Sertin dimounn panse ki li pa vo lapenn priye parski personn pa pe ekout zot. Lezot inn esey priye, me zot ena linpresion ki personn pa reponn zot. Enn ate inn esey fer enn lide kouma Bondie ete, ek apre li ti priye: “Zis mirmir mwa enn ti zafer.” Me li ti dir ki Bondie ti “res trankil.”

Pourtan, Labib rasir nou ki ena enn Bondie ek ki Li vremem tann bann lapriyer. Bien lontan, enn profet Bondie ti dir konsernan enn pep: “Vremem, kouma Li [Bondie] tann twa kriye pou rod led, Li pou montre twa so faver; kouma Li tann twa, deswit Li pou reponn.” (Izai 30:19) Enn lot verse Labib dir: “Lapriyer bann dimounn drwat, sa li enn plezir pou Li.”​—Proverb 15:8.

Dan Labib ena osi bann lexanp pou montre ki Bondie ekout lapriyer. Enn verse dir ki Zezi “finn sipliy Sa Enn ki kapav sov li” la ek “so lapriyer ti exose.” (Ebre 5:7) Nou trouv lezot lexanp dan Daniel 9:21 ek 2 Kronik 7:1.

Dan sa ka-la, kifer sertin dimounn ena linpresion ki Bondie pa reponn zot lapriyer? Se zis Bondie ki mansione dan Labib, Zeova, a ki ekout bann lapriyer. Alor, nou bizin priye zis Li tousel, pa lezot bondie ouswa nou bann anset. Bondie atann osi ki nou lapriyer li “dapre so volonte.” Nou bizin priye pou bann kitsoz ki Li aksepte. Si nou fer sa, Bondie rasir nou ki “Li ekout nou.” (1 Zan 5:14, 15) Alor, pou ki sa Bondie ki mansione dan Labib la ekout nou lapriyer, nou bizin aprann konn Li ek konn so volonte.

Boukou dimounn krwar ki lapriyer se pa zis enn pratik relizie, me ki Bondie vremem ekout ek reponn bann lapriyer. Isaac, ki res Kenya, dir: “Mo ti priye pou konpran Labib. Deswit apre, enn dimounn ti vinn get mwa ek ti donn mwa led ki mo bizin.” Hilda ki res Philippines, ti anvi aret fime. Plizir fwa li ti esey fer sa, me li pa ti reisi. Alor, so misie ti dir li: “Kifer to pa priye Bondie pou Li ed twa?” Hilda ti swiv sa konsey-la ek li dir: “Mo ti etone kouma Li ti ed mwa. Mo ti pe koumans perdi sa lanvi pou fime la. Ek mo ti reisi arete.”

Eski Bondie anvi ed ou?