1 Samweli 31:1-13
-
Saulo na ana yakwe aonsi yatatu yafwa (1-13)
31 Aina Filisti yalwanga na Ina Izlaeli. Aina Izlaeli yutwike Aina Filisti nupya aingi yakomilwe pa Mwamba wa Giliboa.
2 Lyene Aina Filisti yapalamile kuli Saulo na ana yakwe aonsi, nupya yakomile Yonatani, Abinadabu, na Malikisyua, ya mwana Saulo aonsi.
3 Ulwi wakomiile Saulo, nupya aali na maulapwa yamuzanyile nu kumucisa sana.
4 Lyene Saulo wanenyile uwamusendelanga ivyanzo ati: “Tola ulupanga lwako nu kunkoma pakuti aonsi yaa aatazembululwa yatiza yankome ukwaula uluse.” Lelo uwamusendelanga ivyanzo wakanyile ukumukoma pano uvwile sana intete. Fwandi Saulo watozile ulupanga nu kuponelapo.
5 Lino uwamusendelanga ivyanzo waweni ukuti Saulo watafwa, nawe kwene waponiile pa lupanga lwakwe nupya wafwile.
6 Vikwene avino Saulo, ana yakwe aonsi yatatu, uwamusendelanga ivyanzo, na aonsi yakwe yonsi yano wali nayo yafwile pa wanda kwene uuwa.
7 Lino Aina Izlaeli aikalanga umu ncende ya mu mukonko na aikalanga umu ncende ya Luzi Lwa Yodani yaweni ukuti Aina Izlaeli iyutuka nu kuti Saulo na anakwe iyafwa, yatandike ukuutuka kufuma umu misumba, na Ina Filisti iizile nu kutandika ukwikala mu misumba iiyo.
8 Uwanda uwalondelilepo lino Aina Filisti yaile umukusenda ivintu vyakwe yano yakomilwe, yazanyile Saulo na ana yakwe aonsi yatatu ala iyafwa pa Mwamba wa Giliboa.
9 Lyene yaputwile Saulo umutwe nu kumuzula ivyakuzwala vyakwe ivya mu ulwi nupya yatumile antu mu mpanga yonsi ya Ina Filisti pakuti yasalanganye ilyasi mu mang’anda ya vilubi vyao alino nu mu yantu.
10 Lyene isile ivyakuzwala vivyo mu ng’anda ya vinkolanya vyakwe Asyitaloti nupya yapopiile citumbi cakwe uku ciumba ca Beti-syani.
11 Lino aikalanga umu Yabesyi-gilyadi yuvwile vino Aina Filisti yacisile kuli Saulo,
12 asilika yonsi yakatwike nu kupita usiku onsi nupya yaile iyatola icitumbi cakwe Saulo ni vitumbi vya yana yakwe aonsi ivyapopiilwe uku ciumba ca Beti-syani. Yaswilile uku Yabesyi nupya kuuku kwene akuno yaile iyocela ivitumbi vivyo.
13 Lyene yasenzile mafupa nu kuya yaziika umwisika lya cimuti ca tamalisiki mu Yabesyi nupya ikazile ukwaula kulya pa manda 7.
