PANAYIOTA inn grandi lor enn lil dan Méditerranée. Kan li ti adolesan, li ti bien kontan politik. Plitar li ti travay sekreter pou enn parti politik dan so vilaz. Li ti mem al lakaz-lakaz pou kolekte kas pou sa parti-la. Me avek letan, Panayiota inn gagn bann desepsion. Mem si bann manb sa parti-la ti dir ki zot kamarad, touletan ti ena favoritism, lespri konpetision, zalouzi, ek bann dezakor ant zot.

Daniel inn grandi dan Irlande. So fami ti bien relizie. Me malerezman, li rapel bien lipokrizi ki ti ena parmi bann pret. Zot ti bann zougader, zot ti kontan bwar, ek zot ti kokin kas kontribision. Me anmemtan zot ti pe pres avek Daniel ki li pou al brile dan lanfer si li fer pese.

Pandan enn bon bout letan, Jeffery ti travay pou enn konpagni internasional bann proprieter bato ki baze dan l’Angleterre ek l’États-Unis. Li rapel ki plizir fwa bann kliyan ek bann konpetiter ti fer bann frod kan zot ti pe negosie avek bann ofisie gouvernman. Zot ti ipokrit ek zot ti pre pou dir ninport ki kitsoz zis pou gagn enn kontra.

Malerezman, ena ankor lezot ka koumsa. Lipokrizi inn vinn enn kitsoz normal zordi. Nou trouv li preske partou​—dan politik, dan larelizion, ek dan biznes. Mo “ipokrit” sorti dan enn mo Grek ki fer referans ar enn orater ouswa enn akter lor lasenn ki souvan met enn mask. Avek letan, inn koumans servi sa mo-la pou bann dimounn ki fer sanblan ki zot enn lot kalite dimounn pou zot kapav anbet lezot ouswa pou rod zot prop lavantaz.

Bann dimounn ki afekte par lipokrizi kapav ankoler, vinn amer ek gard rankinn. Ek dan koler kitfwa zot dir: “Lipokrizi! Kan eski sa pou fini?” Erezman Parol Bondie donn nou plizir rezon pou krwar ki sa pou arive.

Labib montre ki lipokrizi pa’nn koumanse avek bann dimounn, me avek enn kreatir invizib. Dan koumansman listwar limanite, Satan Lediab ti servi enn serpan kouma enn mask. Li ti fer limem pas pou bon pou li kapav tronp Ev, premie madam. (Zenez 3:1-5) Depi sa, boukou dimounn inn imit Satan. Zot fer zot pas pou seki zot pa ete pou tronp lezot ek pou reisi dan zot bann lobzektif egois.

Dan lepase kan nasion Izrael ti koumans pratik fos relizion ek pa ti sinser dan zot ladorasion, plizir  fwa Bondie ti averti zot. Li ti fer zot konn bann konsekans ki zot kapav gagne. Atraver profet Izai, Zeova ti dir: “Sa pep-la inn vinn ver mwa avek zot labous ek zot onor mwa avek zot lalev, me zot leker bien lwin ar mwa.” (Izai 29:13) Nasion Izrael ti persiste dan zot bann move pratik. Akoz sa, Zeova ti les lezot pep detrir landrwa kot zot ti pe ador Li, setadir Zerizalem ek so tanp. Premie fwa, sa ti arive an 607 Avan Nou Lepok par bann Babilonien ek finalman an 70 Nou Lepok par larme Romin. Li kler ki Bondie pa toler lipokrizi pou touletan.

Parkont, Bondie ek so Garson bien kontan bann dimounn onet ek sinser. Par exanp, kan Zezi ti fek koumans so minister, enn misie ki apel Natanael ti vinn ver li. Letan Zezi ti trouv sa misie-la, li ti dir: “Sa enn vre Izraelit. Li sinser.” (Zan 1:47, NW.) Natanael ki ti apel osi Bartelemi ti vinn enn parmi bann 12 zapot Zezi.​—Lik 6:13-16.

Zezi ti pas letan avek so bann disip, ek li ti ansegn zot Bondie so fason panse. Bann disip Zezi ti bizin rezet lipokrizi. Zezi ti kondann dan enn fason sever lipokrizi bann sef relizie dan so lepok. Ek sa ti enn lavertisman pou so bann disip. Anou get sertin kitsoz ki sa bann sef relizie-la ti fer.

Zot pratik zot [“zistis,” NW], zis pou lizie lezot. Zezi ti dir bann ki ti pe ekout li: “Tansion zot pratik zot devwar relizie [“zistis,” NW] devan lezot, zis pou lizie lezot . . . kouma bann ipokrit fer.” Li ti osi dir ki fode zot bann bon aksion “res sekre,” ouswa diskre. Zot ti bizin priye an prive, pa pou ki lezot trouv zot. Se lerla ki zot ladorasion ti pou sinser ek ti pou ena valer pou so Papa.​—Matie 6:1-6.

Zot ti kontan kritike. Zezi ti dir: “Ipokrit, retir anpremie poto ki dan zot lizie, lerla zot pou trouv bien kler pou retir lapay ki dan lizie zot frer.” (Matie 7:5) Kan enn kikenn kritik defo lezot alor ki limem li ena bann pli gro defo, li pe fer li pas pou pli bon. Apre tou, nou “tou finn fer pese e [nou] tou mank seki bizin pou rant dan laglwar Bondie.”​—Romin 3:23.

Zot ti ena bann move mobil. Enn zour bann disip bann Farizien ek bann partizan Erod ti poz Zezi enn kestion konsernan tax. Zot ti koumans flat Zezi par sa bann parol-la: “Met, nou kone ki to sinser, seki to ansegne lor lalwa Bondie li vre.” Apre zot ti rod piez li par sa kestion-la: “Eski nou lalwa permet nou pey tax lanperer ou non?” Zezi ti reponn: “Bann ipokrit, kifer zot anvi met mwa dan lak?” Zezi ti ena rezon pou apel zot ipokrit parski zot pa ti vremem interese pou gagn repons zot bann kestion me zot ti pe rod “piez Zezi lor [so] bann parol.”​—Matie 22:15-22.

Kan kongregasion Kretien ti forme Lapantkot 33 Nou Lepok, zot tou dan kongregasion ti pe koz laverite ek ti onet. Bann vre Kretien ti fer bann gran zefor pou sanze ek pou rezet lipokrizi. Par exanp, Pier, enn parmi bann 12 zapot ti ankouraz lezot Kretien par sa bann parol-la: “Par obeisans ki zot ena pou laverite, pratik enn lamour sinser.” (1 Pier 1:22) Lapot Pol ti ankouraz bann ki pe travay avek li pou manifeste “lamour dan [“avek,” NW] enn leker prop, enn konsians drwat ek enn lafwa sinser.”​—1 Timote 1:5.

Lansegnman Zezi ek lansegnman bann zapot, ki ena dan Labib ti ena enn gran pouvwar dan premie siek. Zordi osi sa ankor parey. Lapot Pol ti ekrir: “Parol Bondie, li vivan ek li ena lefe. Li pli fite ki enn lepe koup de kote. Kan li perse, li al dan fon, mem ziska kot nou lam separe ar nou lespri; ziska nou zwentir ek lamwel. Li analiz seki ena dan panse ek leker imin.” (Ebre 4:12) Boukou dimounn ki’nn aprann seki Labib ansegne ek inn fer zefor pou viv an-akor avek sa bann lansegnman-la  inn reisi rezet lipokrizi. Zordi zot pli sinser ek onet. Anou get lexperyans sa trwa dimounn ki’nn mansione dan koumansman lartik la.

Panayiota finn konn enn sanzman dan so lavi. Kan li ti aksepte pou asiste enn renion bann Temwin Zeova, li ti trouve ki laba bann dimounn pa ti pe fer sanblan zot bon zis pou inpresionn lezot. Li dir: “Laba mo ti trouve ki sakenn ti vremem kontan ek interese ar zot kamarad. Tou sa bann lane ki mo ti dan politik la, zame mo’nn trouv enn kitsoz koumsa.”

Panayiota ti koumans etidie Labib. Li’nn fer bann progre ek li’nn pran batem. Sa fer 30 an depi ki li’nn batize. Azordi li dir: “Se pa kan mo ti pe al lakaz-lakaz pou promouvwar mo parti politik ki mo lavi ti vremem ena enn sans. Me se kan mo’nn koumans pres Rwayom Bondie, sel mwayin ki pou permet nou viv dan enn lemond kot pou ena lazistis.”

Daniel ti fer bann progre dan kongregasion bann Temwin Zeova ek li ti gagn sertin responsabilite. De-trwa lane apre, li ti fer enn erer ek so konsians ti koumans fatig li. Li ti dir: “Kan mo rapel lipokrizi ki mo ti trouve dan legliz ki mo ti ete avan, sa ti pous mwa pou rann mo bann privilez. Mo pa ti kapav fer mo bann konpagnon Kretien krwar ki mo enn lot kalite dimounn, alor ki se pa vre.”

Erezman, apre enn peryod letan, Daniel ti trouve ki li kapav re-koumans asim so bann responsabilite avek enn konsians kler. Li ti re-aksepte bann responsabilite dan kongregasion. Nou trouv sa lonette-la zis parmi bann ki ador Bondie dan enn fason sinser. Zot aprann pou tir “poto” ki dan zot prop lizie avan zot rod tir “lapay” ki dan lizie zot frer.

Jeffery, ki ti dan biznes, dir: “Amezir ki mo ti pe gagn enn pli gran konesans lor Labib, mo ti rann mwa kont ki mo ti nepli kapav azir kouma sa bann vander ki rize la ek ki kapav dir ninport ki kitsoz zis pou gagn enn kontra. Mo konsians ti inflianse par bann verse kouma Proverb 11:1. Sa verse-la dir: “Enn balans ki finn trike li enn move kitsoz pou Zeova.’” Wi, Jeffery pa ti resanble bann ki ti kestionn Zezi lor tax. Li pa ti ena bann move mobil ni anver so bann konpagnon Kretien ni anver bann ki pa Temwin Zeova.

Bann Temwin Zeova partou dan lemond pe fer zefor pou aplik seki zot inn aprann dan Labib. Zot fer bann gran zefor pou ‘abiy zot avek enn nouvo personalite, ki’nn kree dapre resanblans Bondie dan vre lazistis ek lapirte.’ (Efezien 4:24) Nou ankouraz ou pou kone kisannla bann Temwin Zeova ete, dan ki zot krwar, ek kouma zot kapav ed ou pou aprann lor nouvo lemond ki Bondie inn promet. Dan sa lemond-la pou “ena lazistis” ek pa pou ena lipokrizi.​—2 Pier 3:13.