Will walanzile ukuti: “Kuwelenga Baibo kungakuvwisya ukasu ndi cakuti utamanyile inzila isuma iya kuiwelengelamo.”

 Uzye ungatemwa ukumanya inkama iyayapo pa kuipakizya ukuwelenga Baibo? Cipande cii cimakwazwa.

•  Walenga Malembelo yauvwika acumi

•  Walondelezya Ivyeo!

•  Vino auzo yakalanda

 Waikako mano kuli vino ukuwelenga. Ungaomvyako inzila ii:

1.   Soolola ilyasi limwi lya muli Baibo lino ungatemwa ukuwelenga. Ungasoolola pali cimwi icacitike nanti ilyasi ilili lyonsi umwi buku Liilandwe, nanti ungasoolola icangalo icili consi pa vyangalo vya muli Baibo ivya mazwi yatupu ivyaya pa jw.org.

2.   Welenga ilyasi lyonsi. Ungaiwelengela wemwineco, nanti ukuwelenga umu kupongomoka pamwi na auzo nanti ya lupwa. Lyene umwi angaawelenga ciputulwa cakwe kasimika alino yauze nayo iviputulwa vya antu alimo.

3.   Ezya ukuomvya inzila yonga nanti zyonsi pali zii:

   •   Leenga ivikope ivikulangilila ilyasi lilyo. Nanti panga ilyasi pa cipepala ca vikope—ivikope ivikulondolola ivyacitikanga umu nsita iyo na lino vyacitikanga. Ulembepo na amazwi aakulondolola ivili pali cila cikope.

   •   Leenga navyuze ivili mwi lyasi lilyo. Tuti limwi ukuwelenga pali umwi uwali nu utailo, ezya ukulemenkanya imiyele ni vicitwa vya muntu wiyo kuli vino wapolelilwe.

   •   Senula ilyasi liye ilyakulanda. Londolola ivyacitike, nupya kuye nu “kuuzya ivyacitiike” kuli wino vyacitikile nga na yakambone aaliko.

   •   Ndi cakuti umwi pali yano vimwi vyacitikile ataapingwile ningo pa vintu, elenganya vino ivintu vizile iviya pa cisila. Ungelenganyako na pali vino Petulo wakanyile Yesu. (Mako 14:66-72) Uzye walinzile ukucita uli pakuti aasuke ningo lino yamupatikizye ukuzumila Yesu?

   •   Ndi ungakwanisya ukupanga ilyasi, ungalemba icangalo api ilyasi limwi ilya muli Baibo. Ulembe na vino ungasambililako ukwi lyasi lilyo.—Loma 15:4.

 Ndi wapekanya ningo ivyeo, ungaleenga antu ukuvwikisya ivyeo vino yataamanyile mpiti. Kulanda sile icisinka, nanti sile izwi lyonga ilya muli Baibo lyacindama.

 Linganya ivyeo ivyaya pali Mateo 28:7 kuli vino vyaya pali Mako 16:7.

•    Umulandu ci uno Mako walumbwilile “na Petulo” lino walandanga pa kuloleka kwakwe Yesu uku asambi?

•  Ivingakwazwa kumanya ilyasi: Mako ataali akambone lino ivintu vii vyacitike; fwandi, wakweti usininkizyo api ilyasi lii kufuma kuli Petulo.

•  Icuma icifiswe: Umulandu ci uno Petulo uvwilile intete lino uvwile ukuti Yesu akulonda ukumulola nupya? (Mako 14:66-72) Uzye Yesu walangizye uli ucuza wa cumi kuli Petulo? Uzye ungakolanya uli Yesu pakuti uye cuza wa cumi kuli yauze?

 Ndi cakuti Malembelo yaya acumi cumi kuli wewe nupya ndi ukulondelezya ivyeo, ulaaipakizya ukuwelenga Baibo!