ANTU aingi yamanya ilyasi ilikalanda pali vino Yesu wapopiilwe pa cimuti pakasi ka vipondo viili. (Mate. 27:35-38) Nomba antu yamwi yazumila ukuti vino Baibo ikalanda ukuti lino papisile insita yatoozile umwili wakwe Yesu nu kuyauzika umwi lindi visi vya cumi.—Mako 15:42-46.

Aakakanya ivyalembwa umu Mabuku ya Malandwe yakatwisika ukuti umuntu wino iyakoma pa mulandu wakuti watacita vimwi yatange yazumilizye ukuti yamuziike umwi lindi wakwe vino yakaziika antu yonsi. Lelo, yazumila ukuti kwali vyuze vino yacitanga uku yantu ya musango uwo. Kalemba wa malyasi umwi walemvile api lyasi lii ukuti: “Ukupopela umuntu pa cimuti ali nzila ino yafulwilangamo antu aacitanga ivintu iviipe, nupya aasambilila yamwi yatiile cisi ca mano ukwelenganya ukuti aina Loma yangazumilizya ukuti umuntu wa musango uwo apeelwe umucinzi wa kuzikwa wakwe vino antu yonsi yakazikwa.” Aina Loma yalondanga ukuzewanya sana antu yano yalolanga ukuti i vipondo, fwandi ivitumbi vyao vikalanga pa vimuti kwene pakuti inyama zingiza zilye. Lyene pa cisila ivyasyala yavisumbanga muno yazikanga antu yonsi.

Malyasi aakalanda pa vya mpiti yalandako vimwi ivipusane pa vilundwa ivyasyalangapo ivya Yayuda yamwi aakomilwe. Umu 1968, yazanyile mafupa ya monsi umwi wino yapoopiile pa cimuti umu nsita ino Yesu wali pano nsi. Yayazanyile umukasi ki lindi lya lupwa lwa Ayuda umupipi na Yelusalemu. Mafupa asyala yali umu kambokosi kakusungilamo mafupa. Amuno yazanyile ni ifupa lya pa cintunta. Yalipoopiile ukwi pulanga nu lusunga ulwatalimfile masentimita 11.5. Kalemba wa malyasi wino itulandapo mpiti watiile: “Ifupa lii lya pa cintunta lyali i lyamonsi wino yatangi Yeokanani, lyalenzile antu yasininkizye ukuti vino malyasi aya umu Mabuku ya Malandwe yakalanda ukuti Yesu yamuzisile umwi lindi i vya cumi. Fwandi “Ifupa lya pa cintunta cakwe Yeokanani likalangilila sile ukuti aina Loma yazumilizyanga Ayuda akomwanga ukufuma lino Yesu wali pano nsi ukuziikwa.”

Kufwile kwaya ivingi vino antu yakalanda pali vino yapoopiile Yesu ukulingana na vino ifupa lyakwe Yeokanani likalangilila. Nomba icamanyikwa ningo i cakuti ivipondo vimwi vyene yatavizikanga nanti ukuvisumba. Ukwaula nu kutwisika, tungataila ukuti vino Baibo ikalanda ukuti umwili wakwe Yesu yawisile umwi lindi i vya cumi. Ivintu vimwi vino yazana vikalangilila ukuti vino Baibo ikalanda pali Yesu i vya cumi.

Ni cicindamisye i cakuti, Yeova wasoowile ukuti Yesu wali nu kuzikwa umwi lindi lya monsi umwi umukankala nupya kusi uwali nu kulesya amazwi yakwe Leza ukufikiliziwa.—Eza. 53:9; 55:11