UMWI angavulunganyiziwa sana ndi cakuti iya nanti umuci asi ni cisinka. Ukulanda sile icisinka, yamwi yakaelela ya wao ndi cakuti yalapila nu kuya ya cuza nupya. * Nomba nanti icakuti yangatwalilila ukuya umu cupo nanti foo, yonsi aakaiza yamanya ukuti ya wao yataali ni cisinka ilingi yakacula sana nu kuwaikwa umwenzo. Uzye antu ya musango uwo yangacita uli pakuti yatawaikwa?

Asi mulandu nu ulanda uno mungakwata, ya iya ingi nanti aci aakaele yakateekeziwa na Malembelo. Yasambilila ukuti Leza akalola aminsozi yao nupya akayalanga icikuuku.—Malaki 2:13-16.

“Amizu yane nanti yangamvulila uli, wemo ukantekezya nu kunsansamusya.”—Masamu 94:19.

Ya Bill yakaiusya ukuti: “Lino nawelenganga ilembelo lii, nelenganyanga ukuti Yeova akumyalalika wakwe vino isi uwaya ni cikuuku akacita.”

“Yeova u wa cumi ku antu acumi.”—Masamu 18:25.

Ya Carmen yano ya wao yataali ni cisinka pa myezi ingi yalondolwile ukuti: “Ya wane yataali ni cisinka. Nomba nataile ukuti Yeova wali nu kutwalilila ukuya uwa cisinka kuli nene. Ataali nu kuntazyela.”

“Mutasakamikwa pa cintu cili consi, lelo pepini pa mulandu wa vintu vyonsi, mule mukulenga Leza . . . nawe alamupeela mutende uno kusi umuntu nanti wenga angaumanyikisya. Mutende kwene uu, ulatungulula umi winu ni myelenganyizizye inu.”—Filipi 4:6, 7.

Ya Sasha yalanzile ukuti: “Nawelenganga ilembelo lii imiku ni miku. Nupya napepanga sana ukulenga Leza ukuti ampeele umutende.”

Yonsi yano itulandapo papela yalondanga ukutoovoka insita zimwi. Nomba yataile Yeova Leza nupya malembelo yayakomizye. Ya Bill yalanzile ukuti: “Utailo wane walenzile umi wane ukuzipa lino vyonsi vyalolekanga ukuti ivyononeka. Nanti i cakuti pa nsita imwi napisile ‘umu mukonko uufitisye’ Leza wali nani.”—Masamu 23:4.