NYUUVA nhopaca waanana masakha veekha? Ninkhala mahuku ookhicera, oosupyaaca ni oorika uvilela. Ni nlattu wo iyo, pooti hiiva uniriipa nrima ni wiicoona ukhala veekha. (2 Tim. 3:1) Masi, hi kaninlamuliya waanana masakha annikhumelela veekheehu. Ibiibiliya inawoonihera mananna apatthani eekhweeli akhanlyaaya ofayita “ukati wo masakha.” —Miru. 17:17.

Apostolu Paulu aahokaviheriya naasipatthannyaawe aaweettanaawe munkwahani wawe weemisiyonaariyu. (Akol. 4:7-11) Ukati Paulu waatthukiyaawe u Rooma, asipatthannyaawe yahonkavihera upanka citthu cinci cahaahalaawe ukhitiri upanka veekhaawe. Wootakihera, Epafrodito aahocisa citthu mayamunna o Filipo yaavaherenryaaya wiira anvahe Paulu (Afili. 4:18) Ni Tíquico aahocisa iwarakha ca Paulu wiira aavahe mmalokoni. (Akol. 4:7.) Akaviheriyaka naayo asipatthannya waayo, Paulu ahokhitiri uvara ntekwaawe woolalyeera hataa waatthukiyaawe uwannyawe awula ukhattya. Vano mahukwaala, manannani nnohaleenyu ukhala apatthani eekhweeli?

Mahukwaala, mayamunna menci anawoonihera isiyani apatthani eekhweeli inlamuliyaaya waapankela atthu akhwaawe. Nttwee noone ntakihero nimoca naarokorihu yoonihenre ukhala apatthani eekhweeli naanuunu amoca yaari piyoneera owiicaverya o Espanha aneehaniya Elizabete. Ukati anumwanaya anuunu Elizabete yaawerennyaaya iretta yo cancro, anuunu yanwantikhela imensagem coolipiha anuunu Elizabete yavarelaka nteko iveerusu co mbiibiliyani. Anuunu Elizabete aneera, ukati miiva koonaaka imensagem caya, kankhala ootteeliya cinene nlattu woocuwela wiira ahaawo ankupuwela ni iyo yankikavihera ukhalana ikuru wiira kikhitiri waanana masakha yaakikhumelela.” —Miru. 18:24.

Hiiva pooti wanlipihaceehu upatthaniihu ni mayamunneehu naarwaananaka nkhayi umikutthaanoni ni wuulalyeerani. Wootakihera, nyuuva nnawaavirelaka mayamunna awula mayanuunu owuuluvala wiira mwaarwaanane umikutthaanoni awula wuulalyeerani? Uyo ukhanle ukati hiiva ninlamuliyeehu ulipihana. (Aroo. 1:12) Masi mayamunna makhwaawe khankhitiri ukhuma uwannyaya. Manannani ninhaleehu waakavihera ayo mayamunnaayo?

Mayamunna makhwaawe khankhitiri woona mikutthaano Usalauni yo Umwene, atthunaka nlattu wo iretta inaawerya awula citthu cikhwaawe. Moone ntakihero nimoca naamunna amoca aneehaniya Davidi yaawerennya iretta ineehaniya linfoma. Nlattu wo iyo iretteeyo, amunna Davidi yahaana yakhalaka uwaani wiira atafitiye. Yooyo ukatyuuyo, ayova nkhayi naamwaaraya aneehaniya Lidia yoona mikutthaano anari uwannyaya.

Manannani mayamunna o wanlokoni yaakaviheryaaya? Wuumaleloni khula nkutthaano, mayamunna  yaanalikarela yavarelaka nteko ividiyu yo chamada wiira awoopane mwaha amunna nkhayi amwaaraya. Uhiya commo, amunna Davidi ni amwaaraya yavahaka ikomentaariyu caya, mayamunna yanwantikhela imensagem wuumaleloni wo khula nkutthaano. Manannani iyo yaakavihenryaaya amunna Davidi ni amwaaraya? Ayo yaheecoona ufentiya ni ukhala wakhiviru ni mayamunna.

Nnoonela cani unlehananna munna awula nuunu hinkhitiri ukhuma wapuwani wiira munrwaanane wuulalyeerani? Atthunaka nyuuva nnolamuliya upanka marukunuso wiira nvare nteko nkhayi nuuyo. Naayo manannaayo, ayo anaahala ukhitiri woonenela wiira khaliyaliye. (Miru. 3:27) Atthunaka nyuuva pooti ukumiha ukati wiira mwantikhe iwarakha awula ulalyeera ni telefoone. Ni mahumu pooti uhimya wiira nkutthaano wookhumiya wuulalyeerani pooti wampankiyaaya ivareliyaka nteko ividiyu yo conferencia. Amunna Davidi ni anuunu Lidia yaahosukhuru niitthu mayamunna o wanlokoni yaapankilyaaya. Amunna Davidi aneera: “Nlattu wonvarela nteko telefooni wiira niviriyane nkutthaano wookhumiya wuulalyeerani ni uviriyana nivekelo waahonikavihera cinene.” Uhiya commo, wakhitiryaaka vale, nyuuva pooti uncisa namasoma Ibiibiliya mmoca mwanrwaananaka uwannyaya amunna awula anuunu ahinkhitiri ukhuma wapuwani.

Navaraka nteko nkhayi nimayamunna ahinkhitiri ukhuma wapuwani, ninaakhalana ukati wo woona makhalelwaaya omaana ni ulipihaca upatthaniihu naayova. Ni hiiva ciicammo, ninaahala wiitthucera mananna cinvarelaaya nteko Ibiibiliya wiira yaavare nrima atthu akhwaawe. Uhiya commo, nyuuva nnahala ukhitiri waapanka apatthani o naanaano mwaakaviheraka mayamunna makhwaawe wiira avare nteko woolalyeera ni woona mikutthaano.—2 Akor. 6:13.

Ukati Paulu waavirihilyaawe masakha, mpatthannyaawe Titu aahorwa mpanka nipuro naaryaawe ni iyo yaahonkavihera Paulu wiicoona ukhala saana. (2 Akor. 7:5-7) Unaareera wuulumela mayamunna moolumo oolipiha. Masi, ntakihero na Titu ninawoonihera ciicammo wiira pooti wanaamaaliheehu mayamunneehu navirihaka ukati nkhayi naayova ni napankaka itthu wiira naakavihere.—1 Jo. 3:18.

Mayamunna ni mayanuunu o Russia ahonivaha ntakihero nomaana mananna owaakavihera atthu akhwaawe. Moone itthu yaakhumelenle amunna amoca aneehaniya Sergey ni amwaaraya Tatyana. Ukati mapolisiya waakenlyaaya uwannyaya, ayo yahocisiya ni yahorwaaniya utiripunaali. Anuunu Tatyana phapacenre uleviya ni yahohoolela uwaani. Amunna Sergey aneera: “Anuunu Tatyana uphiya waya uwaani, anuunu amoca oolipa nrima yaahowa mpanka wapuwani wihu. Ni hataa mayamunna makhwaawe yaahowa unikavihera ukwecakweca ni ulokihaca mpani wihu.”

Amunna Sergey aneera: “Mi inaakicivela cinene iveerusu ya Miruku 17:17 ineera: “Mpatthani eekhweeli naafenta ukati wotheene ni nkhala munnaawe ntthu ukati wo masankiho.” Ala moolumwaala aheeranya ukati kaalupatthiyaka, ukhala wiira akakhitiri waanana masakha otheene veekha. Yehova hokivaha asipatthannyaaka yahoova ukhala nkhayi nihiiva.” a

Nuuwakatyaaya, hiiva ninaahala waanana masakha oorika cinene. Phimaana, ninaahala waapheela apatthani anhaleehu waakhuluvela. Ni ukati wo masakha moolupale, ninaahala waapheela ayo apatthannyaayo ciicammo. Vano, ula ukhanle ukati unlamuliyeehu wiikurumica wiira nikhale apatthani eekhweeli!—1 Pet. 4:7, 8.