DAN ansien lavil Babilonn, bann arkeolog inn dekouver bann milyon brik ki bann dimounn ti servi pou aranz lavil-la. Enn arkeolog ki apel Robert Koldewey, dir ki ti pe fabrik sa bann brik-la dan bann four ki ti “andeor lavil, kot ti ena bon larzil ek kot ti ena boukou pie ki zot ti servi pou sof bann four.”

Bann arkeolog inn dekouver bann prev ki bann ofisie gouvernman Babilonn ti servi sa bann four-la pou fer enn kitsoz bien kriel. Paul-Alain Beaulieu, enn profeser ki enn exper dan listwar ek langaz Lasiri, ek ki travay dan Liniversite Toronto, dir: “Plizir dokiman Babilonien montre ki lerwa ti donn lord pou bril dan bann four dife, bann ki ti dezobeir li ouswa bann ki pa ti ena respe pou bann kitsoz ki sakre.” Par exanp, enn dokiman lepok Lerwa Naboukodonozor dir: “Detrir zot, bril zot, roti zot, . . . dan four . . . fer lafime-la monte, zet zot dan dife pou touy zot.”

Sa fer nou rapel zistwar ki ena dan Daniel sapit 3. Dan sa sapit-la, nou trouve ki Lerwa Naboukodonozor ti aranz enn gran stati an-or dan laplenn Doura, ki ti andeor lavil Babilonn. Kan trwa zenn Ebre, ki ti apel Shadrak, Meshak, ek Abed-Nego pa ti azenou devan sa stati-la, Naboukodonozor ti bien ankoler ek li ti donn lord pou alim enn four set fwa pli for ek pou zet zot ladan. Me enn anz bien pwisan ti sov zot.​—Dan. 3:1-6, 19-28.

Bann brik ki’nn dekouver dan Babilonn osi, montre ki Labib li exakt. Lor plizir sa bann brik-la ena bann fraz ki donn laglwar lerwa. Enn parmi sa bann fraz-la dir: “Naboukodonozor, Lerwa Babilonn . . . Mo pale, ki mwa Gran Lerwa inn aranze . . . Ki mo bann desandan regn ladan pou touletan.” Sa fraz-la bien resanble seki nou trouv dan Daniel 4:30, kot Naboukodonozor dir: “Eski pa samem Gran Babilonn ki momem mo’nn konstrir pou lakaz rwayal par mo prop lafors ek pwisans ek pou laglwar mo grander?”