Matu 28:1-20
28 Ke ear jem̦l̦o̦k raanin Jabõt* im ej joraantak in raan eo m̦oktata ilo wiik eo tok juon,* Meri Magdalini im Meri eo juon rar etal im lale lõb eo.
2 Im ilo iien eo wõt, lal̦ ear m̦akũtkũt kõnke enjel̦ eo an Jeova* ear wanlal̦tak jãn lañ im kadãpill̦o̦k dekã eo jãn mejãn lõb eo, innem ear jijet ioon dekã eo.
3 Enjel̦ eo ear ejjatõltõl ãinwõt ñe ej ejjaromrom lañ, im nuknuk eo an emouj ãinwõt jin̦o.
4 Ke ri-waj ro rekar loe, rar lukkuun mijak im wũdiddid, innem rar kã im ãinwõt ñe remej.
5 Im enjel̦ eo ear ba ñan kõrã ro: “Kom̦win jab mijak, ijel̦ã bwe kom̦ij pukote Jesus, eo rar m̦ane ilo aer dilaiki ilo jurõn al̦al̦.
6 Ejako ijin kõnke em̦õj an bar mour, ãinwõt an kar ba. Komiro itok im lale ije ãnbwinnin ear pãd ie.
7 Innem komiro en m̦õkajl̦o̦k im kõnnaanek ri-kal̦oor ran̦ an bwe em̦õj an jerkak jãn mej im emootl̦o̦k im̦aan ñan Galili. Ba ñan er bwe renaaj loe ijen̦. Keememej men kein ij jiroñwaj komiro.”
8 Im erro kar kaiur im ilo̦k jãn lõb* eo. Erro ar mijak, bõtab erro ar bar kanooj in m̦õn̦õn̦õ ke rar etal bwe ren kõnnaanek ri-kal̦oor ro.
9 Bõtab Jesus ear iioon erro ilo ial̦ eo aerrol̦o̦k, im ear ba: “Yokwe komiro!” Innem erro ear kepaake e im jibwe neen im kwal̦o̦k kautiej* ñane.
10 Innem Jesus ear ba: “Komiro en jab mijak! Komiro ilo̦k im kõnnaanek ri-kal̦oor ro aõ bwe ren etal ñan Galili im renaaj lo eõ ijen̦.”
11 Im ke kõrã ro rar mootl̦o̦k, jet iaan rũttarin̦ae ro rar waje lõb eo rar ilo̦k ñan Jerusalem im kõnnaanek bũrij ro reutiej kõn aolep men ko rar wal̦o̦k.
12 Innem bũrij ro rar kweilo̦kl̦o̦k ippãn ri-tõl ro an ri-Ju im ãlikin aer pepe ippãn doon, rar lel̦o̦k elõñ jããn jelba ñan rũttarin̦ae ro
13 im ba: “Kom̦win kab ba ñan armej im ba, ‘Ri-kal̦oor ro an rar itok in boñ ke kõmar kiki im ko̦o̦te ãnbwin eo.’
14 Kom̦win jab inepata ñe kom̦ja* en̦ enaaj roñ kõn men in kõnke kõm naaj kõmel̦el̦eiki* kõn ta eo ear wal̦o̦k.”
15 Im rũttarin̦ae ro rar bõk jããn jelba ko im rar kõm̦m̦ane men eo kar jiroñ er bwe ren kõm̦m̦ane. Bwebwenato in em̦õj an ajeededl̦o̦k ibwiljin ri-Ju ro ñan rainin.
16 Ri-kal̦oor ro 11 rar ilo̦k ñan tol̦ eo ilo Galili me Jesus ear ba bwe ren ilo̦k ñane.
17 Im ke rar loe, rar kwal̦o̦k kautiej* ñane, ak jet iaaer rar jab tõmak bwe e eo.
18 Im Jesus ear kepaak er im kõnnaan ñan er im ba: “Em̦õj kõmaroñ eõ ioon men otemjej ilo lañ im ioon lal̦.
19 Kom̦win ilo̦k ñan ippãn armej in aelõñ otemjej im kõm̦m̦an bwe ren erom ri-kal̦oora, im peptaiji er ilo etan Jemãn, Nejin, im jetõb kwõjarjar.*
20 Kom̦win katakin er bwe ren pokake aolep men ko iar jiroñ kom̦ kaki, im keememej bwe inaaj pãd ippemi iien otemjej, ñan jem̦l̦o̦kin jukjukun pãd* in.”
Footnotes
^ Lale “Jabõt” ilo Kõmel̦el̦e Ko.
^ Eñin ej raan eo jej n̦aetan Sunday. Ippãn ri-Ju ro, eñin ej raan eo m̦oktata ilowaan juon wiik.
^ Lale “Jeova” ilo Kõmel̦el̦e Ko.
^ Kajin Grik, “libõn keememej.”
^ Ak “buñpedo.”
^ Ak “kabna.”
^ Kajin Grik, “kareel bũruon.”
^ Ak “buñpedo.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
