Hibru 5:1-14
5 Jabdewõt bũrij l̦apl̦ap kar kããlõte jãn ibwiljin armej ro, kar jitõñe bwe en jerbal ilo etan armej ro ñan kõm̦m̦ani jerbal ko an Anij. Ilo wãween in, en maroñ ajel̦o̦k menin lel̦o̦k im katok ko kõn jerawiwi ko aer.
2 Emaroñ kwal̦o̦k tũriam̦o* ñan ro rej kõm̦m̦an bõd kõn wõt aer jaje, kõnke e bareinwõt ewõr m̦õjn̦o̦ ko ippãn,
3 eñin unin ej aikuj in lel̦o̦k an menin joortak kõn jerawiwi ko an make ãinwõt an kõm̦m̦ane ñan armej ro.
4 Juon ejjab make kããlõte bwe en bõk jeraam̦m̦an in, bõtab Anij wõt ej kããlõte, ãinwõt kar Aron.
5 Ãindein kar bar Christ, ear jab make kaiboojoje* bwe en juon bũrij l̦apl̦ap, bõtab ear bõk aiboojoj in jãn Eo ear ba ñane im ba: “Kwe kwõj nejũ; rainin em̦õj aõ erom jem̦am̦.”
6 Ãinwõt an bar ba ilo juon jikin ilo Jeje ko im ba, “Kwe kwõj juon bũrij ãinwõt kar Melkizedek im kwõnaaj bũrij ñan indeeo.”
7 Ilo iien eo Christ ear mour ijin ioon lal̦,* elõñ alen an kar akwel̦ap im kajjitõk ilo juon ainikien el̦ap im kõn dãnnin kõmjaal̦al̦ ñan Eo ear maroñ lo̦mo̦o̦rene jãn mej, im kar m̦õn̦õn̦õ in roñjake e kõnke ear juon eo el̦ap an kar mijak Anij.
8 Meñe ej nejin, ak ear katak pokake jãn men ko ear eñtaan kaki.
9 Im ãlikin an kar weeppãn ilo men in, ear bõk eddon lo̦mo̦o̦r eo ej ñan indeeo im ej ñan aolep ro rej pokake e,
10 unin ej kõnke em̦õj an Anij kããlõte bwe en juon bũrij l̦apl̦ap ãinwõt kar Melkizedek.
11 Ekanooj lõñ men ko kõm maroñ kõnono kaki kõn e, ak elukkuun pen ñan kõmel̦el̦eiki kõnke em̦õj ami oktak im ri-roñjam̦õn̦.
12 Kom̦win kar jet ro rej ri-katakin kiiõ, ak kom̦ij aikuji an juon bar katakin kom̦ kõn katak ko jinoin kõn naan ko rekkwõjarjar an Anij, im em̦õj ami ro̦o̦llikl̦o̦k im jet ro rej aikuj milik im jab ekkan ko reppen.
13 Bwe jabdewõt eo ej wõnm̦aanl̦o̦k wõt im idaak milik, ejjab jel̦ã naan ko rewãnõk kõnke ej ajri wõt.
14 Bõtab ekkan ko reppen rej ñan ro rerũtto, aet, ñan ro me ilo aer kõjerbali, rej kammineneik maroñ eo aer ñan kõl̦mãnl̦o̦kjen̦* bwe ren jel̦ã oktak eo ikõtaan jim̦we im bõd.
Footnotes
^ Ak “jouj.”
^ Ak “kããlõte.”
^ Kajin Grik, “Ilo raan ko ear juon kanniõk.”
^ Ak “ñan lol̦o̦kjen̦.”
