Ihapari Comaana Cantikhiye ni Luka 23:1-56
23 Vano, atthwaayo yahokhuma ni yahonrwaana Yesu wa Pilatu.
2 Vano, yahancera umoottheryaca, yeeraka: “Nihophwanya ula nlopwanoola aahapusaka apoovweehu, aakottihaka unliva nsokho Seesari ni eeciirelaka wiira uyo Kristu, Mwene.”
3 Vano, Pilatu ahonkoha, eeraka: “Thi weeva ukhanle Mwene aayuuta?” Yesu ahomwaakhula, eeraka: “Thi nyuuva nnohimya.”
4 Vano, Pilatu ahowiirela ahooleli aanankuttho ni atthwaayo co: “Akinoona itthu yoopheela unhukhumu ula nlopwanoola.”
5 Masi ayo yaahokhanyerera, yiiraka: “Uyo nawaahapusa atthu otheene ni citthu cineetthucihaawe u Yuteya mpaka uno u Kalileyoono.”
6 Wiiwa wawe iyo itthwiiyo, Pilatu ahonkoha Yesu wakhala wiira aari nkalilewu.
7 Ucuwela wawe wiira Yesu aakhuma ncoko walamulelaawe Herooti, ahonveleeliha wa Herooti aakhala u Yerusalemu ule ukatyuule.
8 Herooti umoona wawe Yesu ahotteeliya cinene. Ikhumelo yokhalayi ampheela umoona Yesu, kontha eewa paahi oolumiyaka ni aanaapheela umoona apankaka miiriirya.
9 Uyo ahopacera unkohakoha, masi uyo khaakhunle hataa nikoho nimoca.
10 Vano, ahooleli aanankuttho ni anamantikha yahunwa ni yahancera umootheryaca anaviruwile.
11 Vano Herooti, nkhayi naanatoropaawe, khayawacenre saana, yahontarawaca, yahonwariha ikuwo yooreera ni yahonturusela wa Pilatu.
12 Herooti ni Pilatu, yaari atthu yahiiwanana, masi nne nihukunno yahopatthanaca.
13 Pilatu ahaalatthula ahooleli anankuttho, anamalamulela ni apoovu,
14 ni ahowiirela: “Nkiwaanenle ula nlopwanoola mwiiraka wiira nawaahapusa apoovu, masi miiva kihonkohakoha sana-saana uhoolo winyu ni akiphwanyile hataa itthu cimmootheryeenyu.
15 Khweeliini, hataa Herooti khaphwanyile itthu yoohinamaana pankilyaawe ula nlopwanoola, phimaana honiturusela. Toko cinooneenyu, ula khiivo ipankilyaawe yoomwiiriha wiiviya.
16 Phimaana, kinhala wiira unttarusa nunhiya.
17- -
18 Vano, apoovu yahanca ukhuwela, yiiraka: mmwiive uyo nlopwanooyo ni muutthukule Parapasi!
19 (Uyo nlopwanooyo aatthukeliye nkhattya nlattu woovirikaniha nlamulo naakhumelenle nsittatti ni nlattu wowiiva.)
20 Pilatu ahowuulumana-tho atthwaayo, kontha aapheela untthukula Yesu.
21 Ni yahanca ukhuwela: “Mwankhomele wanipottoni! Mwankhomele wanipottoni!
22 Uyo ahowulumana ikwaha yoneeraru, eeraka: “Nlattuni? Isiyani ula nlopwanoola ipankilyaawe yootakhala? Akoonile itthu immwiiriha uphwanela wiiviya. Phimaana, kinaahala unttarusa ni unhiya.
23 Vano, yahokhanyerera yakhuwelaka wiira eeviye, ni khayaahiyerera ukhuwela.
24 Phimaana, Pilatu aholakela upanka itthu yanlepelaaya.
25 Uyo ahontthukula nlopwana yanlepelaaya, aatthukeliye nlattu woovirikaniha malamulo ni nlattu wo wiiva, masi ahaavaha Yesu toko caapheelaaya.
26 Ukati wankusaaya, yahomphwanya nlopwana mmoca eehaniya Simau o Sireeni, aakhuma umattani ni yahonvaha nipotto wiira ateese anttharihaka Yesu.
27 Atthu enci yaanontthara, waahela nhina athiyana yaaripiye nrima cinene ni yaamunlela.
28 Yesu ahorukunuwa ni ahowiirela athiyanaayo co: “Athiyana o Yerusalemu, nhikunlele mi. Uhiya commo, mwiicunlele nyuuva ni asaaniinyu,
29 kontha anaahala uphiya mahuku atthu anhalaaya wiira: ‘Ahoreeriya athiyana oohiyara ni ahinapaca umwamwiha mwaana!’
30 Vano, atthu anaahala wancera wiirela myaako co: ‘Nnimorele!’ ni anaahala wiirela ittuttu co: ‘Nnikhuneele!’
31 Vano ukhala wiira anaapanka iyo itthwiiyo mwiri nkithi, inhala wiirannya isiyani wuumaka?”
32 Alopwana eeli anakhirini ciicammo yahokusiya wiira yiiviye nkhayi ni Yesu.
33 Ni, uphiya waya nipuro niihaniya Kaveera yaahonkhomela iriyari yaanakhirini, mmocooyo moonwaawe wonlopwana ni nkinakuuyo moonwaawe wonthiyana.
34 Masi Yesu aaheera: “Paapa, mwaalevelele ukhala wiira khancuwela invaraaya.” Uhiya commo, yaahopacera upanka mwaavi, wiira akawelane ikuwo cawe
35 Vano, apoovu yaanoweemelaca paahi, yawehaka. Masi akhulupale yammuuluma pusya, yeeraka: “Uyo howoopola atthu akiina; iicoopoleke akhala wiira Kristu oothanliya ni Nluku.
36 Hataa anatoropa yaanonveeha, yahomwaattamela ni yaahorwa unvaha iviinyu yoonyuunya.
37 ni yeeraka: “Wakhala wiira weeva Mwene ayuuta wiicoopole.”
38 Waculu nipotto naakhomeliyaawe, yaahantikhiya moolumo, yeera: “Ula Mwene ayuuta”
39 Vano, nakhirini mmoca akhomeliye wamoca ni Yesu, ahopacera unveeha, eeraka: “Weeva keera Kristu? Wiicoopoleke ni unoopoleke hiiva!”
40 Vano, nakhirini mmocooyo ahommaaliha, eeraka: “Weeva khummoova Nluku, hataa ukhalaka wiira ihukhumu yaakhenlyaawe ula inaalikana ni yawaa?
41 Hiiva, ihukhumu yaakhenleehu inaaniphwanela nlattu wo citthu coohinamaana cipankileehu. Masi ula nlopwanoola, khapankile hataa itthu yootakhala.”
42 Vano, uyo aaheera: “Yesu, ukuupuwele wakela muumweneni waa.”
43 Vano, uyo aheera: “Khweeliini, kinoohimeerya ileelo: Unhala ukhala nkhayi ni miiva upeephooni”.
44 Waaphiyalyaaya 12 oora, mpaka 15 oora yahoripela ile ilapweele yotheene,
45 kontha ncuwanno naahottiphya. Vano ikortiina yontempulu yahaanyuwa iriyariru.
46 Ni Yesu ahokhuwela, eeraka: “Paapa, ukumyaaka kinhiya mmatatani winyu.” Umaliha wawe wuulumaca, ahokhwa.
47 Nhooleli aanakhotto woona wawe citthu cotheene ciirannyaale, aahonttitthimiha Nluku, eeraka: “Khweeliini, ula nlopwanoola aari nasariya.”
48 Ni atthu otheene yaari nno nipuronno, yaahoona itthu yiirannyaale. Vano yaahoturuwela uwaani anariipiye nrima.
49 Atthu otheene yancuwela Yesu, yeemenle uttayi. Uhiya commo, athiyana otheene yantthanre ukhuma u Kalileya, yaahoona citthu ciiranyaale .
50 Ahaavo nlopwana mmoca eehaniya Yusufu, aapanka mphantte itiripunaali yaahooleli ya ayuuta; uyo nlopwanooyo aari ooreera nrima ni nasariya.
51 (Uyo nlopwanooyo kaatthunne ni kaakhavihenre ankhili oomwiiva Yesu). Uyo nlopwanooyo aari olapo yo Arimateya isittatti yo u Yuuta,ni anweherera Umwene wa Nluku.
52 Uyo nlopwanooyo aahorwa wa Pilatu, ni aholepela irutthu ya Yesu.
53 Vano, aahonkumiha wanipottoni vaa, aahonvilinkelela ikuwo yoovevyaala, ni aahonrwaana mmahiye yaathipiye wamwalani, yaari hinavithiya ntthu.
54 Naari nihuku naatthenkaciya isaapatu, ni waahaleela vakaani uphiya nihuku nosaapatu.
55 Vano, athiyana yantthanre Yesu ukhuma u Kalileya, ciicammo yaahorwa umahiye wiira yoone inanna caavithiyaawe,
56 ni yaahoturuwa wiira yatthenkace makhura oonukhela. Masi nihuku nosaapatu yaahomumula, toko nlamulo naahimyaaya.
