U Mulandu ci Uno Tukaculila, Kukota, nu Kufwa?
Kaumba witu akatulola wa yana yakwe. Fwandi asilonda ukuti twacula. Nomba nanti ciye vivyo umu nsi mwaya ucuzi. U mulandu ci uno cayela vivyo?
Avyazi Itu Aakutandikilapo Aalenga Ukuti Twacula
“Uluyembu lwingilile umu muntu wenga pano nsi alino ni mfwa nayo ingilile umu luyembu, ali cino imfwa yasalanganila uku yantu yonsi.”—LOMA 5:12.
Leza waumvile avyazi itu aakutandikilapo, kuli kuti Adamu na Eva na melenganyo alino ni miili ivimalilike. Nupya waisile umu paladaise ino yamaanga ukuti calo ca Edeni. Wayanenyile ukuti yangalya ivizao vya ku miti yonsi, ukufumyako sile ivya ku muti onga. Lelo Adamu na Eva yasoolwilepo ukulya ivizao vya ku muti uno yayalesizye, nupya ukucita vii lwali uluyembu. (Utandiko 2:15-17; 3:1-19) Lino yakanyile ukuya ni cuvwila, Leza wayazinzile umu calo ca Edeni, nupya yatandike ukucula. Lino papisile insita, yizile iyakwata ana, nupya nayo kwene yatandike ukucula. Yonsi kwene yakosile nupya yafwile. (Utandiko 3:23; 5:5) Tukalwala, kukota, alino nu kufwa pa mulandu wakuti twafuma kuli Adamu na Eva.
Mipasi ya Nkota Nayo Kwene Ikalenga Twacula
“Insi yonsi ikatungululwa nu mwipe.”—1 YOANI 5:19.
“Mwipe” wiyo akaamwa ukuti Satana. A malaika aasiloleka uwapondokile Leza. (Yoani 8:44; Kusokolola 12:9) Lino papisile insita, ya malaika na yauze yakolinye Satana. Yakaamwa ukuti iviwa. Ya malaika yaa aipe yakaomvya amaka yano yakwata pa kubepa antu nu kulenga ukuti yatauvwila Kaumba. Yakalenga ukuti antu aingi yacita iviipe. (Masamu 106:35-38; 1 Timoti 4:1) Satana ni viwa yakatemwa ndi cakuti antu yakucula.
Insita Zimwi Zyene A Sweineco Tukalenga Ukuti Twacula
“Consi cino umuntu akukomela, acino alazombola.”—GALATIYA 6:7.
Tukacula umu nzila izipusanepusane pa mulandu nu luyembu luno twapyana na pa mulandu ni viipe vino Satana waleta umu nsi. Lelo insita zimwi zyene antu yakailetela sile macuzi. U mu nzila ci? Ndi cakuti antu yakucita iviipe nanti yasikupingulapo ningo pa vintu, iviipe vikayacitikila. Lelo ndi cakuti antu yakucita ivisuma, visuma vikayacitikila. Wakwe, ndi cakuti iya nupya isi waya ni cisinka, akaombesya, nupya watemwa ulupwa lwakwe ivingi ivilacitika vilaya ivisuma nupya alalenga umu lupwa muye insansa. Lelo umuntu aakasitika, ukumwa sana uwengwa, nanti umukasu akalenga ulupwa lwakwe ukuya ulupiina. Fwandi cacindama ukuti twauvwila Kaumba witu. Akalonda ukuti twaipakizya ivisuma ivingi, ukwikako sile nu “mutende ufumaluke.”—Masamu 119:165.
Tuli Umu “Manda ya Kusyalikizya”
“Umu manda akusyalikizya . . . , antu yalaitemwa, yalatemwa impiya, . . . aasiuvwila avyazi yao, . . . aasiyikaanya, aankalwe, aatatemwa usuma.”—2 TIMOTI 3:1-5.
Ndakai, antu aingi yakacita vikwene ivyasowilwe api lembo lii. Vino yakacita vikapeela usininkizyo na uze uwakuti tuli “umu manda yakusyakizya” a nsi ii. Nupya Malembo yasoowile ukuti umu manda yakusyalikizya mulaya inkondo, vipowe, vilundumusi vikalamba, ni ndwala. (Mateo 24:3, 7, 8; Luka 21:10, 11) Ivintu vii vikalenga twacula alino nu kufwa.
