Ekkã an rippãlele ro lukkuun m̦õn̦õn̦õ im jaje ren ta ñe ej l̦otak juon nejier niñniñ. El̦aññe ej kab juon nejimiro, kwõnãj kile bwe kwõj aikuj kõjerbal enañin aolepen iien im maroñ ko am̦ ñan lale niñniñ eo nejimiro. Kõn an jabwe iien amiro kiki, elõñ kain l̦õmn̦ak im eñjake ko komiro naaj bõki me remaroñ jelõt pãd n̦e amiro. Komiro jim̦or naaj aikuj kõm̦m̦an oktak ko bwe en em̦m̦an amiro lale niñniñ n̦e nejimiro im bwe en em̦m̦an wõt pãd n̦e amiro. Ewi wãween an naan in kakapilõk ko ilo Baibõl̦ maroñ jipañ komiro ñan jel̦ã kilen kõm̦adm̦õdi men kein?

EKKAR ÑAN BAIBÕL̦: “Yokwe ej meanwõd im jouj.” Juon eo me ewõr yokwe ippãn ‘ejjab l̦õmn̦ak wõt kõn e make, im ejjab illulu.’ (1 Korint 13:4, 5, UBS) El̦aññe kwe juon kõrã im ej kab wõr juon nejũm̦ niñniñ, enaaj itok wõt bwe kwõn jol̦o̦k aolep iien ko am̦ ñan lale niñniñ eo. L̦eo pãleem̦ emaroñ jino l̦õmn̦ak bwe ejako an kiiõ aorõk ippam̦. Kõn men in, keememej bwe kwõj aikuj bar kõm̦m̦an am̦ iien ippãn. Kwõn meanwõd wõt ippãn im jouj wõt ñane. Ñe kwõj kõm̦m̦ani men kein im jipañe bwe en kile bwe komiro niñniñ eo jim̦or ej aikuji, l̦eo enaaj kile bwe ewõr tokjãn ñan komiro jim̦or.

“L̦õm̦aro, kom̦win jokwe ippãn pãleemi kõn jel̦ãl̦o̦kjen̦.” (1 Piter 3:7) El̦aññe kwe juon em̦m̦aan im ej kab wõr juon nejũm̦, kwõj aikuj mel̦el̦e bwe kõrã n̦e pãleem̦ enaaj aikuj kõjerbal enañin aolep iien im maroñ ko an ñan lale niñniñ n̦e nejimiro. Elõñl̦o̦k wõt men ko ej aikuj kõm̦m̦ani im remaroñ kõm̦m̦an an m̦õk, inepata, ak bũrom̦õj. Ewõr iien me lio emaroñ illu ippam̦, ak kwõj aikuj kate eok bwe kwõn jab illu ippãn. Baibõl̦ ej ba: “Eo erum̦wij an illu, em̦m̦anl̦o̦k jãn eo ekajoor.” (Jabõn Kõnnaan 16:32) Kwõn kajjioñ mel̦el̦e kõn wãween ko lio pãleem̦ ej iiooni im jipañe.​—Jabõn Kõnnaan 14:29, UBS.

MEN KO KWÕMAROÑ KÕM̦M̦ANI:

• Em̦m̦aan: Kwõn jipañ lio pãleem ñan lale niñniñ eo, ekoba in boñ. Kwõn kadikl̦o̦k am̦ iien ilo men ko jet bwe en l̦apl̦o̦k am̦ iien ippãn kõrã n̦e pãleem im niñniñ n̦e nejimiro

• Kõrã: Ñe l̦eo pãleem̦ ej kajjitõk an jipañ eok ñan lale niñniñ n̦e nejimiro, eokwe kwõn kõtl̦o̦k an jipañ. Ñe ejjab lukkuun jim̦we an kõm̦m̦ane juon men, kwõn jab luuki. Ak kwõn jouj ilo am̦ kwal̦o̦k ñane kilen an kõm̦m̦ane men eo

EKKAR ÑAN BAIBÕL̦: Em̦m̦aan eo im kõrã eo “erro naaj juon wõt.” (Jenesis 2:24, UBS) Jekdo̦o̦n ñe ewõr juon nejimiro niñniñ kiiõ, keememej bwe komiro eo pãleem̦ ej “juon wõt.” Kate komiro joñan wõt amiro maroñ bwe en em̦m̦an wõt pãd n̦e amiro.

Ñe kwe juon kõrã, kwõn kam̦m̦oolole l̦eo pãleem̦ kõn an jipañ eok. Ñe kwõj kwal̦o̦k am̦ kam̦m̦oolole, men in enaaj kakajoore. (Jabõn Kõnnaan 12:18, UBS) Ñe kwe juon em̦m̦aan, kwõn ba ñan kõrã eo pãleem̦ bwe kwõj yokwe im kaorõke. Kwõn nõbare kõn an kate e kõn jerbal ko an ñan kwe im niñniñ n̦e nejimiro.​—Jabõn Kõnnaan 31:10, 28.

“Ejjel̦o̦k en pukot men ko rem̦m̦an ñan e wõt, ak en pukot men ko rem̦m̦an ñan ro jet.” (1 Korint 10:24, UBS) Kwõn l̦õmn̦ak kõn kõn̦aan im aikuj ko an eo pãleem̦ m̦okta jãn kõn̦aan im aikuj ko am̦ make. Komiro ej aikuj kõm̦m̦an iien amiro bwebwenato ippãn doon. Kwõn bar keememej bwe ewõr kun̦aamiro ñan doon ñan babu ak pãd ippãn doon. Kwõj aikuj l̦õmn̦ak kõn aikuj ko an eo pãleem̦. Baibõl̦ ej ba: “Kom̦ rippãlele, kom̦win jab m̦akoko in pãd ippãn doon; men eo wõt, el̦aññe kom̦ij bõro wõt juon kake m̦okta.” (1 Korint 7:3-5, UBS) Komiro en jab ãliklik in bwebwenato kõn men in ippãn doon im komiro en kwal̦o̦k m̦ool ñan doon. Ñe komiro naaj meanwõd wõt ñan doon im mel̦el̦e kõn aikuj ko an doon, men in enaaj kõm̦m̦an bwe en em̦m̦anl̦o̦k wõt pãd n̦e amiro.

MEN KO KWÕMAROÑ KÕM̦M̦ANI:

• Kwõn jab mel̦o̦kl̦o̦k in kõm̦m̦an amiro iien ippãn doon

• Kwõmaroñ kõm̦m̦ani men dikdik ko ñan kwal̦o̦k ñan eo pãleem̦ bwe kwõj yokwe e. Ñan waanjoñak, kwõmaroñ text e l̦o̦k im ba bwe kwõj yokwe e ak lel̦o̦k juon m̦weien men dikdik

EKKAR ÑAN BAIBÕL̦: “Jãn ke kwõj ajri, kwaar jel̦ã jeje ko rekkwõjarjar, ko remaroñ in kamãlõtlõt eok ñan lo̦mo̦o̦r.” (2 Timote 3:15) Komiro en pepel̦o̦k im̦aan kõn men ko komiro naaj kõm̦m̦ani ñan katakin niñniñ eo nejimiro. Ekabwilõñlõñ bwe niñniñ eo emaroñ roñ ainikiemiro, kile amiro yokwe e, im katak elõñ men ko meñe ej pãd ilowaan lo̦jien jinen. Komiro en riit ñane meñe ej kab l̦otak. Jekdo̦o̦n ñe emaroñ jab mel̦el̦e men ko kwõj riitil̦o̦k, ak men in emaroñ kõm̦m̦an bwe en em̦m̦an ippãn riit ñe ej rũttol̦o̦k.

Niñniñ eo nejũm̦ emaroñ katak kõn Jeova jekdo̦o̦n ñe ej dik wõt. Kwõn jar im̦aan mejãn bwe en roñjake am̦ jar ñan Jeova. (Duteronomi 11:19) Ñe kwõj iukkure ippãn, kwõn bwebwenato ippãn kõn men ko Jeova ear kõm̦anm̦ani. (Sam 78:3, 4) Ñe ajri eo enaaj rũttol̦o̦k, enaaj jel̦ã bwe kwõj yokwe Jeova im enaaj bar kõn̦aan yokwe E ãinwõt kwe.

MEN KO KWÕMAROÑ KÕM̦M̦ANI:

• Kwõn jar ñan Anij bwe en lewaj ñan eok mãlõtlõt bwe kwõn jel̦ã ta ko kwõn kõm̦m̦ani ñan katakin niñniñ n̦e nejimiro

• Ãliji men ko kokõn̦aan bwe en jel̦ã, bwe en jino an katak meñe ej dik wõt