Bann dokter inn trouve ki souvan bizin servi bann lakol medikal dan bann loperasion ek pou repar sertin blesir dan nou lekor. Me parfwa, andan enn lekor, nou pa kapav servi bann lakol ki existe. Zot danzere, zot vinn dir kan zot sek, ek zot pa kol ar bann parti nou lekor ki mouye. Bann siantis finn trouv enn solision kan zot inn etidie labav enn los. a

 Reflesi lor la: Kan enn los santi li an danze, li larg enn labav ki kol-kole. Labav-la ase for pou ki los-la kol lor enn fey mouye. Sa protez los-la, ek anmemtan li touzour kapav fer sertin mouvman.

 Kan bann siantis inn examinn sa labav-la, zot inn trouv plizir kitsoz ki fer ki sa lakol natirel la, li bien efikas. Par exanp, labav-la servi lafors électrostatique ek bann melanz simik. Labav-la koul lor plas kot los-la ete ek li pa sek tanki los-la res lor la. Kan bann siantis inn esey kopie kapasite ki labav enn los ena, zot inn invant enn lakol ki boukou pli for ki bann lakol medikal ki ena asterla ek ki kapav kol lor organn enn dimounn. Ofet, sa lakol-la kapav vinn enn parti “nou bann organn parey kouma kartilaz form parti nou lezo.”

 Bann siantis dir ki bann dokter kapav servi sa lakol-la dan plas koud ouswa met bann zagraf pandan enn loperasion. Kapav servi sa lakol-la pou repar enn kartilaz ouswa pou kol bann ti laparey exakteman kot bizin dan lekor enn dimounn. Bann test finn montre ki lakol-la li efikas pou kapav repar enn trou dan leker enn koson ek dan lefwa bann lera.

 Souvan bann siantis trouv bann zoli solision pou bann problem kan zot etidie lanatir. Donald Ingber, direkter sa konpagni ki’nn devlop enn lakol ki kouma labav sa los-la, ti dir: “Seki inportan, se konn obzerv lanatir ek pran bann bon lide ki ou trouve.”

 Ki ou panse? Kan ou get lakol natirel ki enn los prodir, ki ou pou dir? Li’nn aparet par limem, ouswa eski inn kree sa?