Eski liniver inn touletan existe?

Zenez 1:1 dir: “O-koumansman, Bondie ti kree lesiel ek later.”

Avan bann lane 1950, boukou bann gran siantis ti panse ki liniver inn touletan existe. Me pa tro lontan, laplipar siantis finn rekonet ki liniver finn ena enn koumansman.

Kouma later ti ete o-koumansman?

Zenez 1:2, 9 dir ki avan, later “pa ti ena okenn form ek pa ti ena nanye lor la,” ek li ti kouver ar delo.

Bann siantis dakor avek sa deskripsion-la. Patrick Shih, enn biolozis, dir ki o-koumansman nou planet ti ena “enn latmosfer kot pa ti kapav respire parski pa ti ena loxizenn . . . ek li ti bien bizar parey kouma dan bann fim sians-fiksion.” Magazinn Astronomy dir: “Bann nouvo resers finn montre ki avan, later ti kouver ar delo ek pa ti kapav trouv okenn plas ki sek.”

 Kouma eski nou latmosfer finn sanze avek letan?

Zenez 1:3-5 montre ki o-koumansman latmosfer ti telman epe ki okenn lalimier pa ti kapav pase, ek vinn ziska lor later. Ek si ti ena enn kikenn lor later sa lepok-la, se bien plitar ki li ti pou kapav trouv soley ek lalinn.​—Zenez 1:14-18.

Dapre Smithsonian Environmental Research Center, nou latmosfer ti pe les zis enn lalimier bien som vinn ziska later. Li dir: “Gaz metann ti form enn brouyar ki ti anvlop sirfas later.” Plitar, “sa brouyar metann la ti disparet ek lesiel ti vinn ble.”

Dan ki lord bann diferan form lavi inn aparet lor later?

Zenez 1:20-27 dir ki finn kree bann pwason, bann zwazo, bann zanimo lor later, ek an dernie finn kree bann imin. Bann siantis panse ki bann pwason inn aparet avan bann premie mamifer ek ki bann imin finn aparet bien apre.

Sertin dimounn dir ki seki Labib ansegne bien diferan ar seki bann siantis inn dekouver. Me selman, kitfwa zot pans koumsa akoz zot pa’nn tro konpran seki Labib dir.

Labib pa dir ki liniver ouswa later ena zis 6,000 an. Ofet, li zis dir ki later ek liniver finn kree “o-koumansman.” (Zenez 1:1) Labib pa donn plis detay lor la.

Labib pa dir ki tou bann lavi lor later finn kree dan sis zour 24-er. Ofet, li servi mo “zour” pou fer referans ar enn peryod letan. Par exanp, li dir ki finn kree later pandan enn peryod letan, ki apel “zour ki Zeova * ti fer later ek lesiel.” (Zenez 2:4) Alor, sa sis “zour” kreasion kot Bondie ti amenaz later ek kree lavi la, kapav reprezant bann extra long peryod letan.

Labib pa dir ki bann zanimo pa kapav sanze avek letan. Liv Zenez dir ki bann zanimo finn kree “dapre zot lespes.” (Zenez 1:24, 25) Kan Labib servi mo “lespes,” li fer referans ar bann diferan varyete form lavi. Sa term-la fer nou konpran ki bann varyete enn “lespes” ki viv dan mem kominote kapav sanze avek letan.

 Ki ou panse?

Kouma nou ti gete, Labib dekrir dan enn fason sinp ek exakt kouma liniver finn koumanse, kouma later ti ete o-koumansman, ek kouma lavi finn devlope. Alor, eski nou kapav dir ki Labib finn idantifie sa Kikenn ki finn kree sa bann kitsoz-la? Encyclopædia Britannica dir: “Lide ki lavi finn aparet gras-a enn lafors siperyer, li an-akor avek seki lasians modern finn dekouver.” *