WIIPA icipo yaari ileema ni itthu yofayita ukati wa asarayeli. Ibiibiliya inawaahimya atthu yeepaka macipo ikwaha cinci. Miphantte comaana cikhwaawe co mbiibiliyani, woophiyaaka 10% akhanle macipo. Wootakihera, ilivuru yo Isaalimu, Icipo na Salomau ni Ucukulaca. Ilivuru yokhalayi inuuluma mananna caakhaliyaaya khalayi, ineera wiira Ibiibiliya “inawoonihera sana-saana wiira Asarayeli yaaneepa macipo yavaraka miteko caya.”

Mananna wiipiyaaya khula nihuku. Asarayeli yaaneepaka macipo yahimyaaka citthu caawiira wanrimani waya. (Isai. 30:29) Athiyanaayo yaanoopa ikoma yeepaka icipo ni yaaneena icipo cowaatteeliha nrima mmafestani. Wootakihera, nihuku aathanliyaawe mwene, anatoropa yatthemaka ikhotto awula ifesta yooswaleliya Nluku. (Masuw. 11:34; 1 Sam. 18:6, 7; 1 Mam. 1:39, 40) Asarayeli ciicammo yaaneepaka macipo ooriipiha nrima wiira athoonyere mananna ceecoonaaya akhwaaka ntthu. (2 Ikor. 35:25) Khweeliini, toko cinhimyaaya nthoonyero nimoca, “maheperewu yaari atthu waacivela wiipa macipo”.

Icipo caamwene. Mamwene u Isarayeli ciicammo wanacivela wiipa macipo. Wootakihera, mwene Sawulu aahonwaana Davidi upalaasiyu wawe wiira amwiipele macipo. (1 Sam. 16:18, 23) Ni ukati Davidi waakhanlyaawe mwene, uyo aahopanka ikaruma cinci cowiipeliya macipo, aahiipa macipo oociva ni mpaka aahaathanla atthu wiira yiipe ntempuluni wa Yehova. (2 Ikor. 7:6; Amos 6:5) Ni mwene Salomau ciicammo aahaana alopwanaawe ni athiyanaawe yiipa macipo upalaasiyuni wawe. — Ekles. 2:8.

Macipo wuuswalini. Itthu yofayita cinene ukhalaka wiira asarayeli yaaniipa macipo wiira answalele Yehova. Wiira icuweliye itthu yoohala wiipiya, yanthanliya alopwana oophiyaka 4.000 wiira yiipe ntempulu u Yerusalemu. (1 Ikor. 23:5) Ayo yaanoopa isimbalu, ikaruma yonkhoyi ni mpetta. (2 Ikor. 5:12) Masi, uhiya paahi ale yaacuweliya wiipa hanswalela paahi Yehova, Asarayeli akhwaawe ciicammo yaanonswalela Yehova yeepaka icipo. Enci yaaneepa icipo ukati weettaaya ikwaha yarwaaka u Yerusaleemu wiira yeette isukuhuulu. Macipo makhwaawe yeehaniya Macipo Oowelaniya. (Isaa. 120–134) Toko cowantikhiya cokhalayi co yuuta, asarayeli yaanipa Isaalimu ya Haleeli a ukati wanlyaaya paasikuwa.

Apoovu a Yehova mahukhwaala, anoona ukhala itthu yofayita wiipa icipo. (Tiya. 5:13) Wiipa, unaapanka mphantte uswali wihu. (Efesu 5:19) Ni hiiva, ninaakhala wakhiviru nimayamunneehu nimwiipelaka Yehova icipo nkhayi. (Akol. 3:16) Ciicammo, macipo anaanikavihera yanikhumelelaka masakha oorika. (Mite. 16:25) Khweeliini, wiipa macipo, ikhanle inanna yoothoonyera umwaamini wihu Yehova ni unfeta wihu uyova.