AVYAZI
7: Miyele Isuma
VINO CIKAPILIULA
Mwe avyazi mwakwata masunde yano mukasoolola ukuti mwalondela. Mufwile mukaezya na maka ukuya acisinka muli vyonsi. Ndi mukacita vivyo ale mukalonda ukusambilizya ana inu ukuya ni miyele isuma.
Nupya mulinzile kusambilizya ana inu ukuti cacindama sana kuombesya, ukuya nu mulinganya, nu kulangulukilako yauze, nupya imiyele yii yangaisambilila ningo lino yacili ance.
CISINTE CA MULI BAIBO: “Sambilizya umwana inzila yakupitamo. Lino alakota atalafuma mwenemo.”—Mapinda 22:6.
CINO CACINDAMILA
Umu nsi yii umwaya ivyakupangapanga, cacindama ukusambilizya ana imiyele isuma. Umuvyazi umwi umwanaci uwi zina lyakuti Karyn wavwanzile ati: “Pali ndakai misango iipe ingazanwa pa mafoni pa nsita ili yonsi.” Nupya wavwanzile nu kuti “Ana itu yangaatamba ni vitazifile ala naswe tuli nu mupipi, lelo ala tutamanyile!”
CISINTE CA MULI BAIBO: “Antu aikolo . . . aasambiliziwa ningo kupalula visuma ni viipe.”—Ayebulai 5:14.
Cacindama sana ukwelenganya pali yauze. Mukucita vii mwaya nu kucita utuntu utwakulangilila umucinzi (wako ukulanda ukuti “mukwai” na “nataizya”) alino nu kulanga ukuti mwikako amano kuli yauze. Umu nsi yii antu yasiikako sana amano uku yauze, lelo yakaika sile amano kuli vino aeneco yakulonda wakwe uku mafoni, makompyuta na vyuze.
CISINTE CA MULI BAIBO: “Vino mungatemwa kuti antu yamucitile avino namwe kwene mwayacitila.”—Luka 6:31.
VINO MUNGACITA
Mwayasambilizya ukuya ni miyele isuma. Kulondelezya kumwi ukwaliko kwalangilile ukuti, acance yakataluka ku upulumusi ndi cakuti yasambiliziwa ningo ningo cino upulumusi waipila.
VYAKUCITA: Mungaomvya vimwi ivyacitike likwene lino mukusambilizya ana ivya kuya ni miyele isuma. Wakwe ndi cakuti vino vyacitike ivya unkalwe, mungalanda muti: “Cikaipa sana vino antu aingi yakaya nu unkalwe ku yauze. Mukwelenganya ukuti i cani cikulenga antu kuya vii?”
“Cingatala sana ku ana kusoolola icisuma nanti ciipe ndi cakuti yatamanyile cisuma ni iciipe.”—Brandon.
Mwasambilizya ana ukwika mano kuli yauze. Nanti sile ana anono yangasambilila kulanda nu “mucinzi” nu kuti “nataizya” alino nu kucindika yauze. Ibuku limwi (Parenting Without Borders) lyalanzile ukuti, “Ndi cakuti ana yakulola ukuti yataya yonga cingazipa sana, nga yamanya ukuti kwayako nu lupwa, antu ya kusukulu na amu muzi, yalalanga sana icikuku kuli yauze nupya yatalaitemwa.”
VYAKUCITA: Mwapeela ana inu incito zya kuomba pakuti yaelezezya limwi vino yangavwa yauze.
“Ndi cakuti ana yaelezezya limwi ukuomba incito likwene, yatalafilwa kuomba lino yalaikalila. Yalaomba pano ale yaelezya mpiti.”—Tara.
