1. Kan to mazinn Zeova, ki kitsoz vinn dan to lespri?

 ESKI to’nn deza reflesi lor kouma Zeova ete? Kan to priye Li, ki kitsoz vinn dan to lespri? Mem si Zeova Li invizib, Labib servi plizir kitsoz pou dekrir Li. Par exanp, li dir ki Zeova “li nou lalimier, nou boukliye protekter,” ek “li enn dife ki detrir tou.” (Ps. 84:11; Ebre 12:29) Ezekiel dekrir Zeova kouma enn safir, enn metal ki briye, ek enn larkansiel. (Eze. 1:​26-28) Kan nou reflesi kouma Labib dekrir Zeova, sa kapav inpresionn nou, ouswa sa kapav mem fer nou gagn per.

2. Kifer sertin gagn difikilte pou vinn pros ar Zeova?

² Nou pa kapav trouv Zeova. Akoz sa, sertin trouv sa difisil pou krwar ki Li kontan nou. Sertin panse ki Zeova pa kontan zot parski zot inn fer boukou erer dan zot lavi. Sa bann dimounn-la kitfwa pa ti ena enn papa ki ti kontan zot. Selman, Zeova konpran zot santiman, ek Li konpran kifer zot trouv sa difisil pou vinn pros ar Li. Akoz sa, dan so Parol Labib, Zeova fer nou kone ki Li enn Bondie ki ena boukou lafeksion ek tandres.

3. Kifer nou bizin aprann plis lor Zeova so lamour?

³ Mo ki dekrir Zeova pli bien se lamour. Labib dir ki “Bondie li lamour.” (1 Zan 4:8) Tou seki Zeova fer, se lamour ki pous Li pou fer sa. Zeova so lamour li telman for ek li telman zenere, ki Zeova pa zis montre sa anver bann ki kontan Li, me Li osi montre sa anver bann ki pa kontan Li. (Mat. 5:​44, 45) Dan sa lartik-la, nou pou aprann plis lor Zeova ek so lamour, ek plis nou pou aprann bann kitsoz lor nou Bondie, plis nou lamour pou Li pou ogmante.

 ZEOVA BIEN KONTAN NOU

4. Kan to kone ki Zeova ranpli ar lafeksion ek tandres, ki to resanti? (Get zimaz osi.)

⁴ “Zeova ranpli ar lafeksion ek tandres.” (Zak 5:11) Dan Labib, Zeova konpar Limem ar enn mama ki ena boukou lafeksion pou so zanfan. (Iza. 66:​12, 13) Mazinn enn mama ki pe pran swin so ti-baba. Li’nn poz li lor so zenou ek li pe koz ar li avek boukou douser. Kan zanfan-la plore, ouswa si li pe soufer, so mama donn li seki li bizin. Dan mem fason, mem si nou pe soufer, nou kapav sir ki Zeova kontan nou. Enn ekrivin Psom ti dir: “Sak fwa mo ena traka ek problem to konsol mwa pou mo regagn lazwa.”—Ps. 94:19.

5. Kan to mazinn Zeova so lamour fidel, ki to resanti?

⁵ Zeova Li fidel. (Ps. 103:8) Li pa abandonn nou kan nou fer bann erer. Bann Izraelit plizir fwa ti fer leker Zeova fermal. Selman, kan zot ti repanti, Li ti montre so lamour anver zot. Li ti dir zot: “To’nn gagn valer devan mo lizie, to’nn gagn loner, ek mo’nn kontan twa.” (Iza. 43:​4, 5) Bondie so lamour pa’nn sanze. Nou touletan kapav kont lor so lamour pou nou. Mem si nou fer bann erer bien grav, Zeova pa pou abandonn nou. Si nou repanti ek nou retourn ver Li, nou pou trouve ki Li ankor kontan nou. Zeova promet nou ki “so pardon bien gran.” (Iza. 55:7) Labib konpar Zeova so pardon ar “bann lepok soulazman” ki Zeova Limem done.—Zist. 3:19.

6. Ki kitsoz Zakari 2:8 ansegn nou lor Zeova?

⁶ Lir Zakari 2:8. Zeova bien kontan nou. Li konpran nou santiman ek Li anvi protez nou. Kan nou soufer, Li osi Li soufer. Akoz sa, nou sir ki Li pou reponn nou kan nou dir Li: “Protez mwa kouma to lagrin lizie.” (Ps. 17:​8, NW) Lizie, se enn parti nou lekor ki bien inportan ek ki bien sansib. Alor, kan Zeova konpar nou ar so lagrin lizie, se koumadir Li pe dir, ‘Si enn kikenn fer ditor mo serviter, li pe fer ditor enn kikenn ki bien inportan pou mwa.’

7. Kifer nou bizin sir ki Zeova kontan nou?

⁷ Zeova vremem kontan nou, ek Li  anvi ki nou pena okenn dout lor la. Selman, Li kone ki akoz bann erer ki nou’nn fer dan lepase, parfwa nou kapav panse ki Li pa kontan nou. Ouswa akoz bann sitiasion ki nou pe fer fas azordi, parfwa nou kapav ena bann dout ki Li kontan nou. Ki kitsoz kapav ed nou pou nou sir ki Zeova kontan nou? Anou gete kouma Zeova montre so lamour anver Zezi, anver bann Kretien ki ena lesperans pou al dan lesiel, ek anver nou tou.

KOUMA ZEOVA MONTRE SO LAMOUR?

8. Kifer Zezi ti sir ki so Papa kontan li?

⁸ Zeova ek Zezi inn pas boukou letan ansam. Pandan bann milyar lane ki zot ansam dan lesiel, zot inn vinn bien pros ek zot bien kontan zot kamarad. Dan Matie 17:​5, Zeova dir ki Li kontan so Garson. Li ti kapav zis dir ki Zezi inn “gagn [so] faver.” Selman, pou montre nou ki kantite Li kontan Zezi, Zeova apel Zezi so “Garson ki [li] bien kontan.” Zeova ti bien fier so Garson, sirtou parski li ti pre pou donn so lavi pou bann dimounn. (Efe. 1:7) Zezi pa ti ena okenn dout ki so Papa kontan li. Nou konn sa parski plizir fwa li ti dir bann dimounn ki so Papa bien kontan li.—Zan 3:35; 10:17; 17:24.

9. Ki lexpresion Zeova servi pou montre ki Li kontan bann 144,000? Explike. (Romin 5:5)

⁹ Zeova inn montre osi ki Li kontan bann Kretien ki ena lesperans pou al dan lesiel. (Lir Romin 5:5.) Dan sa verse-la, ena lexpresion “finn ranpli.” Enn diksioner Labib dir ki sa lexpresion-la vedir “inn vinn lor nou kouma enn larivier.” Se enn zoli zimaz ki montre ki kantite Zeova kontan bann 144,000, pa vre! Anplis, bann-la kone ki Zeova bien kontan zot. (Zid 1) Lapot Zan ti dir: “Gete ki kalite lamour Bondie inn donn nou, pou ki apel nou bann zanfan Bondie!” (1 Zan 3:1) Me eski Zeova kontan zis bann Kretien ki ena lesperans pou al dan lesiel? Non, Zeova inn montre ki Li kontan nou tou.

10. Ki pli gran prev lamour Zeova inn donn nou?

¹⁰ Laranson se pli gran prev lamour ki Zeova inn donn nou. (Zan 3:16; Rom. 5:8) Zeova inn donn lavi so Garson ki Li bien kontan. Li’nn les Zezi mor pou ki tou dimounn kapav gagn pardon zot bann pese ek vinn So kamarad. (1 Zan 4:10) Plis nou reflesi lor sakrifis ki Zeova ek Zezi inn fer pou nou, plis nou konpran ki kantite zot kontan sakenn parmi nou. (Gal. 2:20) Mem si Zeova Li Bondie lazistis, Li pa’nn donn laranson zis akoz so lazistis. Laranson se enn prev so lamour. Zeova inn montre ki Li kontan nou kan Li’nn sakrifie seki ena plis valer pou Li. Li’nn permet ki so Garson soufer ek mor parski Li kontan nou.

11. Ki nou aprann dan Zeremi 31:3?

¹¹ Kouma nou’nn trouve, Zeova pa zis kontan nou, me Li osi dir nou ki kantite Li kontan nou. (Lir Zeremi 31:3.) Zeova inn atir nou ver Li parski Li kontan nou. (Konpar ar Deteronom 7:​7, 8.) Nanye pa “kapav separ nou ar lamour ki Bondie ena pou nou.” (Rom. 8:​38, 39) Ki to resanti kan to mazinn lamour ki Zeova ena pou twa? Psom 23 montre nou seki David ti resanti pou Zeova. Anou examinn sa Psom-la, ek anou gete ki santiman sa fer nou ena.

 KI TO RESANTI POU LAMOUR KI ZEOVA ENA POU TWA?

12. Fer enn rezime Psom 23.

¹² Lir Psom 23:​1-6. Dan Psom 23, David montre ki li sir ki Zeova kontan li ek ki Li pou pran li swin. Li dekrir lamitie ki ena ant li ek Zeova, ek li dir ki Zeova se so Berze. David ti kont lor Zeova, ek li ti santi li an sekirite parski li ti les Zeova diriz li. David ti kone ki Zeova ti pou montre li So lamour toulezour. Kifer David ti sir ki Zeova kontan li?

13. Kifer David ti sir ki Zeova ti pou pran li swin?

¹³ “Mo pa mank nannye.” David ti sir ki Zeova ti pou pran li swin parski Zeova inn touletan donn li seki li bizin. Li ti kone osi ki Zeova ti so kamarad, ek ki li ti ena So faver. Se akoz sa ki li ti sir ki, ninport ki arive dan lavenir, Zeova ti pou kontign pran li swin ek donn li seki li bizin. David ti telman sir ki Zeova kontan li, ki sa ti ed li pou li pa trakase. Okontrer, li ti kontant li ar seki li ti ena, ek li ti ere.—Ps. 16:11.

14. Kouma Zeova kapav pran nou swin?

¹⁴ Zeova pran nou swin sirtou kan nou gagn bann difikilte. Claire, a enn ser ki’nn servi dan Betel pandan plis ki 20 an, ti bien abat kan so fami ti gagn bann difikilte enn deryer lot. So papa ti gagn enn atak, enn parmi so bann ser ti exkli, ek so fami ti perdi zot biznes ek zot lakaz. Kouma Zeova ti pran zot swin? Claire dir: “Zeova ti fer an-sort ki mo fami gagn seki li bizin sak zour. Ek plizir fwa Zeova inn donn nou plis ki seki nou  ti pe atann! Souvan mo mazine kouma Zeova inn ed nou, ek zame mo pa pou bliye lamour ki Li’nn ena pou nou. Kan mo mazinn tousala, sa ed mwa pou kontign servi Zeova avek lazwa mem kan mo gagn bann difikilte.”

15. Kouma David ti regagn lafors? (Get zimaz osi.)

¹⁵ “Mo regagn lavi.” Parfwa, David ti bien strese akoz tou bann problem ki li ti ena. (Ps. 18:​4-6) Selman, kan li ti mazinn lamour ek tandres ki Zeova ena, sa ti bien rekonfort li ek ti donn li lafors. Zeova ti amenn so kamarad David dan bann “patiraz lerb tann” ek kot bann “rwiso dilo trankil.” Lerla, David ti regagn lafors, ek li ti kapav kontign servi Zeova avek lazwa.—Ps. 18:​28-32.

16. Kouma Zeova so lamour inn rekonfort twa ek inn donn twa lafors?

¹⁶ Azordi osi, ‘se gras-a lamour fidel Zeova ki nou pa detrir net’ kan nou gagn bann difikilte. (Lam. 3:22; Kol. 1:11) Anou get lexanp Rachel. Pandan pandemi COVID-19, li ti abat net kan so mari ti abandonn li ek Zeova toule-de. Ki Zeova ti fer pou ed nou ser? Rachel dir: “Zeova ti fer sir ki mo gagn lamour ki mo ti bizin. Mo bann kamarad ti pas boukou letan ar mwa, zot ti amenn manze pou mwa, zot ti avoy mwa bann mesaz ek bann verse Labib, zot ti riy ar mwa, ek zot ti kontign rapel mwa ki Zeova ti pou pran mwa swin. Mo touletan remersie Zeova ki Li’nn donn mwa enn gran fami ki bien kontan mwa.”

17. Kifer David ti reisi sirmont so laper?

¹⁷ “Nannye pa fer mwa per parski to toultan la koste ar mwa.” David ti ena boukou lennmi, ek so lavi souvan ti an danze. Selman, gras-a lamour Zeova, David ti santi li an sekirite. David ti kone ki Zeova ti avek li dan ninport ki sitiasion, ek sa ti rasir li. Akoz sa, li ti dir: “[Zeova] ti balye prop tou mo bann angwas.” (Ps. 34:4) Mem si parfwa David ti per, li ti reisi sirmont so laper parski li ti kone ki Zeova ti kontan li.

18. Kan nou sir ki Zeova kontan nou, kouma sa donn nou lafors pou fer fas ar bann sitiasion ki fer nou per?

¹⁸ Kan nou sir ki Zeova kontan nou,  kouma sa donn nou lafors pou fer fas ar bann sitiasion ki fer nou per? Enn pionie, ki apel Susi, explike seki li ek so mari ti resanti kan zot garson ti swiside. Li dir: “Kan enn kitsoz bien tris koumsa arive, sa kapav tromatiz twa ek to kapav panse ki to pena kontrol lor nanye. Me gras-a Zeova so lamour ek so tandres, nou’nn santi nou an sekirite.” Rachel, ki nou ti mansione taler-la, dir: “Enn aswar, mo ti bien-bien tris, mo ti trakase, ek mo ti per. Lerla, mo ti kriye Zeova bien for ek mo ti priye Li. Deswit apre sa, mo ti santi ki Zeova ti kalme mwa ek ti soulaz mwa, parey kouma enn mama fer ar so ti-baba. Lerla, mo ti regagn somey. Zame mo pa pou bliye sa lanwit-la!” Enn ansien, ki apel Tasos, ti fer kat-r-an dan prizon parski li ti refiz fer servis militer. Kouma Zeova ti pran li swin? Li dir: “Zeova ti donn mwa plis ki seki mo ti bizin. Sa ti donn mwa lafors ek sa ti fer mwa ena plis konfians an Li. Mem si mo ti dan enn plas ki fer per, mo ti zwaye gras-a lespri sin Zeova. Sa ti ed mwa pou konpran ki, plis mo ti fer Zeova konfians, plis mo ti pou resanti so lamour pou mwa. Akoz sa, mo ti koumans fer pionie permanan mem si mo ti dan prizon.”

VINN PROS AR TO BONDIE KI ENA LAFEKSION EK TANDRES

19. (a) Kan nou kone ki Zeova kontan nou, ki lefe sa ena lor nou bann lapriyer? (b) Kan to reflesi lor lamour Zeova, ki kitsoz tous twa personelman? (Get lankadre “ Bann Parol Ki Ed Nou Resanti Lamour ek Tandres Zeova.”)

¹⁹ Tou bann lexanp ki nou’nn gete dan sa lartik-la, montre nou ki Zeova, nou “Bondie lamour,” Li avek nou! (2 Kor. 13:11) Li interese ar sakenn parmi nou. Nou sir ki nou “proteze par so lamour infini.” (Ps. 32:10) Plis nou reflesi lor kouma Li’nn montre so lamour pou nou, plis nou pou trouve kouma Li pran nou swin, ek plis nou pou vinn pros ar Li. Nou kapav priye Zeova komie fwa nou anvi, pou dir Li ki nou bien bizin so lamour. Nou kapav zet tou nou bann traka lor Li, parski nou sir ki Li konpran nou ek ki Li anvi ed nou.—Ps. 145:​18, 19.

20. Kouma Zeova so lamour fer nou vinn pros avek Li?

²⁰ Zeova so lamour atir nou, parey kouma saler enn dife atir bann dimounn enn lanwit kot fer bien fre. Zeova bien kontan nou; Li ena boukou lafeksion ek tandres pou nou. Alor, anou aksepte so lamour dan nou lavi, ek anou dir ar tou nou leker: ‘Mo kontan Zeova’!—Ps. 116:1.