Ukapepa
Cipande ca kutandikilako muli magazini wii calanzile ukuti antu aingi yakalola Baibo ukuti ibuku lya muzilo. Yakazana ukuti ndi yawelengamo nu kucita vino yawelenga, yakapalama sana kuli Leza nupya yakamanya umulandu uno yayela pano nsi.
Baibo ndi yalanda pa mupasi wakwe Leza ikalozya uku miyele nanti icintu cimwi icingazwa muntu mu umi wakwe. (Yuda 18, 19) Antu asilonda ukuti Leza ayatungulula yakacita sile vino yakulonda aineco, nomba antu akalonda ukutungululwa na Leza yacindika sana vino akalonda ukuti twacita.—Efeso 5:1.
UPALILO
CISINTE CA MULI BAIBO: “Nga watoovoka ala amaka yako yalacepelwa pa wanda uno wizilwa ni ntazi.”—Mapinda 24:10.
VINO CIKUSENULA: Ukutoovoka kungatulenga tuvilwe ukucimvya intazi izikaiza umu umi. Nomba upalilo ungatwazwa ukuya asipe pakuti tutwalilile ukuzizimizya. Ndi cakuti tuli nu upalilo, tukailuka ukuti intazi izingi zino tukupitamo izya pa kasita sile akanono, nupya tungataila ukuti umu ntazi kwene zizyo mulafuma ivintu ivisuma sana uku nkoleelo.
VINO MUNGACITA: Mwaelenganya pa visuma ivilacitika uku nkoleelo. Ukucila ukulasakamala pali vino vingacitika nanti ukuloleela ukuti ivintu vikazipe, mwaezya na maka ukuombesya ukulingana na mauyo yano mwimika. Nomba nanti ciye vivyo “ivyaula ukwenekela” vingatucitikila. (Kasambilizya 9:11, NWT) Nomba insita izingi vimwi visuma vikaiza umu kucitika ukucila na vino tukwenekela. Baibo yaomvya icilangililo ca ulimi nu kulanda ukuti: “Mwakomela imbezu akatondo, mukomela na manguzi kwene. Mutange mumanye ndi mbezu zyonsi zilakula ningo, nanti ndi ukukomela kwa pa nsita imwi ukulaya ningo ukuluta ukwa pa nsita yuze.”—Kasambilizya 11:6.
MASUKO UKU MAUZYO ACINDAME SANA
CISINTE CA MULI BAIBO: “Umpeele ukwiluka . . . Amazwi yako yonsi acumi.”—Masamu 119:144, 160.
VINO CIKUSENULA: Baibo ikaasuka mauzyo yano antu aingi yakauzya. Ikaasuka mauzyo ali wakwe
-
Aekwi kuno twafumile?
-
U mulandu ci uno twayela pano nsi?
-
I vyani vikacitika umuntu ndi wafwa?
-
Uzye ukwene ali umi sile uwayako?
Antu aingi ukuzinguluka insi yasenuka sana pa mulandu wakuti yawelenga Baibo nu kuzana amasuko uku mauzyo yaa na yauze.
VINO MUNGACITA: Mwawelenga Baibo mweineco pakuti muyuvwile vino ikasambilizya. Muzye Nte Wakwe Yeova ali wensi pakuti amwazwe ukuvwikisya Baibo. Muye pali webusaiti itu iya jw.org, nanti mukazanwe uku kulongana kwitu, uwila sile nupya aliwensi angazanwako.
IVISINTE NA VYUZE IVYA MULI BAIBO
Tambini vidyo yakuti U Mulandu ci Uno Mulinzile Ukusambilila Baibo? apa jw.org. Yaya umu ndimi ukucila pali 880
MANYINI VINO MUKULONDEKWA MULI UKAPEPA WINU.
“Ansansa aantu yano yamanya ukuti yakalondekwa vyakwe Leza.”—MATEO 5:3, NWT.
SAMBILILINI NA VYUZE PALI LEZA UMWINECO WA MAZWI YA MULI BAIBO.
“Mwalonda Leza . . . pakuti mumuzane . . . nanti angala asi kutali naswe.”—MILIMO 17:27.
MWAWELENGA NU KWELENGANYA PALI VINO MUKUWELENGA MULI BAIBO.
“Akazangila mu kuyela amazwi yakwe Yeova, * nu kuyelenganya usiku nu musanya. . . . Vyonsi vino akacita asiposiwa.”—MASAMU 1:2, 3.
^ pala. 23 Yeova i zina lyakwe Leza wakwe vino Baibo yasokolola.
Limwi Mungatemwa Ukulolako na Vii
LUPUNGU LWA MULINZI
Uzye Baibo Ingangavwa Uli?
Mwi buku lii lya mpiti mwaya ukupanda mano ukusuma sana.
