Kouma Vinn enn Temwin Zeova?

ZWE

Zezi ti dekrir bann letap pou vinn enn Temwin Zeova ek nou kapav trouv zot dan Matie 28:19, 20. Sa verse-la montre seki enn dimounn bizin fer pou vinn enn disip Zezi Kris ek sa inplik rann temwaniaz lor Zeova.

Letap 1: Aprann seki Labib ansegne. Zezi ti donn lord so bann disip pou “fer bann disip . . . , ansegn zot.” (Matie 28:19, 20) Mo ki tradir par “disip” vedir dan enn fason literal “enn zelev.” Labib, ek sirtou bann lansegnman Zezi, explike kouma nou kapav ena enn lavi ere. (2 Timote 3:16, 17) Nou kontan pou ed ou pou aprann seki Labib ansegne atraver enn letid Labib gratis.—Matie 10:7, 8; 1 Tesalonisien 2:13.

Letap 2: Met an pratik seki ou finn aprann. Zezi ti dir ki bann ki aprann bizin osi “swiv tou bann komannman ki [li’nn] donn zot.” (Matie 28:20) Savedir ki ou letid Labib li plis ki zis gagn enn konesans. Me li pou fer zot fer bann gran sanzman dan zot fason panse ek azir. (Zistwar Bann Apot 10:42; Efezien 4:22-29; Ebre 10:24, 25) Bann ki obeir bann lord ki Zezi inn done, motive pou pran enn desizion personel pou swiv Zezi, kan zot vwe zot lavi ar Bondie Zeova.—Matie 16:24.

Letap 3: Pran batem. (Matie 28:19) Dan Labib, batem li konpare kouma enn lanterman. (Konpar avek Romin 6:2-4.) Li koumadir enn dimounn inn mor par rapor ek so lavi avan ek asterla li pe koumans enn nouvo lavi. Alor kan ou pran batem, ou pe rekonet devan zot tou ki ou finn fer sa de premie letap ki Zezi finn dekrir. Ek osi ou pe demann Bondie pou ena enn konsians kler.—Ebre 9:14; 1 Pier 3:21.

Kouma mo pou kone si mo’nn pre pou pran batem?

Koz avek bann ansien dan ou lasanble. Zot pou koz ar ou pou fer sir ki ou finn konpran seki batem inplike, si ou pe aplik seki ou finn aprann ek si ou finn vwe ou lavi ar Bondie par ou prop volonte.—Zistwar Bann Apot 20:28; 1 Pier 5:1-3.

Eski sa bann letap-la aplik ar bann zanfan ki ena bann paran Temwin Zeova?

Wi. Nou elve nou bann zanfan “dan disiplinn ek dan bann lavertisman Zeova,” parey kouma Labib inn donn lord. (Efezien 6:4) Me amezir ki zot grandi, zot bizin pran enn desizion personel pou aprann, aksepte ek aplik seki Labib ansegne avan ki zot pre pou pran batem. (Romin 12:2) Alafin, sak dimounn bizin fer so prop swa konsernan so ladorasion.—Romin 14:12; Galat 6:5.