Zezi ti ansegn bann dimounn ki zot ti bizin fer lape. Me enn fwa, li ti dir so bann zapot: “Pa panse ki mo finn vini pou amenn lape lor later; mo pa finn vini pou amenn lape, me lepe. Mo finn vinn separ enn garson avek so papa, tifi ek so mama, belfi ek belmer.” (Mat. 10:34, 35) Ki Zezi ti pe rod dir?

Zezi pa ti anvi kree divizion dan bann fami, me li ti kone ki so lansegnman ti pou kree divizion. Alor, bann dimounn ki ti anvi pran batem ek vinn bann disip Zezi, ti bizin konpran ki parfwa zot fami pa ti pou dakor ar zot desizion. Kitfwa zot konzwin ouswa bann lezot manb zot fami ti pou opoz ar zot. Lerla, sa ti pou difisil pou zot swiv bann lansegnman Zezi.

Labib ankouraz bann Kretien pou “viv dan lape ar tou dimoun.” (Rom. 12:18) Selman, bann lansegnman Zezi kapav kouma enn “lepe” dan sertin fami. Par exanp, nou kapav trouv sa kan enn manb lafami aksepte bann lansegnman Zezi, alor ki bann lezot manb lafami rezet sa lansegnman-la. Lerla, sa bann fami-la kitfwa pou vinn bann “lennmi” sa dimounn ki pe fer zefor pou vinn enn disip Zezi la.​—Mat. 10:36.

Sertin Kretien viv ansam avek zot fami ki pa servi Zeova, ek parfwa zot bizin deside si zot pou fer Zeova ek Zezi plezir, ouswa si zot pou fer zot fami plezir. Par exanp, zot fami ki pa Temwin kapav fors zot pou partisip dan bann fet relizie. Kan enn kitsoz koumsa arive, kisannla zot bizin fer plezir? Zezi ti dir: “Seki kontan so papa oubien so mama plis ki mwa, li pa dign pou vinn mo disip.” (Mat. 10:37) Zezi pa ti pe rod dir ki, si nou anvi vinn so disip, nou bizin diminie lamour ki nou ena pou nou bann paran. An realite, li ti pe ansegn so bann disip ki zot ti bizin deside ki kitsoz pli inportan dan zot lavi. Si bann manb nou fami opoz ar nou parski nou pe swiv bann lansegnman Zezi, nou pou kontign kontan zot. Selman, nou kone ki, seki pli inportan pou nou, se nou lamour pou Zeova.

Nou bien soufer kan nou fami opoz ar nou. Selman, nou bizin rapel bann parol ki Zezi ti dir: ‘Seki pa pran so poto soufrans pou swiv mwa, li pa dign pou vinn mo disip.’ (Mat. 10:38) Sa bann parol-la montre nou ki, kan nou fami opoz ar nou, nou bizin aksepte sa soufrans-la ek kontign andire. Kanmem sa, nou gard lespwar ki, gras-a nou bon kondwit, zot kapav sanze ek aksepte bann lansegnman Zezi.​—1 Pier 3:1, 2.