Isamu 51:1-19
Ku mukalamba wakwe ya kiimba. Ulwimbo luno Devedi wimvile lino Natani kasesema waile kuli aliwe pa cisila cakuti Devedi wacita ucende na Batisyeba.
51 Nguvwile uluse we Leza ukulingana nu kutemwa kwako ukwa cumi.
Fuuta ukuluvyanya kwane ukulingana nu luse lwako ulukalamba.
2 Umfule ningo ningo uku kuluvyanya kwane,Nupya unsangulule uku luyembu lwane.
3 Pano imanya ningo ukuluvyanya kwane,Nu luyembu lwane lwaya pa nkoleelo yane lyonsi.
4 Wewe sile injembukila;Incita iviipe kuli wewe.
Fwandi wemo wewe mulungami nga walanda,Ukapingula umu ulungami.
5 Lola! Navyalilwe umu kuluvyanya,Nupya mayo wane wankwatiile umu luyembu.
6 Ukatemwa ndi cakuti umuntu u wa cumi umu mwenzo;Sambilizya umwenzo wane mano ya cumi cumi.
7 Nsangulule uku membu zyane ukuomvya kamuti kakwe isopu, pakuti inje umusanguluke;Mfule pakuti nswepe ukucila usu wa mvula.
8 Leka nuvwe iviunda vya nsansa nu kusansamuka,Pakuti mafupa yano watamola yazange.
9 Fumya icinso cako pa membu zyane,Nupya ufuute ukuluvyanya kwane konsi.
10 We Leza, lenga umwenzo wane ukuya usanguluke,Nupya usenule imyelenganyizizye yane pakuti inje uwa cisinka.
11 Utanzinga pa nkoleelo yako;Nupya utafumya umupasi wako uwa muzilo pali nene.
12 Mbwezezye insansa zya kupususya kwako;Lenga ukuti naitemelwa ukukuvwila.
13 Ndasambilizya ya kacita ya viipe inzila zyako,Pakuti ayembu yace yawele kuli wewe.
14 Mpususye uku mulandu wa wazi we Leza, kapususya wane,Pakuti ululimi lwane lungasimika ni nsansa pa ulungami wako.
15 We Yeova, yula imilomo yane,Pakuti kanwa kane kakulumbanye.
16 Usilonda ilambo pano nga cali vivyo, ningalipeela kuli wewe;Usisansamukila umwi lambo lya koca ilipuma.
17 Malambo aakazanzya Leza u mwenzo wa ulanda;Umwenzo wa ulanda we Leza utalaukana.
18 Pa mulandu nu uluse lwako citila Zioni icisuma;Kuula iviumba vya Yelusalemu.
19 Lyene ulasansamukila umu malambo ya ulungami,Mu malambo ya koca nu mu malambo aapuma;Lyane ya cipambasi yalapeelwa pa ulambo wako.
