KHALAYI, nsatoro aawacera inupa awula ikhutu ya ntthu nkiina. Moolumo oluuka iheperewu ni ikereeku antaphuleliya “nsatoro,” ukati nkiina ammwaaca ntthu aavahaceriya uwacera inupa.

Yusufu, mwaana mmoca a Yakopi, aari ipottha Wiciipitu, masi ahokhala nsatoro wapuwani wa Putifari, apwiiyaawe. Toko cinthoonyeraaya Ibiiblya, “Putifari ahohiya mmatatani mwa Yusufu citthu cotheene caarinaawe.” (Upha. 39:2-6) Wahoolo, ukati Yusufu waakhanlyaawe nhooleli muulupale Wiciipitu, uyo ahonthanla nsatoro wiira awacere inupaawe.—Upha. 44:4.

Ukati wa Yesu, asineene ikhutu, imaara cinci yaakhala uttayi ni mapuro waaryaaya ikhutu caya. Phimaana, ayo yaanawaavahacera mansatoro wiira awacere miteko caavariya mmakhutuni waya.

Tipani aalamuliya ukhala nsatoro? Namantikha mmoca o Roma neehaniya Columela, aakhanle ukati woseekulu yoopacera, hohimya wiira ipottha yaavahaceriya uwacera inupa awula ukhala nsatoro, yaalamuliya ukhala ntthu “eetthucale uvara nteko ratta.” Uyo aalamuliya ukhala ntthu aakhitiri “uhoolela ratta ni woohikhirini.” Columela ciicammo heera: “Venci-venci, cole phinlamuliyaawe ukhala uyo ntthuuyo—uyo khanlamuliya wiicoona wiira naacuwela citthu cihincuwelaawe ni, khula ukati, haana apheelaka wiitthuca.”

Nuulumo na Nluku ninaalattaniha miteko cinvariya wanlokoni neekristau ni nteko waakhalanaawe nsatoro. Wootakihera, apostolu Peturu nansoveriha khula nkristau uvarela nteko ucuwelaca uvahiyaawe ni Nluku wiira “aavarele nteko akhunanawe khampa nsatoro o maana oonironya a Nluku.”—1 Pet. 4:10.

Yesu ciicammo ahohimya ntakihero no nsatoro niri nhina ilivuru ya Luka 16:1-8. Uhiya iyo, nhina inatiri yo ukati waahalaawe uwa khampa Mwene, Yesu ahaakhuluveliha attharyaawe wiira aanaahala uthanla “ipottha yookhuluvelya ni yankhili,” awula “nsatoro ookhuluvelya.” Ntekwaawe uyo nsatorooyo, waahala ukhala uhihiya waavaha atthari a Kristu iyoolya yoominepani ukati wo mahuku ookhicera. (Mat. 24:45-47; Luka 12:42) Ninaasukhuru cinene hiivano ukhala iriyari waya ale anaakhela ilivuru nsatoro ookhuluvelya cintthenkacaawe ni cinkumiheraawe ntuninyani motheene.