C’EST enn parmi bann pli vié souvenir ki mo ena lor mo papa. Li ti enn dimoune humble ki ti travail dur. Li ti ena enn grand lamour pou la justice, alors en 1953, kan li ti tann message ki ena dan la Bible, desuite sa ti attire li. Depuis sa, li ti faire tou seki li ti kapav pou enseigne nou seki li ti pé aprann. Au commencement, mo mama ti hesité pou arrete suive so bann tradition Catholique. Mais avek le temps, li aussi ti accepté bann l’enseignement Biblik.

Li ti difisil pou mo bann parent etudié avek nou. Mo mama pa ti trop konn lire ek mo papa ti travail bien dur ek ziska tard dan karo. Parfois, li ti tellement fatigué ki li ti gagne sommeil pendant letid. Mais so bann zeffort ti recompensé. Mo-mem ti pli grand, alors mo ti aide mo bann parent pou enseigne mo soeur ek mo deux frere. Nou ti koz lor enn kitsoz ki souvent nou papa ti mentionné​—lamour ki Noé ti ena pou so famille ek so l’obeissance pou Bondié. Mo ti bien content sa zistoire-la! Nou pa ti tardé pou assisté reunion dan la Salle du Royaume Roseto degli Abruzzi, enn lavil ki ti trouve lor la cote Adriatique, en Italie.

Mo ti ena 11 an kan en 1955, mo mama ek moi, nou ti traverse bann montagne dan l’ouest, pou assisté nou premier l’assemblée dan Rome. Depuis sa, bann l’assemblée c’est enn parmi bann kitsoz ki mo bien content.

L’année apré, mo ti baptisé ek pa trop longtemps apré, mo ti prend service a plein temps. L’age 17 an, mo ti nommé pionnier special en Latina, dan sud Rome, apepré 300 kilometre ar l’endroit kot mo ti resté. Latina ti enn nouveau lavil, alors, personne pa ti trop tracassé seki bann voisin ti kapav pensé. Sa soeur ki ti pionnier avek moi-la ek mo-mem, nou ti bien content pou laisse beaucoup publication ki basé lor la Bible, selman mo ti ankor jeune, alors, mo lakaz ti bien mank moi! Mais mo ti envie obeir Jéhovah, ek sa ti aide moi pou reste dan mo affectation.

Plitar, en 1963, ti demann moi pou al Milan pou aidé dan preparation l’Assemblée International “ La bonne nouvelle éternelle. ” Pendant sa l’assemblée-la mo ti travail volontaire  ensam avek beaucoup lezot frere ek soeur, parmi ti ena Paolo Piccioli, enn jeune frere ki ti sorti Florence. Deuxieme jour l’assemblée, li ti faire enn discours bien puissant lor lavi celibataire. Mo rappel ki mo ti dire-mo-mem: ‘Surement sa frere-la jamais pou marié sa.’ Selman, nou ti commence ecrire nou camarade ek nou ti realisé ki nou ti ena mem l’objectif, nou toulé-deux nou ti bien content Jéhovah ek nou ti envie obeir Li. Paolo ek moi, nou ti marié en 1965.

Mo ti pionnier permanent dan lavil Florence pendant dix an. Mo ti bien content pou trouve l’accroissement ki ti ena dan bann congregation, surtout pou trouve bann jeune progressé. Paolo ek moi, nou ti content passe le temps avek zot pou gagne bann conversation spirituel ek aussi dan bann moment detente. Paolo ti content joué football ar zot. Bien sur, mo ti content passe le temps avek mo mari, mais mo ti trouvé ki sa bann jeune-la ek bann famille dan congregation ti bizin ki Paolo interessé personnellement ek passe le temps avek zot, sa ti faire zot gagne bann bienfait.

Sa ankor faire moi plaisir kan mo pense sa quantité letid la Bible ki nou ti conduire-la. Enn parmi ti appel Adriana, li ti koz avek deux lezot famille lor seki li ti pé aprann. Sa bann famille-la ti organise enn reunion avek enn pretre pou koz lor bann doctrine l’eglise, couma par exemple la Trinité ek lor l’immortalité nâme. Trois pretre ki ti ena enn grand position dan l’eglise ti vinn dan sa reunion-la. Zot bann explication ti bien compliké ek pa ti ena sens. Li pa ti difisil pou nou bann etudiant la Bible remarké sa ki sa bann explication-la pa ti en accord avek la Bible. Oui, sa reunion-la ti faire enn grand changement dan zot lavi. Avek le temps, apepré 15 membre sa bann famille-la ti vinn bann Témoins.

Bien sur, zordi nou methode predication bien diferan. Longtemps, Paolo ti vinn enn “expert” pou discute ar bann pretre​—ek li ti gagne plusieurs discussion coumsa. Mo rappel ki enn parmi sa discussion-la ti passe devant enn groupe dimoune ki pa ti Témoins. Li ti clair ki sa bann pretre-la ti’nn fini faire l’arrangement avant, pou ki certain membre dan l’assistance pose bann question ki ti pou embarrasse Paolo. Selman, sa pa ti passe couma zot ti pé attann. Enn dimoune ti demandé si li bon ki l’Eglise mele-li ar politik couma li finn faire pendant plusieurs siecle. Lerla, sa bann pretre-la pa ti koné couma pou reponn. Enn coute, courant ti coupé, ek ti bizin cancel sa reunion-la. Plusieurs l’année apré, nou finn aprann ki sa bann pretre-la ti’nn fini faire l’arrangement pou ki enn kikenn coupe courant si jamais discussion-la pa tourne dan zot faveur.

Apré dix an mariage, Paolo ek moi nou ti invité pou al servi dan circonscription. Paolo ti ena enn bon travail, alors li pa ti fasil pou prend enn decision. Mais apré ki nou finn bien prié Jéhovah, nou ti decidé pou accepté sa nouveau privilege-la. Nou ti bien content pou passe le temps avek bann famille kot nou ti resté. Dan l’apre-midi, souvent nou tou nou ti etudié ensam, ek apré, Paolo ti aide bann zenfant pou faire zot devoir, surtout si c’est devoir mathematik. En plus, Paolo ti bien content lire ek li ti content partage bann pensée interessant ek encourageant ki li ti lire. Dan Lundi, souvent nou ti al preche dan bann lavil kot pa ti ena okenn Témoins ek nou ti invite bann dimoune pou vinn ecoute enn discours ki nou ti organisé dan l’apré-midi.

Apré ki nou ti’nn passe zis deux an dan circonscription, nou ti invité pou al servi dan Béthel Rome. Paolo ti travail dan departement ki occupe bann zaffaire legal, ek mo ti travail dan departement ki ti occupe l’abonnement bann periodik. Li pa ti fasil pou faire sa changement-la, mais nou ti bien decidé pou obeir. Nou ti bien content pou trouve travail dan Béthel augmenté ek pou trouve enn grand l’accroissement parmi bann frere en Italie. Dan sa lepok-la, gouvernement en Italie ti reconette bann Témoins de Jéhovah couma enn religion legal. Nou ti bien content nou nouveau l’affectation.

Pendant ki nou ti pé servi dan Béthel, ti’nn arrive enn cas en Italie ki ti faire bann dimoune konn position bann Témoins de Jéhovah lor question di-sang. Au commencement bann l’année 80, ti’nn accuse enn couple Témoins de Jéhovah ki soi-disant zot ti’nn laisse zot tifi mor parski zot ti refuse ki donne li enn transfusion di-sang. En realité, sa tifi-la ti mor parski li ti ena enn maladie bien grave ki ti affecté so di-sang ek beaucoup dimoune dan region Méditerranée ti ena sa maladie-la. Bann frere ek soeur dan Béthel ti soutenir bann avocat ki ti represente bann parent sa tifi-la. Bann Témoins ti imprime enn tract ek enn numero special Réveillez-vous ! ki ti aide bann dimoune pou konn la verité lor sa cas-la ek pou comprend pli bien seki la Bible dire lor di-sang. Pendant sa bann mois-la, souvent Paolo ti travail ziska 16 heure par jour sans arreté. Mo ti faire tou seki mo ti kapav pou soutenir li.

Sa ti faire 20 an depuis ki nou ti’nn marié, kan enn l’evenement ti arrivé sans ki nou ti pé attann. Mo ti ena 41 an ek Paolo 49 an kan mo ti dire li ki mo pensé mo enceinte. Dan so carnet, mo ti trouve sa bann mot ki li ti ecrire sa jour-la: “La priere: Si sa vrai, aide nou pou reste dan service a plein temps, pa pou relax lor plan spirituel, ek aide nou pou vinn bann bon parent par nou l’exemple. Plis ki tou, aide moi pou mette en pratik au moins 1 pour cent tou seki mo  finn dire lor l’estrade pendant sa 30 dernier l’année-la.” Kan mo guette nou lavi zordi, mo trouvé ki Jéhovah finn reponn la priere Paolo, ek mo la priere aussi.

Nou lavi ti bien changé kan nou tifi Ilaria ti né. Mo bizin dire franc ki parfois Paolo ek moi, nou ti decouragé, couma Proverbes 24:10 dire: “Eski to finn montré ki to decouragé kan malheur vinn lor toi? To pou ena enn tigit la force mem.” Mais nou ti contigne soutenir sakenn nou camarade.

Zordi, Ilaria souvent dire ki li bien content ki so bann parent ti bien occupé dan service a plein temps kan li ti pé grandi. Jamais li’nn senti-li negligé; li ti touletan ressenti nou lamour. Pendant la journée, mo ti occupe li. Dan l’apré-midi, kan Paolo ti rente lakaz, souvent li ti ena bann travail pou fini; pourtant li ti passe le temps avek Ilaria, li ti joué avek li ek ti aide li faire so devoir. Li ti faire sa, mem si li ti bizin al dormi deux heure ou-soit trois heure di-matin pou li kapav fini so travail. Souvent Ilaria ti dire: “Mo pli bon camarade c’est mo papa.”

Bien sur, pou nou kapav aide Ilaria pou contigne faire seki bon, nou ti bizin discipline li ek parfois dan enn fason bien ferme. Mo rappel ki enn fois, li ti pé joué avek enn camarade ek li ti mal comporte-li. Nou ti explik li a travers la Bible kifer fodé pa li agir dan sa fason-la. Nou ti aussi faire li demann so camarade excuse devant nou.

Ilaria souvent dire ki lamour ki so bann parent ena pou zot ministere finn aide li aussi pou content predication. Asterla ki li’nn marié, li comprend pli bien l’importance pou obeir Jéhovah ek pou suive so direction.

En 2008, Paolo ti aprann ki li ti ena enn cancer. Au commencement, nou ti croire ki Paolo ti pou kapav gueri, ek li ti bien encourage moi. Nou ti rod pli bon traitement medical possible. Ilaria ek moi, nou ti aussi faire bann longue la priere ek nou ti demann Jéhovah pou aide nou faire face ar lavenir. Mais kan-mem, sa ti bien dur pou moi pou trouve enn kikenn ki ti bien fort ek dynamik, vinn faible tigit par tigit. So lamor en 2010, ti enn coup terrible pou moi. Mais kan mo pense tou seki nou finn reussi faire pendant 45 an ki nou finn ensam, sa reconforte moi beaucoup. Nou finn donne Jéhovah tou seki nou ti kapav. Mo koné ki jamais Li pa pou blié seki nou finn faire. Mo pé attann avek impatience moment kot Paolo pou ressuscité, en accord avek seki Jésus ti dire dan Jean 5:28, 29.

Dan mo leker, mo ankor toujours sa tipti tifi ki bien content zistoire Noé-la. Mo ankor bien decidé pou obeir Jéhovah n’importe ki kitsoz Li demann moi. Mo sur ki n’importe ki probleme nou ena, n’importe ki sacrifice nou faire ou-soit n’importe ki kitsoz nou perdi, zot nanyé ditou kan nou compare sa avek bann benediction ki Bondié donne nou. Personnellement, mo finn faire sa l’experience-la ek mo donne ou garanti ki sa vaut la peine pou obeir Jéhovah.