Eski ou finn deza demann ou ki lavenir rezerve pou ou ek ou fami? Eski ou pou vinn ris ouswa pov, ou pou trouv lamour ouswa ou pou res tousel? Eski ou pou viv lontan, ouswa ou pou mor enn kout san atann? Pandan bann milye lane, bann dimounn finn fer bann sipozision lor sa bann kalite kestion-la.

Azordi bann exper pe etidie seki pe pase dan lemond ek pe fer bann prediksion pou lavenir. Mem si boukou parmi zot bann prediksion inn realize, sertin pa’nn realize, sertin ti enn katastrof. Par exanp, an 1912, Guglielmo Marconi, dimounn ki’nn invant telegraf san fil, ti predir: “Gras-a bann kitsoz san fil ki pe vini, pou nepli ena lager.” Ek enn azan Decca Record Company, ti refiz fer enn kontra avek bann Beatles an 1962, li ti krwar ki bann group ki zwe lagitar ti pou nepli ena sikse dan lavenir.

Boukou dimounn tourn zot ver bann kitsoz sirnatirel pou konn lavenir. Sertin rod konsey bann astrolog; souvan ena bann oroskop dan bann magazinn ek bann zournal. Lezot dimounn al get bann dimounn ki predir lavenir ouswa bann vwayan, ki dir ki zot kapav “lir” lavenir kan zot bat kart, ouswa gras-a nimerolozi, ouswa lir bann lalign lame.

Dan lepase, sertin dimounn ki ti anvi konn lavenir ti al get bann pret ki predir lavenir, zot ti fer konn bann linformasion ki zot ti gagne ar bann bondie ki zot dir zot reprezante. Par exanp, Crésus, Lerwa Lydie, ti avoy bann kado ki ena boukou valer pou enn pret ki dan Delphes, la Grèce, pou kone ki pou arive si li al lager kont Sirus, Lerwa Pers. Pret-la ti dir ki si Crésus ti al lager kont Sirus, li ti pou detrir “enn gran lanpir.” Crésus ti sir li ti pou gagn laviktwar, alor li ti al fer sa lager-la, me gran lanpir ki ti kraze ti so prop lanpir!

Prediksion sa pret-la ti flou ek pa ti ena valer; ninport kisannla ki ti pou gagn sa lager-la ti pou realiz sa prediksion-la. Crésus ti perdi tou akoz sa bann move ransegnman-la. Zordi bann dimounn servi boukou mwayin pou predir lavenir, eski bann ki servi sa bann metod-la inn gagn bann pli bon rezilta?