Matu 22:1-46
22 Jesus ear bar kwal̦o̦k waanjoñak ko ñan er ke ear ba:
2 “Aelõñin lañ* ej ãinwõt juon kiiñ ej kõpooj juon iien m̦õñã el̦ap ñan iien m̦are eo an l̦eo nejin.
3 Kiiñ eo ear jilkinl̦o̦k ri-karejar* ro an bwe ren bõktok ro ear kũr er ñan iien m̦õñã eo, bõtab armej ro rar jab kõn̦aan etal.
4 Kiiñ eo ear bar jilkinl̦o̦k jet ri-karejeran, im ear ba, ‘Kom̦win ilen ba ñan ro iar kũr er im ba: “Kom̦win itok ñan iien m̦õñã en̦ bwe em̦õj aõ kõpooj elõñ m̦õñã. Em̦õj m̦anm̦an kau im kõpooj kanniõk ko renno̦tata, aolep men im pojak.”’
5 Bõtab ro ear kũr er rar kõjekdo̦o̦n ri-karejar ro im ilo̦k. Jet rar ilo̦k ñan jikin kallib ko aer, im ro jet rar etal ñan jikin jerbal ko aer.
6 Im armej ro jet rar jibwe ri-karejar ro im m̦an er ñan mej.
7 “Kiiñ eo ear kanooj in illu im ear jilkinl̦o̦k rũttarin̦ae ro an bwe ren m̦an armej ro rar m̦ane ri-karejar ro jet an. Innem rar m̦an er ñan mej im tile bukwõn eo aer.
8 Tokãlik ear ba ñan ri-karejar ro an im ba, ‘Epojak iien m̦õñã in, bõtab ro iar kũrtok er rejekkar ñan aer itok.
9 Kõn men in, kom̦win ilo̦k ñan ial̦leplep ko im kũrtok jabdewõt armej kom̦ij iioon er ñan iien m̦õñã in.’
10 Innem ri-karejar ro an rar ilo̦k ñan ial̦leplep ko im kũrtok jabdewõt armej rar iioon er, ro rem̦m̦an im ro renana jim̦or. Im jikin eo kar kõm̦m̦ane m̦õñã in m̦are eo ie ear obrak kõn armej ro rar itok.*
11 “Ke kiiñ eo ear del̦o̦ñl̦o̦k bwe en lale armej ro rar itok, ear lo juon em̦m̦aan me ear jab kõn̦aktok nuknuk ko rekkar ñan iien m̦are eo.
12 Innem ear kajjitõk ippãn em̦m̦aan eo im ba, ‘Etke kwaar jab kõn̦aktok nuknuk ko rekkar ñan iien m̦are in ak kweitok?’ Bõtab l̦eo ear jab ba jabdewõt.
13 Im kiiñ eo ear ba ñan ri-karejar ro an im ba, ‘Kom̦win lukwõj neen im pein l̦õn̦e im jol̦o̦ke inabõj ilo ijo emarok. Eñin ijo enaaj jañ im kij dekein ñiin ie.’
14 “Elõñ ro ej kũr er ak eiiet ro ej kããlõt er.”
15 Innem Parisi ro rar ilo̦k jãn ijo. Im rar koba ippãn doon bwe ren pukot kilen aer maroñ kõm̦m̦an bwe en bõd an kõmel̦el̦e.
16 Innem Parisi ro rar jilkinl̦o̦k ri-kal̦oor ro aer kab armej ro doon Herod ñan ippãn im rar ba ñane: “Ri-Kaki, kõm jel̦ã bwe kwe juon eo em̦ool, im kwõj katakin armej ro m̦ool eo kõn Anij. Bareinwõt, kwõjjab kappok nõbar jãn jabdewõt kõnke kwõjjab lale paotokin armej.
17 Ak kiiõ kwõl̦ak lale emãlim ke* bwe jen kõl̦l̦ã eowõj ñan Sizar?”*
18 Bõtab Jesus ear jel̦ã kõn men eo enana rej kajjioñ in kõm̦m̦ane, im ear ba: “Kom̦ ri-etao, etke kom̦ij mãlejjoñ eõ?
19 Kwal̦o̦ktok juon jããn in eowõj.” Innem rar lel̦o̦k juon denariõs* ñane.
20 Im ear ba ñan er: “Pijain wõn in ej wal̦o̦k ilo jããn in im etan wõn in ie?”
21 Rar uwaak im ba: “Sizar.” Innem eba: “Eokwe, kom̦win lel̦o̦k ñan Sizar men ko an Sizar, im lel̦o̦k ñan Anij men ko an Anij.”
22 Ke rar roñjake an ba naan kein, rar lukkuun bwilõñ, innem rar ilo̦k jãne.
23 Ilo ejja raan eo wõt, Saddusi ro ak ro rej ba bwe ejjel̦o̦k jerkakpeje, rar itok ñan ippãn im ba:
24 “Ri-Kaki, Moses ear ba: ‘Ñe juon em̦m̦aan emej ak ejjel̦o̦k nejin, l̦eo jatin* ej aikuj m̦areiki kõrã eo kar pãleen kõnke en l̦ak wõr nejierro, en tarrin nejin l̦eo ekar mej.’
25 Kiiõ ewõr jimjuon em̦m̦aan rej jemjati. L̦eo erũtto ear m̦are im tokãlik ear mej ak ejjel̦o̦k nejin. Kõn men in, l̦eo edikl̦o̦k jãne ear m̦areik lio kar pãleen.
26 Men eo ear wal̦o̦k ñan l̦eo erũttotata ear bar wal̦o̦k ñan l̦eo kein karuo im ñan l̦eo kein kajilu l̦o̦k ñan eo kein kajimjuon.
27 Ãliktata, kõrã eo ear mej.
28 Ak kiiõ, ilo iien jerkakpeje en̦, wõn iaan em̦m̦aan rein jimjuon enaaj pãleek lio ke aolepeer rar m̦areiki?”
29 Jesus ear uwaak er im ba: “Kom̦ lukkuun bõd kõnke kom̦ jaje kõn Jeje ko im kõn kajoor eo an Anij.
30 Ñe ro remej renaaj jerkakpeje, ejjel̦o̦k em̦m̦aan im kõrã renaaj m̦are kõnke renaaj ãinwõt enjel̦ ran̦ ilañ.
31 Kom̦ij jañin riiti men eo Anij ear ba ñan kom̦ ikijjeen jerkakpeje eo an ro remej ke? Ear ba:
32 ‘Ña ij Anij an Ebream, Anij an Aisak, im Anij an Jekob.’ Alikkar bwe ej Anij an ro remour im jab an ro remej.”
33 Ke jarlepju eo ear roñ naan kein, rar lukkuun bwilõñ kõn katak ko an.
34 Ke Parisi ro rar roñ bwe Jesus ear kaikõñ Saddusi ro, rar koba ippãn doon im kepaake e.
35 Im juon iaaer me etijem̦l̦o̦k kõn Kien eo ear mãlejjoñe ilo an kajjitõk im ba:
36 “Ri-Kaki, kien ta eo eaorõktata ilo Kien eo?”
37 Im eba: “‘Kwõn yokwe Jeova* am̦ Anij kõn aolepen bũruom̦, im kõn aolepen am̦ mour, im kõn aolepen am̦ l̦õmn̦ak.’
38 Eñin ej kien eo m̦oktata im eaorõktata.
39 Kien eo kein karuo eitõn ãinwõt kien eo m̦oktata im ej eñin: ‘Kwõn yokwe ri-turum̦* ãinwõt am̦ yokwe eok make.’
40 Aolepen Kien eo im naan ko an ri-Kanaan ro rar ejaak jãn kien kein ruo.”
41 Ke Parisi ro rej pãdwõt ijo, Jesus ear ba ñan er:
42 “Ta ami l̦õmn̦ak kõn Christ? Nejin wõn?” Im reba: “Nejin Devid.”
43 Im ear kajjitõk ippãer im ba: “Innem etke jetõb kwõjarjar* ear kõm̦akũt Devid bwe en ãñinñini im ba Irooj? Devid ear ba,
44 ‘Jeova* ear ba ñan aõ Irooj: “Kwõn jijet ituanbwijmaroñin peiũ m̦ae iien inaaj likũt ro rej kõjdate eok bwe ren pãd ium̦win neem̦.”’
45 Ewi wãween an maroñ nejin Devid el̦aññe Devid ear ãñinñini im ba Irooj?”
46 Ejjel̦o̦k juon iaaer ear maroñ uwaake Jesus. Innem jãn raan eo m̦aanl̦o̦k, ejjel̦o̦k en̦ ear peran in bar kajitũkini.
Footnotes
^ Ak “Kien eo an Anij.” Lale “Aelõñ eo an Anij” ilo Kõmel̦el̦e Ko.
^ Ak “ri-kõm̦akoko.”
^ Ak “ro rar jijet ilo tebõl̦ eo.”
^ Ak “ejim̦we ke.”
^ Ak “Irooj L̦apl̦ap eo an Rom.”
^ Jããn jelba in Rom. Lale “Denariõs” ilo Kõmel̦el̦e Ko.
^ Baibõl̦ ejjab lukkuun kaalikkar wõn eo erũttol̦o̦k im wõn eo edikl̦o̦k iaan jemjati rein rar mej.
^ Lale “Jeova” ilo Kõmel̦el̦e Ko.
^ Ilo kajin Grik, naan eo “ri-turum̦” emaroñ jitõñl̦o̦k ñan jabdewõt armej.
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
