Mu nzila ili imwi kwene, swensi tukwikala umu manda atale lino “icimuza icipisye” cili mupipi nu kwiza, Yesu walondolwile insita iyo ukuti “ucuzi ukulu cuze.” (Mateo 24:21, NWT) Tutange tuutuke icimuza cii nomba pali vino tungacita pakuti tucingililwe. Tungacita uli?

Umwi Lyasi Lyakwe Ilya pa Mwamba, Yesu Klistu wapanzileko antu amano ukuti: “Mu cifulo cakwe cii mutale mulonde Uwene wakwe Leza nga nu wololoke wakwe.” (Mateo 6:33) Uzye tungacita uli vivyo?

Mwalonda Uwene Wakwe Leza inkoleelo. Cii cikupiliula ukuti tulinzile ukulola Uwene Wakwe Leza ukuti wacindama ukuluta icili consi. (Mateo 6:25, 32, 33) U mulandu ci uno tulinzile ukuulolela vivyo? A pa mulandu wakuti antu yatange yasisyepo intanzi zino antunze yakakwata. Uwene Wakwe Leza sile uungaomba umulimo uu ukome.

Mwalonda uwololoke wakwe. Tulinzile ukwezya na maka ukulondela masunde yakwe Leza aololoke ni visinte. U mulandu ci? Pano ndi cakuti tukuipingwila sweineco ivisuma ni viipe, ivintu vitalatuzipila. (Mapinda 16:25) Nomba ndi cakuti tukulondela masunde yakwe Leza, tulazanzya Leza nupya tulaya ni nsansa.—Ezaya 48:17, 18.

Twalililini ukulonda Uwene wakwe Leza inkoleelo nu wololoke wakwe. Yesu watucelwile ukuti, yamwi yangapumbulwa nu kutandika ukwelenganya ukuti yangacingililwa ndi cakuti yakukwata sana impiya. Yauze nayo yangaomvya sana insita ikulu na maka ukwezya ukumala intazi zino yakweti icakuti  yavilwa nu kukwata insita yakulonda Uwene Wakwe Leza.—Mateo 6:19-21, 25-32.

Nomba, Yesu watulavile ukuti yonsi aakatungilila Uwene Wakwe Leza yalakwata vyonsi vino yakalondekwa nu kuipakizya amapaalo aingi uku nkoleelo amanda pe.—Mateo 6:33.

Nanti icakuti asambi yakwe Yesu aaliko umu nsita ya Aina Klistu ya kutandikilapo yalondanga Uwene Wakwe Leza inkoleelo nu wololoke wakwe, yataweniko ukusila kwa kucula konsi. Nomba yacingililwe. Yacingililwe uli?

Iikalanga ukulingana na masunde yakwe Leza, nupya cico calenzile yacingililwe uku ntazi zyonsi zino antu atuvwilanga Leza yakwatanga. Vino yataile sana ukuti Uwene wali nu kwiza vyalenzile yazizimizye ni ntazi izikome. Nupya Leza wayapeelanga “maka ya umi” pakuti yayazimizye intazi zino yakweti.—2 Kolinto 4:7-9.

Aina Klistu aaliko umu nsita ya atumwa yuvwilanga vino Yesu wayanenyile ukuti yalinzile ukulonda Uwene inkoleelo. Yasimikilanga ilandwe lisuma ilya Wene umu ncende zyonsi umu nsi. (Kolose 1:23) Uzye kuli aakacita vivyo ndakai?

Ee! Ya Nte Yakwe Yeova yamanya ukuti likwene sile Uwene Wakwe Leza wasya usisyepo iviipe vyonsi ivyaya pano nsi. Fwandi yakaezya na maka ukuomba umulimo uno Yesu walondolwile ukuti: “Ni Landwe Lisuma lii lya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliiza.”—Mateo 24:14.

Uzye mwakulalola uli ilandwe lisuma? Tukumukomelezya ukuti mwakolanya Aina Klistu aakutandikilapo aikalanga umu musumba wa Makedoniya uwayelile uku Belea. Lino yuvwile ilandwe lisuma ilya Wene uku mutumwa Paulo, yazumile ilandwe lilyo nu “muzonda.” Lyene yalondelezyanga umu Malembelo pakuti yasininkizye vino yuvwile nupya yatandike ukucita vino yasambilile.—Milimo 17:11, 12.

Namwe kwene mungacita vivyo kwene. Nga mukulonda Uwene Wakwe Leza inkoleelo nu wololoke wakwe, mulacingililwa ndakai nupya mulaya nu mutende amanda pe.