Woovirikana ni apinaatamu, Yesu aakhala wiirimu waaryaawe toko nlaikha hinaaya uyariya watuniyani. (Joau 8:23) Uyo phaapacenre wumpiya ni Nluku ni ahonkaviha wompaawe citthu cikina coothene. Yesu neehaniya “mwaana mmoca” a Nluku, ukhala wiira ula paahi phumpiye ni Yehova naari veekha. (Joau 1:14) Yesu aari Nanrumiya a Nluku, hataa phimaana waneehaniyaawe “Nuulumo.”​—Usome Miruku 8:22, 23, 30; Akolosu 1:15, 16.

Nluku ahonveleeliha Mwanawe watuniyani wiira aayariye ni mwaarusi o Yuda eehaniya Mariya. Coo, paapaawe Yesu khaari pinaatamu. (Luka 1:30-35) Yesu aawenle (1) wiitthuciha ikhweeli ya Nluku, (2) unilakihera mananna oopanka intthunaawe Nluku hataa nikhalaka ni masankiho ni (3) uvaha ukumyaawe toko “moopoli.”​—Unsome Matewus 20:28.

Woopola inkhala iperesu inliveliya wiira atthukuliye ntthu owoopopihiya nuukhwa. (Nkwaha 21:29, 30) Nluku khaapheenle wiira apinaatamu yuuluvale ni walaa akhwe. Nincuwela cani? Nluku ahonhimerya nlopwana oopacera, Atamu, wiira apankaka ile itthu Ibiiblya ineehanaaya “itampi”, aanaahala ukhwa. Coo, unari wiira Atamu khaavanre matampi khaahala ukhwa-tho. (Uphattuwaca 2:16, 17; 5:5) Toko cinhimyaaya Ibiiblya, ukhwa “uhokela” ntuniyani  nlattu wa Atamu. Phimaana, Atamu horulela ucuulwaawe woothene matampi ni nttaruso nikhanlee ukhwa. Ninaapheela woopoliya wiira nilapusiye muukhwani unihiyenryaawe Atamu.​—Usome Arooma 5:12; 6:23.

Tipani aahala unoopola muukhwani? Ukhwa nttaruso no matampiihu. Ukhalawihu oopahuwa khaninkhitiri uliva woopoliya wa ntthu nkina.​—Usome Isaalimu 49:7-9.

Woovirikana ni hiiva, Yesu khaapahuwale. Phimaana uyo khaahala ukhwa nlattu wo matampyaawe—uyo khaarina matampi. Yesu khwaale nlattu wo matampi aatthu akina. Nluku haathoonyihera apinaatamu nifento nuulupale wanrumalyaawe mwanawe wiira akhwe nipuro nihu. Yesu ciicammo honithoonyihera nifentonawe uwiiwelelawawe Athumwaane ni uvaha ukumyaawe wiira noopwee.​—Unsome Joau 3:16; Arooma 5:18, 19.

Moone ividiyu Yesu Khwenleni?

Waaryaawe watuniyani, Yesu ahaavoniha aretta, wummweleliha atthu ookhwa ni ahovukula uhuva wo atthu. Coo, uyo hothoonyihera ile inrwaawe waapankela uhoolo, apinaatamu oothene oomwiwelela. (Matewus 15:30, 31; Joau 5:28) Waakhwilyaawe Yesu, Nluku ahomummweleliha ni pikhalaka nlaikha. (1 Peturu 3:18) Vano, Yesu ahoweherera nonkomale moono nlopwana wa Nluku mpaka Yehova wanvahalyaawe ikuru wiira ahoolele ni akhale Mwene olapo yoothene. (Maberewu 10:12, 13) Ula uwakathyula, uyo rii moolamulela wiirimu ni attharelyaawe anaalalya “ihapari comaana” ntuniyani moothene.​—Unsome Daniele 7:13, 14; Matewus 24:14.

Woohipica, Yesu ni ikuru cawe nari Mwene norwaa umaliha uhuva woothene ni ale ankhuniha mahuviho. Ale anoonihera umwaamini Yesu amwiiwelelaka anaarwaa ulawa ukumi upeephoni watuniyani.​—Usome Isaalimu 37:9-11.