalana mani a laloa. Heḡereḡere, e gwaumu Iehova ese kara dika na e huri ohomu, unu amo kara dika tauna na ia vairanai e ḡoevamu. (Sal. 51:7; Isa. 4:4; Ier. 33:8) Iehova na e gwa: “Ena be emui dika na paira na heto, to bae kuroka-kuroka snow heḡereḡerena; ena be idia na kakakaka herea, to mamoe huina heḡereḡerena ai baela.” (Isa. 1:18) Dabua ta ai stein kakakakana e kamo ikokina na auka herea. To, Iehova ese una laulau herevana amo e hadibadamu, iseda kara dika na una stein heḡereḡerena e huri ohomu, bona ma basie hedinarai loumu.

10. Edena laulau herevana ma ta amo Iehova ese dika e gwau tao vaitanimu karana e hahedinaraia?

¹⁰ Atikol 31 ai ta herevalaia heḡereḡerena, Baibul ese kara dika na “abi-torehai” ida e haheḡereḡerea. (Mat. 18:​32-35) Una dainai ta kara dikamu negadiai, una na vaitani eda abitorehai na e bada e laomu. Iseda abitorehai Iehova enai na bada herea! To eda dika e gwau taomu neganai, una na vaitani eda abitorehai na e gwau taomu bona eda dika davadia na se gwauraimu. Ena abitorehai e gwau taomu tauna e moalemu heḡereḡerena Iehova ese iseda dika e gwau taomu neganai ita danu ta moalemu!

11. Baibul ai ina hereva dika bae “heabi oho” e ḡaukaralaia anina be dahaka? (Apos. 3:19)

¹¹ Iehova ese iseda abitorehai eiava dika na e gwau taomu bona e abi ohomu. (Aposetolo Edia Kara 3:19 ba duahia.) Mani ina haheitalai a laloa. Kastoma ta ese ena abitorehai davana e halouamu neganai, stoa biaguna ese ena buka ai una e abitorehai tauna ladana latanai laini ta e toreamu. To una abitorehai nambana na dounu be itaiamu. To, ḡau ta ba abia oho o ba rohoa be idau. Una laulau herevana anina baita lalopararalaia totona, idaunegai toretore taudia ese e ḡaukaralaiava ink mani a laloa. Una ink na ba rohoa haraḡa diba ḡauna bona ta ese unu e tore ḡaudia na dabua pariparina amo baine dahu oho diba. Una dainai, una nega ai abitorehai ta e gwaua taova neganai, e rohoa vaitaniva. Bona e tore guna herevadia na ma ta ese se itadiava. Ta moalemu badina ta dibamu Iehova ese iseda dika na se gwau taomu mo, to danu e abi oho vaitanimu!—Sal. 51:9.

12. Baibul ai ina laulau herevana ori amo dahaka ta dibamu?

¹² Iehova na laulau herevana ma ta amo dika e abi oho vaitanimu karana e hahedinaraia. Ia na e gwa: “Emu kara dikadia baina kokidia ori ai baina hunidia na heto bona emu kara dikadia baina kokidia ori koremana ai baina hunidia na heto.” (Isa. 44:​22, NWT) Iehova ese dika e gwau taomu neganai, ia na vaitani ori e ḡaukaralaimu eda dika e ḡovadia ahumu unu amo ia bona ita ese basita itadia.

13. Iehova ese eda dika e gwau taomu neganai, eda hemami be ede bamona?

¹³ Tame herevalai laulau herevadia amo dahaka ta dibamu? Iehova ese eda dika e gwau taomu neganai, eda dika daidiai basita lalohisihisi hanaihanai. Iesu Keriso rarana amo eda dika na e gwau tao vaitanimu. Iehova ese eda dika e gwau taomu neganai vaitani una dika na asita karaia na heto. Oibe, ita ta helalo kerehaimu neganai Iehova na mai momokanina ida eda dika e gwau taomu.

 IEHOVA ESE TURANA AI E HALAODA LOUMU

14. Iehova ese dika e gwau taomu karana baita abidadama henia badina be dahaka? (Laulau danu ba itadia.)

¹⁴ Iehova na mai momokanina ida dika e gwau taomu dainai ia turana ai ma baitala diba. Bona eda kara gunadia daidiai basita lalohisihisi. Basita laloa Iehova na dounu ita e badu henidamu bona dala e tahumu baine panisida. Bema Iehova e gwaumu emui dika na vada na gwau tao dahaka dainai una na baita abia dae? Peroveta tauna Ieremia ese iena hereva e gwauraia, eto: “Edia kara havara baina gwaua tao bona edia kara dika basina laloa tao lou.” (Ier. 31:34) Aposetolo Paulo ese una hereva na ma e gwauraia, e gwa: “Edia kara havara basina lalo tao.” (Heb. 8:12) Una anina be dahaka?

15. Iehova ese eda dika se lalotaomu anina be dahaka?

¹⁵ Baibul ai ina hereva “laloatao” e ḡaukaralaia neganai ta ese ḡau ta e laloataomu karana mo se hahedinaraia. To danu ta ese ḡau ta e karaiamu karana e herevalaia. Iesu badinai e tauadae kara dika tauna na e gwa: “Iesu e, emu basileia bavabia negana ai, ba lalogu.” (Luka 23:​42, 43) Ia na Iesu e noia ia dainai ḡau ta baine karaia. Iesu ena haere amo ta dibamu ia na una tau dainai ḡau ta be karaiamu, anina na be hatorea isi loumu. Una dainai bema Iehova na e gwaumu eda dika na se lalotaomu, anina na eda dika na vada e gwau tao bona vaira nega ai unu dika daidiai basine panisidamu.

16. Baibul ai Iehova ese dika e gwau taomu karana be dahaka ida e haheḡereḡerea?

¹⁶ Iehova ese eda dika e gwau taomu neganai ta mamiamu ita na vada e ruhada. Una baita lalopararalaia totona Baibul ese laulau herevana ma ta e gwauraia. Ita na dia ḡoevadae dainai, Baibul na e gwaumu ita na “iḡui hesiai” taudia na heheto kara dika isiaina ta lao henimu. To Iehova ese eda dika e gwau taomu neganai, iḡui hesiai taudia na heto ‘kara dika amo e ruhada negemu.’ (Roma 6:​17, 18;  Apok. 1:5) Oibe, Iehova ese eda dika e gwau taomu dainai ta moalemu, iḡui hesiai tauna ta e ruhaiamu neganai e moalemu heḡereḡerena.

17. Edena dala ai dika igwau taona karana amo namo e varamu? (Isaia 53:5)

¹⁷ Isaia 53:5 ba duahia. Laulau herevana orena baita herevalaiamu ḡauna ese ita na mase gorerena ta e abia taudia ida e haheḡereḡereda. Iehova ese Natuna amo e heni mauri idavalaina boubouna dainai, laulau dalanai ita na vaitani una gorere amo e hanamoda. (1 Pet. 2:24) Ta kara dikamu neganai eda hetura karana Iehova ida ta hadikaiamu, to mauri davana dainai eda dika na e gwau taomu bona Ia ida ma ta heturamu. Gorere badana ta amo e hanamoa lou tauna e moalemu heḡereḡerena, ita danu eda hetura karana Iehova ida e namomu bona ena lalo namo ta abia loumu dainai ta moalemu.

IEHOVA ESE DIKA E GWAU TAOMU AMO E VARAMU ḠAUNA NAMONA

18. Tame herevalai laulau herevadia amo Iehova ese dika e gwau taomu karana ai dahaka tame diba? (Maua danu ba itaia “Iehova ese Eda Dika E Gwau Taomu Dalana.”)

¹⁸ Tame herevalai laulau herevadia amo Iehova ese dika e gwau taomu karana ai dahaka tame diba? Iehova ese dika e gwau taomu neganai e gwau tao vaitanimu. Una dainai tamada guba ai ida hetura karana namona hetura karana namona ta moalelaiamu. Bona baita helalotao eda dika e gwau taomu na harihari ḡauna ta. Una na iena lalokau bona harihari bada amo, e varamu. Dia ita [taunimanima] mai eda maoro dainai ia ese maoroda e gwaurai bona una harihari ḡauna e henidamu.—Roma 3:24.

19. (a) Iehova ese eda dika baine gwau tao totona dahaka baita kara? (Roma 4:8) (b) Atikol gabenai dahaka baita herevalaimu?

¹⁹ Roma 4:8 ba duahia. Ta moalemu badina Iehova na ‘mai momokanina ida ita ta ta eda dika e gwau taomu’! (Sal. 130:4) To bema tauramu Iehova ese eda dika baine gwau tao, namona na ḡau ta baita karaia. Iesu ese una na e herevalaia, e gwa: “Umui ese taunimanima edia dika basio gwau tao, Tamamui ese emui dika basine gwau tao.” (Mat. 6:​14, 15) Una dainai Iehova baita tohotohoa bona ma haida edia dika baita gwau tao na mai anina bada. To edena dala ai? Atikol gabena ese una be herevalaiamu.