Fason pou Zer Kas
Boukou dimounn finn gagn mwins problem kas kan zot finn aplik bann prinsip ki ena dan Labib.
ENA ENN BON PLAN
PRINSIP LABIB: “Plan enn kikenn ki travay dir vremem pou reisi, me tou bann ki tro prese pou azir vremem pou tom dan lamizer.”—Proverb 21:5.
KI SAVEDIR: Ou bizin etabli enn plan ek fer sir ki ou swiv li. Alor, planifie bien ou bann depans. Pa bliye, ou pa pou kapav aste tou seki ou anvi. Alor, reflesi bien avan ou aste.
KI OU KAPAV FER:
-
Respekte enn bidze. Fer enn lalis tou bann kitsoz ki ou ena pou aste ek met zot dan diferan kategori, kouma par exanp, manze, linz, ek lakaz. Lerla fer enn bidze pou sak kategori. Si ou depans plis ki bizin dan enn kategori, servi kas ki ou’nn prevwar dan enn lot kategori. Par exanp, si ou’nn servi pli boukou kas ki ou’nn prevwar pou met lesans, pran kas ki ou’nn prevwar pou enn kitsoz ki mwin inportan, kouma par exanp, kas ki’nn prevwar pou fer enn sorti.
-
Evit pran bann det ki initil. Otan ki posib, pa fer det. Okontrer, ramas ou kas pou kapav aste bann kitsoz ki ou bizin. Si ou abitie servi kart kredi, alafin sak mwa esey pey montan ki ou’nn servi pou ki ou pa bizin pey lintere. Ouswa si ou bizin pran kas prete, esey ranbours li vit. Ek si ou deza ena bann det, etabli enn plan pou ki ou kapav ranbours li vit, ek respekte ou plan.
An zeneral, bann dimounn ki pey avek enn kart kredi ouswa ki touletan pran kas prete, ena tandans pou depans pli boukou. Alor, reflesi bien avan ki ou servi ou kart kredi ouswa pran kas prete.
FER ATANSION BANN MOVE LABITID
PRINSIP LABIB: “Enn dimounn ki pares pa pou plante pandan liver, lerla kan pou ariv peryod rekolt li pou demann sarite.”—Proverb 20:4.
KI SAVEDIR: Si enn dimounn pares sa kapav fer li tom dan povrete. Alor, vinn enn bon travayer, ek esey zer ou kas avek sazes pou ki ou kapav ena seki ou bizin dan lavenir.
KI OU KAPAV FER:
-
Travay dir. Kan ou travay dir ek montre ki ou enn dimounn ki responsab, ou patron pou kontan ou ek pou anvi ki ou kontign travay pou li.
-
Montre ou onet. Pa kokin ou patron. Kan ou malonet sa pou gat ou repitasion ek li pou difisil pou ki ou gagn enn lot travay apre.
-
Evit dezir pou gagn touletan plis. Si ou touletan pe esey gagn pli boukou kas, pa zordi pa dime sa pou afekte ou lasante ek ou relasion avek lezot. Pa bliye, kas se pa kitsoz ki pli inportan dan lavi.
BANN LEZOT PRINSIP LABIB
Lir Labib lor Internet. Li disponib dan plis ki 100 lang lor jw.org
PA GASPIY OU LETAN EK OU KAS DAN BANN MOVE LABITID.
“Enn soular ek enn dimounn ki gourma pou vinn pov, ek dimounn ki dan somey pou met bann linz ki desire.”—PROVERB 23:21.
EVIT STRES OU PLIS KI BIZIN.
“Pa fatig zot ar zot lavi, ar seki zot pou manze ou bwar, ar labiyman zot lekor.”—MATIE 6:25.
PA ANVIE LEZOT.
“Enn zom ki anvie lezot pe anvi vinn ris vit, me li pa kone ki se povrete ki pe atann li.”—PROVERB 28:22.
