LARTIK LETID 30
KANTIK 36 Nou Protez Nou Leker
Bann Leson Inportan ki Nou Aprann ar Bann Lerwa Izrael
“Ankor enn fwa, zot pou trouv diferans ant enn bon dimounn ek enn move dimounn, ant enn dimounn ki pe servi Bondie ek enn dimounn ki pa pe servi Li.”—MAL. 3:18.
PWIN PRINSIPAL
Dan sa lartik-la nou pou aprann kouma lexanp bann lerwa Izrael kapav ed nou pou kone ki nou bizin fer pou fer Zeova plezir.
1-2. Ki Labib dir lor sertin lerwa Izrael?
LABIB koz lor plis ki 40 zom ki finn dirize kouma lerwa lor Izrael, ek dan enn fason onet li donn nou bann detay lor sa bann lerwa-la. a Par exanp, mem bann bon lerwa ti fer bann move kitsoz. Anou get seki Lerwa David ti fer. Zeova dir: “Mo serviter David . . . ti servi mwa avek tou so leker kan li ti fer zis seki drwat devan mo lizie.” (1 Ler. 14:8) Me kanmem sa, David ti komet limoralite sexiel avek enn madam ki ti marye ek ti maniganse pou fer touy so misie dan enn lager.—2 Sam. 11:4, 14, 15.
2 Labib koz osi lor bann bon kitsoz ki bann move lerwa ti fer. Anou get lexanp Roboam. Zeova dekrir Roboam kouma enn lerwa ki “ti fer seki move.” (2 Kro. 12:14) Me kanmem sa, Roboam ti fer bann bon kitsoz. Par exanp, li ti obeir Zeova kan Zeova ti dir li pa al lager kont dis tribi Izrael ek les zot swazir enn lot lerwa. Pou protez pep Bondie kont so bann lennmi, Roboam ti osi fer bann kitsoz pou fer so bann lavil vinn pli for.—1 Ler. 12:21-24; 2 Kro. 11:5-12.
3. Ki kestion inportan nou kapav poz nou-mem, ek ki nou pou examine dan sa lartik-la?
3 Si bann lerwa Izrael ti fer bann bon ek bann move kitsoz, ki kitsoz ki fer Zeova kone ki enn lerwa li fidel ar li? Repons sa kestion la, pou ed nou konpran seki nou bizin fer pou ki nou kapav fer Zeova plezir. Dan sa lartik-la, nou pou examinn trwa kitsoz ki ed Zeova pou deside si enn lerwa li bon ouswa move: (1) si sa lerwa-la ti kontan Zeova avek tou so leker, (2) si li ti repanti kan li ti fer enn kitsoz ki move, ek (3) si li ti kontign ador Zeova dan bon fason.
KONTAN ZEOVA AVEK TOU TO LEKER
4. Ki diferans ena ant bann lerwa ki ti fidel ek bann lerwa ki pa ti fidel?
4 Bann lerwa ki ti fidel ar Zeova ti servi Li avek tou zot leker. b Par exanp, Lerwa Zozafat “ti rod Zeova ar tou so leker.” (2 Kro. 22:9) Konsernan Zozias, Labib dir: “Avan, pa ti ena okenn lerwa kouma li, ki ti revinn ver Zeova avek tou so leker.” (2 Ler. 23:25) Ek ki nou kapav dir konsernan Salomon ki ti fer seki move dan so vie zour? Labib dir: “So leker pa ti antie pou Zeova.” (1 Ler. 11:4) Abiya ti enn lot lerwa ki pa ti fidel ar Zeova. Labib dir: “Li pa ti servi Zeova avek tou so leker.”—1 Ler. 15:3.
5. Ki savedir servi Zeova avek tou nou leker?
5 Ki savedir servi Zeova avek tou nou leker? Enn kikenn ki servi Zeova avek tou so leker, li pa ador Bondie zis akoz li bizin fer sa. Okontrer, li fer sa parski li bien kontan Zeova, ek li ena enn gran respe pou Li. Anplis, li kontign fer sa toutlong so lavi.
6. Kouma nou kapav kontign servi Zeova avek tou nou leker? (Proverb 4:23; Matie 5:29, 30)
6 Kouma nou kapav swiv lexanp bann lerwa ki ti fidel ek kontign servi Zeova avek tou nou leker? Nou bizin rezet tou bann kitsoz ki kapav ena enn move linflians lor nou. Par exanp, nou bizin fer atansion ar bann kitsoz ki nou gete, ouswa seki nou fer pandan nou letan lib. Nou bizin osi fer atansion pou swazir bien nou bann kamarad, pou ki zot pa fer nou krwar ki kas, se samem ki pli inportan dan lavi. Si nou trouve ki nou lamour pou Zeova pe diminie, fode pa nou tarde pou sanz nou fason panse ek azir pou ki sa bann kitsoz-la pa fer nou perdi nou lamour pou Zeova.—Lir Proverb 4:23; Matie 5:29, 30.
7. Kifer li inportan ki nou rezet bann move linflians?
7 Fode pa nou ena enn leker partaze. Si nou pa fer atansion, nou kapav anbet nou-mem ek krwar ki si nou res okipe dan servis Zeova, alor bann move linflians pa pou afekte nou. Anou pran enn lexanp: Fer koumadir pe fer bien so. Pou soulaz twa kont saler, to desid pou bwar plis delo. Me ki pou arive si to res dan soley toutlong lazourne olie ki to al rod enn plas lonbraz pou kasiet? Saler soley pou fer twa gagn plis swaf ankor. Ki leson nou aprann? Li pa ase ki nou zis fer bann bon kitsoz ki pou fer nou vinn pros ar Zeova. Parey kouma nou pa pou res tro lontan dan soley kan pe fer bien so, nou bizin protez nou kont ninport ki kitsoz ki ena dan sa lemond-la ki kapav fer nou lamour pou Zeova diminie.—Efe. 2:2.
NOU BIZIN REPANTI
8-9. Kouma Lerwa David ek Lerwa Ezekias ti reazir kan ti koriz zot? (Get zimaz lor kouvertir.)
8 Kouma nou ti gete dan paragraf premie, Lerwa David ti fer bann pese bien grav. Me kan profet Natan ti dir li seki Zeova resanti konsernan so pese, avek limilite David ti repanti. (2 Sam. 12:13) David pa ti fer sanblan ki li regrete zis pou anbet Natan ek fer li krwar ki li’nn repanti ouswa pou evit gagn pinision. Okontrer, li ti vremem repanti, parski Psom 51 montre ki li ti vremem regrete seki li ti fer.—Ps. 51:3, 4, 17, not ki ena lao.
9 Lerwa Ezekias osi ti fer pese kont Zeova. Labib dir: “Dan so leker li ti koumans vinn gran-nwar. Akoz sa, Zeova ti ankoler ar li, ek ar Zida ek Zerizalem.” (2 Kro. 32:25) Kifer Ezekias ti koumans vinn gran-nwar? Kitfwa li ti santi li siperyer akoz bann rises ki li ti ena, ouswa akoz li ti gagn laviktwar lor bann Asirien, ouswa parski Zeova ti geri li. Kitfwa se parski li ti vinn gran-nwar ki li ti montre bann Babilonien tou so bann rises, ek akoz sa profet Izai ti dir li ki Zeova ti bien ankoler ar li. (2 Ler. 20:12-18) Me parey kouma David, Ezekias ti vremem repanti. (2 Kro. 32:26) Ek alafin, kouma Zeova ti trouv Ezekias? Li ti trouv li kouma enn lerwa ki ti fidel, ki “ti kontign fer seki drwat.”—2 Ler. 18:3.
Avek limilite, Lerwa David ek Lerwa Ezekias ti repanti, apre ki ti dir zot seki Zeova resanti konsernan zot pese (Get paragraf 8-9)
10. Kouma Lerwa Amazia ti reazir kan ti koriz li?
10 Konpare ar David ek Ezekias, Lerwa Zida, Amazia, ti fer seki bon, “me li pa ti fer sa avek tou so leker.” (2 Kro. 25:2) Kifer? Apre ki Zeova ti ed li pou gagn laviktwar lor bann Edomit, Amazia ti koumans ador bann fos bondie. c Kan profet Zeova ti koz avek li lor la, Lerwa Amazia pa ti anvi ekoute, ek li ti fer li ale.—2 Kro. 25:14-16.
11. Dapre 2 Korintien 7:9, 11, ki nou bizin fer pou ki Zeova pardonn nou? (Get zimaz osi.)
11 Ki nou aprann avek sa bann lexanp-la? Nou bizin repanti ek fer zefor pou pa refer bann mem erer. Ki nou pou fer si bann ansien konsey nou lor enn erer ki paret pa tro grav pou nou? Fode pa nou panse ki Zeova pa kontan nou ouswa ki bann ansien ena kitsoz kont nou. Mem bann bon lerwa Izrael ti bizin gagn bann konsey, ek parfwa ti bizin disiplinn zot. (Ebre 12:6) Kan nou gagn disiplinn, nou bizin (1) ena limilite ek aksepte sa disiplinn-la, (2) fer bann sanzman ki bizin, ek (3) kontign servi Zeova avek tou nou leker. Si nou vremem repanti, Zeova pou pardonn nou.—Lir 2 Korintien 7:9, 11.
Kan nou gagn enn disiplinn, nou bizin (1) aksepte disiplinn-la ar limilite, (2) fer bann sanzman ki bizin, ek (3) kontign servi Zeova avek tou nou leker (Get paragraf 11) f
ADOR ZEOVA DAN BON FASON
12. Kouma bann lerwa ki ti fidel ti diferan ar bann lerwa ki pa ti fidel?
12 Bann lerwa ki ti fidel ar Zeova ti ador Li dan bon fason ek zot ti ankouraz lepep pou fer parey. Parey kouma nou ti gete, ena fwa sa bann lerwa-la ti fer bann erer. Me selman, zot ti ador zis Zeova tousel, ek zot ti travay dir pou detrir tou bann zidol ki ti ena dan zot pei. d
13. Kifer Zeova ti konsider Lerwa Akab kouma infidel?
13 Kifer Zeova ti konsider sertin lerwa kouma infidel? Li vre ki pa tou seki zot ti fer ti move. Par exanp, apre ki move Lerwa Akab ti aprann ki Nabot ti mor akoz li, li ti montre inpe limilite ek sagrin. (1 Ler. 21:27-29) Li ti osi ranz bann lavil, ek li ti gagn boukou viktwar lor bann lennmi Izrael. (1 Ler. 20:21, 29; 22:39) Me ena enn kitsoz ki Akab ti fer ki ti bien move. Akab ti ankouraz lezot pou ador bann fos bondie akoz li ti les so madam inflians li. Ek zame li pa’nn repanti pou seki li’nn fer.—1 Ler. 21:25, 26.
14. (a) Kifer Zeova ti konsider Roboam kouma enn lerwa infidel? (b) Ki move kitsoz laplipar bann lerwa infidel ti fer?
14 Anou get lexanp enn lot lerwa ki ti infidel: Roboam. Kouma nou ti gete dan paragraf 2, li ti fer boukou bann bon kitsoz pandan so regn. Apre ki Roboam ti vinn enn lerwa for, li ti aret obeir Lalwa Zeova ek ti koumans ador bann fos bondie. (2 Kro. 12:1) Apre sa, ena fwa li ti ador Zeova ek ena fwa li ti ador bann fos bondie. (1 Ler. 14:21-24) Roboam ek Akab ti parmi bann lerwa ki ti aret ador Zeova dan bon fason. An realite, laplipar bann lerwa ki pa ti fidel ti ador bann fos bondie ek ti ankouraz lezot pou fer parey. Li kler ki pou Zeova, ador Li dan bon fason, se enn kitsoz bien inportan pou ed li kone si enn lerwa bon ouswa move.
15. Kifer li inportan pou Zeova ki nou ador li dan bon fason?
15 Kifer pou Zeova, fason ki bann dimounn ador Li, se enn kitsoz bien inportan? Parski, kan bann dimounn ador bann fos bondie, sa fer zot fer bann lezot pese ek maltret lezot. Akoz sa, bann lerwa ti ena responsabilite pou ed lepep ador Zeova dan bon fason. (Oze 4:1, 2) Anplis, bann lerwa Izrael ek bann Izraelit ti enn pep ki Zeova ti swazir pou Li. Alor, kan zot pa ti fidel ar Zeova ek zot ti ador bann fos bondie, Labib dir ki se koumadir zot ti komet ladilter. (Zer. 3:8, 9) Kan enn kikenn komet ladilter, li kas leker so konzwin. Dan mem fason, si enn kikenn ki’nn donn so lavi Zeova koumans ador bann fos bondie, li fer Zeova so leker fermal. e—Det. 4:23, 24.
16. Pou Zeova, ki diferans ena ant enn bon dimounn ek enn move dimounn?
16 Ki leson nou aprann? Nou bizin fer zefor pou evit tou kitsoz ki ena enn lien ar fos relizion. Me nou bizin osi ador Zeova dan bon fason ek res bien okipe dan nou servis pou Li. Profet Malaki ti explike ki diferans ena ant enn bon dimounn ek enn move dimounn pou Zeova. Li ti dir: “Zot pou trouv diferans ant enn bon dimounn ek enn move dimounn, ant enn dimounn ki pe servi Bondie ek enn dimounn ki pa pe servi Li.” (Mal. 3:18) Nou anvi ki Zeova konsider nou kouma enn bon dimounn. Alor, nou bizin fer atansion pou pa les nanye, ni nou bann inperfeksion, ni bann erer ki nou fer, fer nou aret servi Zeova. Ek kan nou aret servi Zeova se enn pese bien grav.
17. Kifer to bizin swazir bien avek kisann-la to pou marye?
17 Si to enn selibater ek to pe pans pou marye, bann parol Malaki kapav ed twa pou swazir enn bon konzwin. Reflesi lor la: Enn dimounn kapav ena bann bon kalite, me si sa dimounn la pa pe servi vre Bondie, eski devan lizie Zeova li enn bon dimounn? (2 Kor. 6:14) Si to marye ar sa dimounn-la, eski li pou ankouraz twa pou res fidel ar Zeova? Par exanp, kitfwa bann madam Salomon ti ena bann bon kalite. Me selman, zot pa ti ador Zeova, ek tigit-tigit zot ti fer Salomon ador bann fos bondie.—1 Ler. 11:1, 4.
18. Ki bann paran bizin ansegn zot zanfan?
18 Paran, to kapav servi lexanp bann lerwa ki ena dan Labib pou ed to zanfan ena dezir pou servi Zeova. Fer zot konpran ki bann lerwa ki ti ena faver Zeova, se bann lerwa ki ti ador Zeova ek ki ti ankouraz lepep pou ador Li. Montre to zanfan ki seki pli inportan pou twa, se fer bann kitsoz ki pou ed twa res pros ar Zeova, kouma etidie Labib, asiste bann renion, ek prese. (Mat. 6:33) Si to pa fer sa, to bann zanfan kapav panse ki zot bizin servi Zeova zis akoz twa to pe servi Zeova. Ek lerla, zot kapav panse ki ador Zeova li pa enn kitsoz inportan, ek zot kapav mem aret servi Li net.
19. Ki lespwar ena pou bann ki’nn aret servi Zeova? (Get lankadre “ To Kapav Retourn ar Zeova!”)
19 Eski pena okenn lespwar pou enn kikenn ki’nn aret servi Zeova? Non, okontrer li kapav repanti ek rekoumans servi Zeova. Pou li kapav fer sa, li bizin ena limilite ek aksepte led bann ansien. (Zak 5:14) Li vo lapenn ki li revinn kamarad ar Zeova!
20. Si nou imit bann lerwa ki ti fidel, kouma Zeova pou konsider nou?
20 Ki bann leson nou’nn aprann ar bann lerwa Izrael? Nou kapav imit bann lerwa ki ti fidel ar Zeova, si nou kontign servi Li avek tou nou leker. Anou aprann ar nou bann erer, repanti, ek fer bann sanzman ki bizin. Ek nou bizin rapel ki li inportan ki nou ador sel vre Bondie, Zeova. Si to res fidel ar Zeova, Li pou konsider twa kouma enn bon dimounn.
KANTIK 45 Meditasion Mo Leker
a Dan sa lartik-la, lexpresion “bann lerwa Izrael” vedir tou bann lerwa ki’nn diriz lor pep Zeova, ki zot ti regn lor de-tribi rwayom Zida, lor dis-tribi rwayom Izrael, ouswa lor toule 12 tribi.
b EXPRESION KI’NN EXPLIKE: Labib servi mo “leker” pou dekrir seki enn dimounn ete vremem andan. Li inplik nou bann dezir, nou bann panse, nou personalite, nou latitid, nou bann kapasite, nou bann lintansion ek nou bann lobzektif.
c Dan sa lepok-la, bann lerwa ki pa ti Izraelit souvan ti ador bondie bann pep lor ki zot ti gagn laviktwar.
d Lerwa Aza ti fer bann pese bien grav. (2 Kro. 16:7, 10) Me, Labib dir ki Aza ti fer bann bon kitsoz devan lizie Zeova. Kan profet Zeova ti koriz li, dan koumansman Aza pa ti ekoute ek li ti mal reazir. Me li posib ki plitar li’nn repanti. Finalman, Zeova ti konsantre Li plis lor so bann kalite ki lor so bann erer. Seki ti inportan, se ki Aza ti ador zis Zeova ek ti fer boukou zefor pou detrir bann zidol ki ti ena dan so rwayom.—1 Ler. 15:11-13; 2 Kro. 14:2-5.
e Nou ladorasion li bien inportan pou Zeova, parski de premie komannman dan Lalwa Moiz ti dir ki enn dimounn pa gagn drwa ador ninport kisann-la ouswa ninport ki kitsoz apart Zeova.—Ex. 20:1-6.
f DESKRIPSION ZIMAZ lor Kouvertir: Avek limilite, Lerwa David ek Lerwa Ezekias ti repanti, apre ki ti dir zot seki Zeova resanti konsernan zot pese. Paz 23: Enn zenn ansien pe dir enn frer seki li panse lor frer-la so labitid pou bwar. Avek limilite, frer-la inn aksepte so konsey, inn fer bann sanzman ki bizin, ek pe kontign servi Zeova ar fidelite.
