Arselman sexiel, se kan fors enn dimounn pou ena bann konportman ki li pa anvi ek ki ena enn rapor avek sex, par exanp kan ena bann kontak fizik ouswa kan fer bann remark sexiel. Me parfwa, li kapav difisil pou fer diferans ant badine, fer galan, ek arselman sexiel.

 Eski to kone ki diferans ena ant zot? Get nou  kwiz lor arselman sexiel!

 Malerezman, mem apre ki to’nn kit lekol, arselman sexiel zame pa arete. Selman, si to devlop plis konfians an twa ek to aprann kouma pou fer fas ar arselman sexiel aster-la mem, to pou pre pou fer fas ar sa sitiasion-la kan to pou koumans travay. Ek to kapav mem anpes enn kikenn ki arsel lezot pou pa fer lezot ditor!

 Si to kone ki ete arselman sexiel ek to kone kouma pou reazir, to ena plis sans pou aret sa! Anou get trwa sitiasion ek gete kouma to kapav fer fas dan sak sitiasion.

 SITIASION:

“Dan travay, bann misie ki ti pli vie ki mwa, pa ti pe aret dir mwa ki mo ti zoli ek ki zot ti anvi ena 30 an mwins. Enn parmi sa bann misie-la ti vinn deryer mwa pou santi mo seve!”​—Tabitha, 20 an.

 Tabitha ti kapav panse: ‘Si mo fer koumadir nanye pa’nn arive ek mo les pase, kitfwa li pou arete.’

 Kifer sa fason panse la pa pou marse: Bann exper dir ki kan viktim-la res trankil, souvan sa arselman-la li pa arete, okontrer li anpire.

 Esey sa: Koz avek sa dimounn ki pe arsel twa la, dan enn fason kalm ek kler, ki to pa pou toler seki li pe dir ni so konportman. Taryn, ki ena 22 an dir: “Si kikenn tous mwa dan enn fason ki mo pa kontan, mo get li bien dan so figir ek mo dir li, pa tous mwa ankor koumsa. Souvan li gagn sok ek li pa atann.” Si sa kikenn ki arsel twa la pa arete, pa bes lebra, res ferm. Pou gard bann valer moral, Labib donn sa konsey-la: “Res ferm, avek bann konviksion for.”​—Kolosien 4:12, Nouvo Testaman Dan Kreol Morisien.

 Ki to pou fer si sa kikenn ki arsel twa la menas pou fer twa ditor? Dan sa sitiasion-la, pa afront li, sove pli vit ki to kapav, ek rod led ar enn kikenn ki to fer konfians.

 SITIASION:

“Kan mo ti dan kolez, de tifi ti blok mwa dan koulwar. Enn parmi zot ti lesbienn, ek li ti anvi ki mo sorti avek li. Mem si mo ti refize, zot ti kontign arsel mwa toulezour ant sak klas. Enn fwa, zot ti pous mwa ar enn miray!”​—Victoria, 18 an.

 Victoria ti kapav panse: ‘Si mo rakont seki finn arive, lezot pou trouv mwa kouma enn kikenn ki feb, ek kitfwa personn pa pou krwar mwa.’

 Kifer sa fason panse la pa pou marse: Si to res trankil, sa kikenn ki arsel twa la kapav kontigne ek li kapav refer sa avek lezot.​—Ekleziast 8:11.

 Esey sa: Rod led. To bann paran ek to bann profeser kapav donn twa led ki to bizin pou fer fas avek sa kikenn ki pe arsel twa la. Alor ki to pou fer si bann-la pa krwar twa? Esey sa: Sak fwa ki finn arsel twa, ekrir li, met dat, ler ek bann plas kot sa finn arive ek seki sa kikenn ki finn arsel twa la finn dir. Apre sa, donn enn kopi to bann paran ouswa to bann profeser. Pou boukou dimounn, enn konplint ki finn ekrir ena plis valer ki enn ki finn dir koumsa mem.

 SITIASION:

“Mo ti bien per sa garson ki ti dan lekip rugbi la. Li ti fer de met ek li ti pez 135 kilo! Li ti met dan so latet ki li pou dormi ar mwa. Pandan enn an, li ti arsel mwa preske toulezour. Enn zour, mo ti tousel ar li dan enn klas, li ti vinn pre ar mwa, mo’nn leve vit ek mo’nn sove.”​—Julieta, 18 an.

 Julieta ti kapav panse: ‘Koumsa mem bann garson ete.’

 Kifer sa fason panse la pa pou marse: Sa kikenn ki arsel twa la pa pou sanze, si zot tou panse ki zot konportman normal.

 Esey sa: Evit pou riye ouswa fer enn sourir. Par to reaksion, ek lexpresion to figir montre sa kikenn ki pe arsel twa la seki to aksepte ek seki to pa aksepte.

 TEMWANIAZ 1:

“Mo pa kontan montre mwa dir anver bann dimounn. Kan bann garson ti arsel mwa, mo ti dir zot arete me mo pa ti ase ferm, parski mo ti pe fer enn sourir kan mo ti pe koz avek zot. Zot ti panse ki mo pe fer zes avek zot.”​—Tabitha.

•   Si to ti dan plas Tabitha, kouma to ti pou reazir ar sa kikenn ki pe arsel twa la? Kifer?

•   Kifer sa kikenn ki pe arsel twa la kapav panse ki to pe fer zes ar li?

 TEMWANIAZ 2:

“Tou inn koumanse par bann koze imoral par bann garson ki ti dan mo klas spor. Pandan de-trwa semenn mo pa ti pe kas latet avek seki zot ti pe dir, me sa inn vinn pli grav. Apre bann garson-la inn koumans vinn asiz akote mwa ek inn may mwa. Mem si mo ti pous zot, zot ti kontigne. Lerla, enn parmi sa bann garson-la inn donn mwa enn bout papie ek ti ena bann mesaz grosie ladan. Mo’nn donn sa mo profeser, ek inn tir garson-la depi dan lekol. Mo’nn realize ki depi koumansman mem mo ti bizin al get mo profeser!”​—Sabina.

•   Dapre twa, kifer Sabina pa ti al get so profeser pli boner? Eski li’nn pran enn bon desizion? Kifer to pou dir wi ouswa non?

 TEMWANIAZ 3:

“Enn garson ti pe fer galan avek mo frer Greg dan sal-debin. Garson-la ti vinn bien pre avek Greg ek ti dir li, ‘Anbras mwa.’ Greg ti dir non, me garson-la pa ti pe rod ale. Lerla, Greg ti bizin pous li.”​—Suzanne.

•   Ki to panse, Greg ti viktim arselman sexiel? Kifer to pou dir wi ouswa non?

•   Kifer bann garson gagn onte pou dir ki finn arsel zot sexielman?

•   Eski to dakor avek seki Greg inn fer? Ki twa to ti pou fer?