PASCAL ti grandi dan enn landrwa bien pov an Côte d’Ivoire, ek touletan li ti anvi konn enn lavi meyer. Li ti enn boxer amater, ek li ti demann limem, ‘Ki kote mo pou kapav gagn enn sans pou vinn enn vedet dan domenn sportif ek pou vinn ris?’ Kan li ti ena anviron 25 an, li ti panse ki se dan l’Europe ki li ti bizin ale. Me li pa ti ena okenn papie ofisiel pou vwayaze, li ti pou bizin rant dan l’Europe dan enn fason ilegal.

An 1998, kan li ti ena 27 an, Pascal ti koumans so vwayaz. Li ti travers lafrontier pou rant Ghana, li ti travers Togo ek Bénin, ek finalman, li ti ariv dan lavil Birni N’Konni dan Niger. Apre sa, parti pli riske dan sa vwayaz-la ti koumanse. Pou li al dan lenor, li ti bizin mont dan enn kamion ek travers Desert Sahara. Apre, kan li ti ariv la Mer Méditerranée, li ti pou pran enn bato pou al l’Europe. Sa, se plan ki li ti fer, me ti ena de kitsoz dan Niger ki pa ti permet li fer sa.

Premierman, tou so kas ti’nn fini. Deziemman, li ti zwenn enn pionie, ki apel Noé, ki ti koumans enn letid Labib avek li. Seki li ti aprann ti telman tous li, ki li ti sanz so fason panse. So lamour pou bann kitsoz spiritiel ti ranplas so bann lobzektif materyel. An Desam 1999, Pascal ti pran batem. Pou montre so rekonesans anver Jéhovah, an 2001 li ti koumans fer pionie dan Niger​—dan mem lavil ki li ti konn laverite. Kouma li konsider so servis? Li dir: “Mo pe viv pli bon lavi ki ena!”

Parey kouma Pascal, boukou finn trouve ki zot gagn plis satisfaksion dan zot lavi kan zot fixe bann lobzektif spiritiel. Pou zot kapav realiz zot lobzektif, sertin finn kit l’Europe ek finn al dan bann pei l’Afrique pou servi dan bann landrwa kot bizin plis proklamater. An realite, apepre 65 Temwin ki sorti dan l’Europe​—ant 17 ek 70 an​—finn demenaze pou al dan bann pei dan Lwes l’Afrique kouma Bénin, Burkina Faso, Niger, ek Togo. a Ki ti pous zot pou fer sa bann gran sanzman-la, ek ki rezilta zot finn gagne?

Anne-Rakel ki sorti Danemark dir: “Mo bann paran ti bann misioner dan Sénégal. Zot ti touletan koz lor lavi misioner avek enn gran lantouziasm, ki mwa osi mo ti anvi konn sa kalite lavi-la.” Inn gagn apepre 15 an, kan Anne-Rakel ti ena anviron 20 an, li ti demenaze pou al res Togo. Laba, li al dan enn kongregasion kot servi langue des signes. Kouma seki li’nn fer finn ankouraz lezot? Li dir: “Plitar mo ti ser ek mo ti frer finn swiv mwa dan Togo.”

 Aurele, enn frer marye ki sorti la France ek ki ena 70 an, dir: “Inn gagn sink an, kan mo ti pran mo retret, mo ti ena pou fer enn swa: amenn enn lavi trankil an France ek atann Paradi, ouswa pran bann dispozision pou fer plis dan mo minister.” Aurele ti swazir deziem posibilite-la. Inn gagn apepre trwa-z-an, li ek so madam, Albert-⁠Fayette, ti demenaze pou al Bénin. Aurele dir: “Nou finn dispoze pou servi Jéhovah isi, ek se pli bon kitsoz ki nou finn fer dan nou lavi.” Li azoute avek enn sourir: “Finalman, enn bon parti nou teritwar lor lakot fer mwa pans Paradi!”

Sa fer 16 an ki Clodomir ek so madam, Lysiane, ti kit la France pou al res Bénin. Kan zot ti fek arive, zot bann fami ek zot bann kamarad an France ti bien mank zot, ek sa koup-la ti per pangar zot pa reisi adapte ar zot nouvo lavi. Selman, zot pa ti ena okenn rezon pou per. Zot ti gagn boukou lazwa. Clodomir dir: “Dan sa 16 lane-la, nou finn gagn lokasion ed, an mwayenn, enn dimounn sak lane pou aksepte laverite.”

An 2010, Sébastien ek Johanna, enn koup Franse ti demenaze pou al res Bénin. Sébastien dir: “Ena telman kitsoz pou fer dan kongregasion. Servi isi se koumadir pran enn kour teokratik akselere!” Ki reaksion bann dimounn ena dan teritwar? Johanna dir: “Bann dimounn swaf laverite. Mem kan nou pa dan predikasion, bann dimounn aret nou lor semin pou demann nou bann kestion lor Labib ek pou gagn nou bann piblikasion.” Kouma sa demenazman-la finn ena enn lefe lor zot maryaz? Sébastien dir: “Sa finn fer nou maryaz vinn pli solid. Li enn plezir pou pas tout lazourne dan servis avek mo madam.”

Eric ek so madam, Katy, zot bann pionie dan lenor Bénin, kot pena boukou dimounn ki reste. Inn gagn apepre di-z-an, kan zot ti an France, zot ti koumans lir bann lartik lor posibilite pou al servi dan bann landrwa kot bizin plis proklamater ek zot ti koz avek bann ki dan servis aplintan. Sa ti fer zot anvi al servi dan enn lot pei, ek se seki zot ti fer an 2005. Zot finn gagn lokazion trouv enn lakrwasman extraordiner. Eric dir: “Ena de-z-an, ti ena 9 proklamater dan nou group, dan lavil Tanguiéta; asterla ena 30 proklamater. Dan Dimans, ant 50 ek 80 dimounn asiste renion. Li vremem enn lazwa extraordiner pou trouv enn progre koumsa!”

Ki difikilte bann ki finn demenaze pou al dan bann teritwar kot bizin proklamater, gagne? Benjamin, frer  Anne-Rakel, ena 33 an. An lan 2000, dan Danemark, li ti zwenn enn misioner ki ti servi dan Togo. Benjamin dir: “Kan mo ti dir sa misioner-la ki mo ti anvi fer pionie, li ti dir: ‘To kone, to kapav fer pionie dan Togo.’” Benjamin ti reflesi lor la. Li dir: “Dan sa lepok-la, mo pa ti ankor mem ena 20 an, me mo de ser ti deza pe servi dan Togo. Sa ti pli fasil pou mwa pou al laba.” Alor li ti demenaze. Me selman, ti ena enn problem. Benjamin explike: “Mo pa ti konn enn mo Franse. Sis premie mwa ti bien difisil parski mo pa ti kapav vremem kominike.” Me avek letan, li ti fer bann progre. Asterla, Benjamin pe servi dan Béthel, dan Bénin, li fer livrezon bann piblikasion ek li ede dan departman informatik.

Eric and Katy, ki nou ti mansione avan, ti servi dan enn teritwar etranze an France, avan ki zot ti al Bénin. Kouma eski Lwes l’Afrique ti diferan? Katy dir: “Li pa ti fasil pou trouv enn plas konvenab pou reste. Pandan plizir mwa nou ti res dan enn lakaz kot pa ti ena kouran ek delo.” Eric dir: “Bann vwazin ti zwe lamizik bien for ziska tar aswar. Ou bizin ena pasians avek bann kitsoz koumsa ek dispoze pou adapte.” Toulede dakor pou dir: “Lazwa ki nou gagne pou servi dan bann teritwar kot bann dimounn pankor tann bonn nouvel, konpans ninport ki difikilte ki nou gagne.”

Michel ek Marie-Agnès, zot enn koup ki sorti la France, ek ki pre pou gagn 60 an. Sa fer sink an depi ki zot inn demenaze pou al res Bénin. Zot ti trakase o koumansman. Michel dir: “Sertin ti konpar nou demenazman kouma enn dimounn ki pe mars lor enn lakord ek ki pe pous enn bouret​—ek nou ti pe asize dan sa bouret-la! Sa ti kapav fer per si ou pa ti kone ki sa kikenn ki pe mars lor sa lakord-la ti Jéhovah Limem. Alor, nou ti fer sa sanzman-la pou Jéhovah ek avek Jéhovah.”

Bann ki finn al servi dan bann landrwa kot bizin plis proklamater dir ki li bien inportan pou bien prepare ek fer sa bann kitsoz-la: Prepare alavans. Aprann pou adapte. Pa depas ou bidze. Kont lor Jéhovah.​—Luc 14:28-30.

Sébastien, ki nou ti mansione avan, rakonte: “Avan ki nou ti demenaze, Johanna ek mwa nou ti ramas kas pandan de-z-an. Nou ti diminie bann depans lor bann divertisman ek nou pa ti aste bann kitsoz initil.” Pou ki zot kontign servi dan enn lot pei, toule lane pandan de-trwa mwa, zot al travay an Europe, sa permet zot fer pionie dan Bénin pandan leres lane.”

 Marie-Thérèse li enn parmi anviron 20 ser selibater ki finn kit zot pei pou al servi kot bizin plis proklamater dan Lwes l’Afrique. Li ti travay kouma sofer bis an France; selman, an 2006 li ti pran enn konze enn an pou al servi dan Niger. Enn tipe letan apre, li ti rann li kont ki se sa lavi-la mem ki li ti anvi. Marie-Thérèse dir: “Kan mo ti retourn la France, mo ti koz avek mo patron lor mo dezir pou fer bann sanzman dan mo program travay, ek li ti dispoze pou sanz program-la. Asterla, depi Me ziska Out, mo travay kouma sofer bis an France, ek a partir Septam ziska Avril, mo fer pionie dan Niger.”

Bann ki “avan tou kitsoz, kontign rod le rwayom” kapav ena konfians ki Jéhovah pou donn zot ‘tou bann lezot kitsoz neseser.’ (Mat. 6:33) Anou pran enn lexanp: Get seki ti ariv Saphira, enn ser selibater ki sorti la France. Li pre pou gagn 30 an ek li fer pionie dan Bénin. An 2011, li ti retourn la France pou travay ek ramas ase kas pou kontign so servis enn lane ankor (so siziem lane) an Afrique. Saphira rakonte: “Sa ti pase enn Vandredi, mo dernie zour travay. Me mo ti bizin travay ankor dis zour pou mo gagn ase kas pou lane ki ti pe vini. Mo ti ena zis de semenn devan mwa avan ki mo kit la France. Mo ti priye Jéhovah, mo ti explik Li mo sitiasion. Enn tipe apre, enn lazans travay ti telefonn mwa ek ti demann mwa si mo ti kapav ranplas enn dimounn pou de semenn.” Lindi apre, Saphira ti al dan sa travay-la pou ki sa dimounn ki li ti pou ranplase-la kapav form li. Li rakonte: “Sa ti enn vre sirpriz pou aprann ki sa dimounn-la ti enn ser ki ti bizin dis zour konze pou asiste Lekol Pionie! So patron ti refiz donn li konze tanki li pa ti trouv enn kikenn pou ranplas li. Li ti sipliye Jéhovah pou fer kitsoz​—parey kouma mo ti fer.”

Sertin frer ek ser finn servi dan Lwes l’Afrique pandan boukou lane ek zot finn konsider sa bann pei-la kouma zot prop pei. Lezot finn kapav res pou de-trwa lane ek apre zot finn retourn dan zot pei. Me mem ziska zordi, sa bann proklamater-la ankor tir profi ar bann lane ki zot inn servi dan sa bann pei etranze la. Zot finn aprann ki se kan nou servi Jéhovah ki nou gagn vre satisfaksion dan lavi.