1 Samweli 22:1-23
22 Fwandi Devedi wafumile uku Gati, autukila ukwi cele lya ku Adulamu. Lino aina yakwe na ya lupwa yakwe isi yonsi yuvwile vivyo, yamulondiile kuuku kwene.
2 Nupya yonsi aali umu ntazi, aali ni nkongole, na ali nu ulanda yaile kuli aliwe nawe wizile aya intunguluzi yao. Aonsi aali nawe yaali umupiipi na 400.
3 Lyene Devedi wafumile uku Adulamu aya uku Mizipa ku Moabu nupya wanenyile umwene uwa ku Moabu ati: “ Napaapata leka ya tata na ya mayo ikale kukwene kufikila lino ndamanya vino Leza alancitila.”
4 Fwandi wayasiile uku mwene wa ku Moabu nupya ikazile kuuku kwene pa nsita yonsi ino Devedi wafisime.
5 Lino papisile insita kasesema Gadi wanenyile Devedi ati: “Fuma muno wafisama. Yanga uku mpanga iya mutundu wakwe Yuda.” Fwandi Devedi wafumileko nu kuya uku mpanga iya Heleti.
6 Saulo uvwile ukuti Devedi na antu yano wali nayo iyayazana. Lyene Saulo wikazile umu Gibeya mwisika lya muti wa tamalisiki pa ncende itumpuke ala alemile ni sumo nupya aomvi yakwe yonsi ala iyamuzinguluka.
7 Lyene Saulo wanenyile aomvi yakwe aamuzingulwike ati: “Uvwini kuno mwe Ina Benjamini. Uzye mwana Yese alamupeela impanga ni vyalo vya myangazi mwensi? Uzye alamusonta mwensi ukuya intunguluzi pa yantu masauzandi na pa yantu maandiledi?
8 Mwensi kwene imupangana ukuti munkatukile! Kusi nanti awenga pali mwemwe uwanenyileko lino umwanane uwa kuivyalila wapangine upangano na mwana Yese! Nupya kusi nanti awenga pali mwemwe uwanguvwilile uluse nu kuneena ukuti umwanane uwa kuivyalila aatatunka umuomvi wane kuti ankatukile wakwe vino cili ndakai.”
9 Lyene Doegi Umwina Edomu uwapeezilwe amaka ya kutungulula aomvi yakwe Saulo aali papa kwene waswike ati: “Naweni mwana Yese ala akuya uku Nobu kuli Aimeleki mwana Aitubi.
10 Nupya uzizye kuli Yeova pa mulandu na aliwe, wamupeezile ni vyakulya. Wamupeezile nu lupanga lwakwe Golyati Umwina Filisti.”
11 Lilyo kwene sile umwene watumile aakuyaama Aimeleki mwana Aitubi simapepo na ya simapepo yonsi amu lupwa lwakwe isi aali umu Nobu, fwandi yonsi izile uku mwene.
12 Lyene Saulo walanzile ati: “Uvwa kuno we mwana Aitubi!” nawe waswike ati: “Nkuvwa, musambazi wane.”
13 Lyene Saulo wamuzizye ati: “U mulandu ci uno umupangana na mwana Yese pakuti munkatukile, pa kumupeela umukate nu lupanga nu kuzya kuli Leza pa mulandu na aliwe? Wene akanteyamila pakuti anzanze wakwe vino cili ndakai.”
14 Aimeleki waswike umwene ati: “Uzye a weni pa yaomvi yako yonsi uwatailwa wakwe Devedi? Wene a sivyala wa mwene, akaangalila aakakucingilila nupya wacindikwa umu ng’anda yako.
15 Uzye ilelo ali muku wa kutandikilako ukumuzizya kuli Leza? Ntanga ncite vino ukwelenganya! Si umwene atasokela ne muomvi wakwe na amu ng’anda yakwe tata yonsi, pano ne muomvi wako ntamanyile icili consi pi lyasi lii.”
16 Nomba umwene wanenyile Aimeleki ati: “Umafwa kumwi na amu ng’anda yakwe tata wako yonsi.”
17 Lyene umwene wanenyile amulindanga ati: “Komini ya simapepo yakwe Yeova, pano yali uku lusansa lwakwe Devedi! Yaamanyile ukuti akangutuka, nomba yatanenyile!” Lelo aomvi ya mwene yatalondanga ukukoma ya simapepo yakwe Yeova.
18 Lyene umwene wanenyile Doegi ati: “Koma ya simapepo!” Lilyo kwene sile Doegi Umwina Edomu wakomile ya simapepo. Wakomile aonsi 85 aazwite efodi.
19 Nupya wakomile na antu amu musumba wakwe ya simapepo uwa Nobu, wakomile aonsi na anaci, ana nu tunya, nupya wakomile ni ng’ombe, ya punda, ni mfwele.
20 Nomba Abiata umwana wenga pali ya mwana Aimeleki mwana Aitubi utwike nu kukonka Devedi.
21 Abiata wanenyile Devedi ati: “Saulo watakoma ya simapepo yakwe Yeova.”
22 Lyene Devedi wanenyile Abiata ati: “Lino naweni Doegi Umwina Edomu pa wanda uuwa namanyile ukuti wali nu kuyanena Saulo. Nene nalenga ukuti amu ng’anda yakwe tata wako yonsi yakomwe.
23 Ikala nani. Utuvwa intete, pano wensi aakulonda ukukukoma ala akulonda ukunkoma nani kwene; namakucingililanga.”
