Mo’nn ne dan Acul, enn lavil izole ki trouv dan bann montagn dan lwes Guatémala. Mo fami form parti pep Ixil, enn group etnik bann desandan Maya. Depi mo zanfan mo koz lang sa pep-la ek mo koz osi Espagnol. Pandan bann premie lane mo lanfans ti ena enn lager sivil dan Guatémala ki’nn dire 36 an. Boukou Ixil inn mor pandan sa peryod bien violan la.

Mo ti ena kat-r-an kan mo gran frer ki ti ena set an inn mor. Li ti pe zwe avek enn grenad ki’nn exploze enn kout. Li’nn perdi so lavi ek mwa mo’nn perdi mo lizie. Apre, mo’nn pas mo lanfans dan enn sant pou bann zanfan aveg, dan Guatemala City kot mo’nn aprann Bray. Laba, pou bann rezon ki mo pa ti vremem kone, bann staf ti anpes mwa koz ar lezot zelev ek bann zelev dan mo klas pa ti koz ar mwa. Mo ti touletan tousel. Akoz sa, sak lane mo ti atann avek inpasians sa de mwa kot mo ti kapav al lakaz ek res ansam avek mo mama. Li ti enn bon dimounn ek touletan li ti ed lezot. Malerezman, li’nn mor kan mo ti ena di-z-an. Sa ti bien afekte mwa parski mo ti ena linpresion mo’nn perdi sel dimounn ki ti vremem kontan mwa.

Kan mo ti ena 11 an, mo’nn retourn dan lavil kot mo ti reste avan ek mo’nn al viv avek mo demi-frer ek so fami. Zot ti donn mwa tou seki mo ti bizin pou viv. Selman zot pa ti kapav ed mwa pou sirmont mo dezespwar. Parfwa mo ti kriye Bondie pou demann Li: “Kifer mo mama inn mor? Kifer mo aveg?” Bann dimounn ti dir mwa ki se Bondie ki anvi mo konn sa bann maler-la. Alor mo’nn tir konklizion ki Bondie Li insansib ek inzis. Sel rezon kifer mo pa’nn komet swisid se parski mo pa ti ena okenn mwayin pou kapav fer sa.

Lefe ki mo ti aveg, bann dimounn inn bien profit lor mo febles. Kan mo ti tipti, plizir fwa bann dimounn inn viol mwa. Selman, zame mo’nn raport sa bann ka-la parski mo ti panse personn pa pou kas latet. Bien rar bann dimounn ti koz ar mwa, ek momem mo pa ti koz ar personn. Mo pa ti frekant personn, mo pa ti fer konfians personn ek mo ti depresif.

Mo ti fek rant dan ladolesans ek enn zour pandan rekreasion, de Temwin Zeova (enn koup) ti  vinn get mwa dan lekol. Se enn mo bann profeser ki ti bien sagrin mwa ki’nn demann zot pou rann mwa vizit. Zot ti dir mwa ki Labib promet ki enn zour bann mor pou resisite ek bann aveg pou retrouv kler. (Izai 35:5; Zan 5:28, 29) Mo ti bien kontan seki zot ti ansegn mwa. Me, li pa ti fasil pou mo ena enn konversasion avek zot parski mo pa ti abitie koze. Malgre ki mo ti bien rezerve, zot ti ena pasians ek zot ti bon. Zot inn kontign vizit mwa pou ansegn mwa Labib. Sa koup-la ti mars plis ki 10 kilomet ek ti travers enn montagn pou ariv ziska lavil kot mo reste.

Mo demi-frer ti dir mwa ki touletan zot ti abiye bien prop, mem si dan kote materyel zot pa ti ena gran kitsoz. Pourtan, souvan zot ti ofer mwa bann ti kado pou montre ki zot interese ar mwa. Mo ti ena santiman ki zis bann vre Kretien ki kapav montre enn lespri sakrifis koumsa.

Mo’nn etidie Labib gras-a bann piblikasion an Bray. Mem si mo ti konpran seki mo ti aprann, mo leker pa ti aksepte sertin verite. Par exanp, mo ti trouv sa difisil pou krwar ki Bondie ek osi lezot dimounn kapav interese ar mwa personelman. Mo ti konpran kifer Zeova pe permet lemal zis pandan enn tan. Selman mo pa ti arive trouv Li kouma enn Papa ki ena boukou lamour. a

Tigit-tigit seki mo ti aprann dan Labib ti ed mwa pou sanz mo fason panse. Par exanp, mo ti aprann ki Bondie konpran soufrans bann ki pe soufer. Kan bann Ezipsien ti pe fer dominer ar so pep, Bondie ti dir: “Mo’nn trouve vremem kouma mo pep pe pas mizer . . . Mo konn bien douler ki zot pe siporte.” (Exod 3:7) Kan mo’nn koumans apresie bann kalite Zeova, sa finn pous mwa pou vwe mo lavi ar Li. An 1998, mo ti pran batem ek mo ti vinn enn Temwin Zeova.

Anviron enn an apre mo batem, mo ti swiv enn kour pou bann aveg pre ar lavil Escuintla. Enn ansien dan kongregasion sa lavil-la inn kone ki difikilte mo gagne pou al asiste renion. Ofet, kongregasion pli pre pou mwa ti lot kote sa montagn ki sa koup-la ti traverse pou vinn fer mo letid. Alor, pou ed mwa, sa ansien-la inn rod enn fami Temwin dan Escuintla ki ti dispoze mo res kot zot ek ti ed mwa pou asiste renion. Ziska ler zot pran mwa swin koumadir mo enn manb zot fami.

Si mo ena pou rakonte, mo ena boukou lexperyans kot bann manb kongregasion inn montre ki zot vremem kontan mwa. An gro, sa bann lexperyans-la konvink mwa ki bann Temwin Zeova zot bann vre Kretien.​—Zan 13:34, 35.

Asterla mo santi mwa itil ek mo ena enn lesperans. Mo lavi ena enn sans. Mo partisip aplintan dan travay lansegnman bann Temwin Zeova pou ansegn bann dimounn bann verite ki ena dan Labib. Sa anpes mwa pou pans zis mo andikap. Anplis, mo servi kouma ansien dan mo kongregasion ek mo ena privilez pou fer bann diskour piblik dan lezot kongregasion. Mo finn osi ena privilez pou fer bann diskour Biblik pandan bann lasanble rezional kot plizir milye dimounn asiste.

An 2010, mo ti gagn mo diplom Lekol Formasion Ministeryel (ki asterla apel Lekol pou Bann Evanzelizater Rwayom Bondie) ki ti fer dan El Salvador. Sa lekol-la inn ed mwa pou ranpli pli bien mo bann responsabilite dan kongregasion. Formasion ki mo’nn gagne inn fer mwa santi ki mo ena boukou valer pou Zeova ek ki Li bien kontan mwa. Sa montre osi ki Zeova kapav kalifie ninport kisannla pou fer so travay.

Zezi ti dir: “Ena plis benediksion [“lazwa,” NW] kan done, ki kan resevwar.” (Zistwar Bann Apot 20:35) Azordi mo kapav dir ki mo vremem ere. Mem si avan mo ti panse ki sa li inposib, asterla mo santi mo kapav ed lezot.